ஐசிசி ஒருநாள் உலகக் கோப்பை தொடரில் இன்று பெங்களூரு நகரில் நடைபெற்ற 35ஆவது லீக் போட்டியில் பாகிஸ்தான் மற்றும் நியூசிலாந்து அணிகள் மோதின. அந்த போட்டியில் அரையிறுதிச்சுற்றுக்கு செல்ல இரு அணிகளுமே வென்றாக வேண்டிய கட்டாயத்தில் களமிறங்கிய நிலையில் டாஸ் வென்ற பாகிஸ்தான் முதலில் பந்து வீசுவதாக அறிவித்தது.
ஆனால் அதற்கேற்றார் போல் பந்து வீச்சில் அசத்த தவறிய அந்த அணியை அடித்து நொறுக்கிய நியூஸிலாந்து 50 ஓவர்களில் 401 ரன்கள் குவித்தது. இதன் மூலம் ஒருநாள் கிரிக்கெட்டிலும் உலகக் கோப்பையிலும் பாகிஸ்தானுக்கு எதிராக தங்களுடைய அதிகபட்ச ஸ்கோரை பதிவு செய்து நியூசிலாந்து சாதனையும் படைத்தது.
நியூசிலாந்துக்கு அதிகபட்சமாக இளம் தொடக்க வீரர் ரச்சின் ரவீந்தரா சதமடித்து 108 ரன்கள் குவித்து அறிமுக உலகக் கோப்பையில் 3 சதங்கள் அடித்த முதல் வீரராக உலக சாதனை படைத்தார். அவருடன் கேப்டன் கேன் வில்லியம்சன் சிறப்பான ஆட்டத்தை வெளிப்படுத்தி 95 ரன்கள் எடுக்க கடைசி நேரத்தில் மார்க் சாப்மேன் 39, டார்ல் மிட்சேல் 29, கிளன் பிலிப்ஸ் 41, மிட்சேல் சான்ட்னர் 26 ரன்கள் எடுத்து நல்ல ஃபினிஷிங் கொடுத்தனர்.
மறுபுறம் பந்து வீச்சில் சொதப்பிய பாகிஸ்தான் சார்பில் அதிகபட்சமாக முகமது வாசிம் 3 விக்கெட்டுகள் சாய்த்தார். ஆனால் பெரிதும் எதிர்பார்க்கப்பட்ட ஹாரிஸ் ரவூஃப் 10 ஓவரில் ஒரு விக்கெட் மட்டும் எடுத்து 85 ரன்கள் வாரி வழங்கினார். குறிப்பாக 150 கி.மீ வேகத்தில் எதிரணி பேட்ஸ்மேன்களை தெறிக்க விடுவார் என்று பாகிஸ்தான் ரசிகர்கள் கொண்டாடக்கூடிய அவர் ரச்சின் ரவீந்திர போன்ற 23 வயது இளம் வீரரிடம் சரமாரியான அடி வாங்கினார்.
சொல்லப்போனால் இதன் வாயிலாக ஐசிசி உலகக் கோப்பை வரலாற்றில் ஒரு போட்டியில் அதிக ரன்களை கொடுத்து மோசமான பவுலிங்கை பதிவு செய்த பாகிஸ்தான் பவுலர் என்ற சாதனையை படைத்தார். ஆனால் அவரை மிஞ்சும் அளவுக்கு மறுபுறம் 24 போட்டிகளுக்கு பின் முதல் முறையாக ஒரு விக்கெட்டை கூட எடுக்காமல் மோசமாக பந்து வீசிய ஷாஹீன் அஃப்ரிடி 10 ஓவரில் 90 ரன்களை வாரி வழங்கி அந்த சாதனையை உடைத்தார்.
குறிப்பாக புதிய பந்தை ஸ்விங் செய்து எதிரணி பேட்ஸ்மேன்களை ஓட விடுவார் என்று பாகிஸ்தான் ரசிகர்கள் கொண்டாடக்கூடிய அவர் ஐசிசி ஒருநாள் தரவரிசையில் உலகின் நம்பர் ஒன் பவுலராக இருந்தும் இந்த மோசமான சாதனையை படைத்துள்ளார்.
ஷாஹீன் அஃப்ரிடி : 90/0, நியூசிலாந்து, பெங்களூரு, 2023
ஹரிஷ் ரவூஃப் : 1/85, நியூசிலாந்து, பெங்களூரு, 2023
ஹசன் அலி : 1/84, இந்தியா, மான்செஸ்டர், 2019