ஐசிசி சாம்பியன்ஸ் கோப்பை தொடரில் இன்று நடைபெற்ற 3ஆவது லீக் போட்டியில் ஆஃப்கானிஸ்தான் மற்றும் தென் ஆப்பிரிக்க அணிகள் பலப்பரீட்சை நடத்தின. கராச்சியில் நடைபெற்ற இப்போட்டியில் டாஸ் வென்ற தென் ஆப்பிரிக்க அணி முதலில் பேட்டிங் செய்வதாக அறிவித்தது.
அதன்படி களமிறங்கிய தென் ஆப்பிரிக்க அணியில் தொடக்க வீரர் டோனி டி ஸோர்ஸி 11 ரன்களில் விக்கெட்டை இழந்து ஏமாற்றமளித்தார். அதன்பின் இணைந்த ரியான் ரிக்கெல்டன் - டெம்பா பவுமா அபாரமாக விளையாடி அணியின் ஸ்கோரை உயர்த்தினர். இதில் அரைசதம் கடந்த டெம்பா பவுமா 58 ரன்களில் தனது விக்கெட்டை இழக்க, மறுமுனையில் அபாரமாக விளையாடிய ரியான் ரிக்கெல்டன் தனது முதல் சதத்தைப் பதிவுசெய்து அசத்தினார்.
பின்னர் 103 ரன்களில் ரிக்கெல்டன் விக்கெட்டை இழக்க, அடுத்து வந்த ரஸ்ஸி வெண்டர் டுசென் 52 ரன்களையும், இறுதிவரை ஆட்டமிழக்காமல் இருந்த ஐடன் மார்க்ரம் 52 ரன்களையும் சேர்த்து அணிக்கு தேவையான ஃபினிஷிங்கை கொடுத்தனர். இதன்மூலம் தென் ஆப்பிரிக்க அணி 50 ஓவர்கள் முடிவில் 6 விக்கெட்டுகள் இழப்பிற்கு 315 ரன்களைச் சேர்த்தது. இதனையடுத்து கடின இலக்கை நோக்கி ஆஃப்கானிஸ்தான் அணி விளையாடி வருகிறது.
இந்நிலையில் இப்போட்டியில் தென் ஆப்பிரிக்க அணி வீரர் ரியான் ரிக்கெல்டன் சதமடித்து அசத்தியதன் மூலம் சில சாதனைகளையும் படைத்துள்ளார். அதன்படி, சாம்பியன்ஸ் கோப்பை தொடரில் சதம் அடித்த ஐந்தாவது தென் ஆப்பிரிக்க வீரர் எனும் பெருமையை அவர் பெற்றுள்ளார். இதற்கு முன் அந்த அணியில் ஹர்ஷல் கிப்ஸ் 3 முறையும், கிரேம் ஸ்மித், ஜாக் காலிஸ் மற்றும் ஹாஷிம் ஆம்லா ஆகியோர் தலா ஒரு முறையும் சாம்பியன்ஸ் கோப்பை தொடரில் சதமடித்துள்ளனர்.
சாம்பியன்ஸ் டிராபியில் தென் ஆப்பிரிக்காவுக்காக சதம் அடித்தவர்கள்
- ஹெர்ஷல் கிப்ஸ் (3 சதங்கள்)
- கிரேம் ஸ்மித்
- ஜாக் காலிஸ்
- ஹாஷிம் ஆம்லா,
- ரியான் ரிக்கல்டன்
இது தவிர்த்து ஐசிசி தொடரின் அறிமுகப் போட்டியிலேயே சதம் அடித்த இரண்டாவது தென் ஆப்பிரிக்க வீரர் என்ற பெருமையையும் ரியான் ரிக்கெல்டன் பெற்றுள்ளார். முன்னதாக, கடந்த 1996 ஆம் ஆண்டு ஐசிசி ஆடவர் ஒருநாள் உலகக்கோப்பை தொடரில் ஐக்கிய அரபு அமீரகத்திற்கு எதிரான போட்டியில் தென் ஆப்பிரிக்க அணியின் முன்னாள் வீரர் கேரி கிரிஸ்டன் சதமடித்ததுடன் 188 ரன்களைக் குவித்திருந்தார் என்பது குறிப்பிடத்தக்கது.
ஆஃப்கானிஸ்தான் பிளேயிங் லெவன்: ரஹ்மானுல்லா குர்பாஸ், இப்ராஹிம் சத்ரான், செதிகுல்லா அடல், ரஹ்மத் ஷா, ஹஷ்மத்துல்லா ஷாஹிதி(கே), அஸ்மதுல்லா ஒமர்சாய், குல்பாடின் நைப், முகமது நபி, ரஷித் கான், ஃபசல்ஹாக் ஃபரூக்கி, நூர் அஹ்மத்.
Also Read: Funding To Save Test Cricket
தென் ஆப்பிரிக்கா பிளேயிங் லெவன்: ரியான் ரிக்கல்டன், டோனி டி ஸோர்ஸி, டெம்பா பவுமா(கே), ரஸ்ஸி வான்டெர் டுசென், ஐடன் மார்க்ரம், டேவிட் மில்லர், வியான் முல்டர், மார்கோ ஜான்சன், கேசவ் மஹாராஜ், ககிசோ ரபாடா, லுங்கி இங்கிடி