கொன்ஸ்டாஸை போல்டாக்கிய எட்வர்ட்ஸ் - காணொளி!

பிக் பேஷ் லீக் தொடரின் 14ஆவது சீசன் இறுதிக்கட்டத்தை எட்டியுள்ளது. இதில் நேற்று நடைபெற்ற 37ஆவது லீக் போட்டியில் சிட்னி தண்டர் மற்றும் சிட்னி சிக்ஸர்ஸ் அணிகள் பலப்பரீட்சை நடத்தின. சிட்னி கிரிக்கெட் மைதானத்தில் நடைபெற்ற இப்போட்டியில் டாஸை இழந்து முதலில் பேட்டிங் செய்த சிட்னி தண்டர் அணிக்கும் கேப்டன் டேவிட் வார்னர் மற்றும் சாம் கொன்ஸ்டாஸ் இனை தொடக்கம் கொடுத்தனர். 

இதில் டேவிட் வார்னர் ஒருபக்கம் அதிரடியாக விளையாடிய நிலையில், மற்றொரு தொடக்க வீரர் சாம் கொன்ஸ்டாஸ் 9 ரன்கள் மட்டுமே எடுத்த நிலையில் விக்கெட்டை இழந்து ஏமாற்றமளித்தார். இதனால் சிட்னி தண்டர் அணி 5.1 ஓவர்களில் ஒரு விக்கெட் இழப்பிற்கு 36 ரன்களைச் சேர்த்த நிலையில் மழை குறுக்கிட்டதால் ஆட்டம் தடைபட்டது. அதன்பின் மழை தொடர்ந்து நீடித்த காரணத்தால் இப்போட்டியானது கைவிடப்படுவதாக அறிவிக்கப்பட்டது. 

இதன்மூலம் இரு அணிகளுக்கும் புள்ளிகள் பகிர்ந்தளிக்கப்பட்டது. இதன்மூலம் சிட்னி சிக்ஸர்ஸ் அணி 14 புள்ளிகளுடன் புள்ளிப்பட்டியளின் இரண்டாம் இடத்தையும், சிட்னி தண்டர் அணி 12 புள்ளிகளுடன் புள்ளிப்பட்டியலில் மூன்றாம் இடத்தையும் தக்கவைத்துள்ளார். மேற்கொண்டு நடப்பு பிக் பேஷ் லீக் தொடரின் பிளே ஆஃப் சுற்றுக்கு ஹோபர்ட் ஹரிகேன்ஸ், சிட்னி சிக்ஸர்ஸ், சிட்னி தண்டர் அணிகள் முன்னேறியுள்ளது குறிப்பிடத்தக்கது. 

இந்நிலையில் இப்போட்டியின் சிட்னி தண்டர் வீரர் சாம் கொன்ஸ்டாஸ் விக்கெட்டை இழந்த காணொளி ரசிகர்களின் கவனத்தை ஈர்த்துள்ளது. அதன்படி இன்னிங்ஸின் நான்காவது ஓவரை ஜேக் எட்வர்ட்ஸ் வீசினார். அப்போது அந்த ஓவரின் 5ஆவது பந்தை சாம் கொன்ஸ்டாஸ் எதிர்கொண்ட நிலையில், ஜேக் எட்வர்ஸ் அந்த பந்தை அபாரமான யார்க்கராக வீசினார். இதனை சற்றும் எதிர்பாராத கொன்ஸ்டாஸ் பந்தை தடுக்க முயன்றார்.

Also Read: Funding To Save Test Cricket

ஆனால் பந்து அவர் எதிர்பார்த்ததை விட வேகமாக வர கொன்ஸ்டாஸால் அந்த பந்தை தாடுக்க முடியவில்லை. இதனால் இப்போட்டியில் 9 ரன்களை மட்டுமே எடுத்திருந்த நிலையில் சாம் கொன்ஸ்டாஸ் க்ளீன் போல்டாகி பெவிலியனுக்கு நடையைக் கட்டினார். இந்நிலையில் சாம் கொன்ஸ்டாஸை அபாரமான யார்க்கரின் மூலம் விக்கெட்டை வீழ்த்திய ஜேக் எட்வர்ட்ஸின் காணொளி இணையத்தில் வைரலாகி வருகிறது.