விக்கெட்டை பரிசளித்த ஷுப்மன் கில்; வைரலாகும் காணொளி!

ஆஸ்திரேலியா - இந்தியா அணிகளுக்கு இடையேயான ஐந்தாவது மற்றும் கடைசி டெஸ்ட் போட்டி சிட்னியில் இன்று தொடங்கி நடைபெற்று வருகிறது. இப்போட்டியில் டாஸ் வென்ற இந்திய அணி முதலில் பேட்டிங் செய்வதாக அறிவித்துள்ளது. இப்போட்டிக்கான இந்திய அணியில் ரோஹித் சர்மா இடம்பிடிக்காததன் காரணமாக ஜஸ்பிரித் பும்ரா அணியின் கேப்டனாக செயபட்டு வருகிறார். 

இதனையடுத்து பேட்டிங் செய்ய களமிறங்கிய இந்திய அணிக்கு யஷஸ்வி ஜெய்ஸ்வால் மற்றும் கேஎல் ராகுல் ஆகியோர் தொடக்கம் கொடுத்தனர். இதில் கேஎல் ராகுல் 4 ரன்களிலும், யஷஸ்வி ஜெய்ஸ்வால் 10 ரன்னிலும் என விக்கெட்டை இழந்தனர். அதன்பின் ஜோடி சேர்ந்த ஷுப்மன் கில் - விராட் கோலி ஆகியோர் ஓரளவு தாக்கு பிடித்து மூன்றாவது விக்கெட்டிற்கு 40 ரன்கள் பார்ட்னர்ஷிப் அமைத்தனர்.

இதில் 20 ரன்களில் ஷுப்மன் கில் விக்கெட்டை இழக்க, அவரைத் தொடர்ந்து நிதான ஆட்டத்தை வெளிப்படுத்தி வந்த  விராட் கோலியும் 17 ரன்களை மட்டுமே எடுத்த கையோடு மீண்டும் அவுட் சைட் ஆஃப் பந்தில் விக்கெட்டை இழந்து பெவிலியன் திரும்பினார். இதனால் இந்திய அணி 72 ரன்களுக்கே 4 விக்கெட் இழந்து தடுமாறியது. அதன்பின் இணைந்துள்ள ரிஷப் பந்த் - ரவீந்திர ஜடேஜா ஆகியோர் அணியை சரிவிலிருந்து மீட்டெடுக்கும் முயற்சியில் இறங்கியுள்ளனர். 

இந்நிலையில் இப்போட்டியில் ஷுப்மன் கில் ஆட்டமிழந்த விதம் ரசிகர்களை கோபமடைய செய்துள்ளது. ஏனெனில் இப்போட்டியின் முதல்நாள் உணவு இடைவேளைக்கு ஒரு பந்து மட்டுமே மீதமிருந்த நிலையில், அதனை இறங்கி அடிக்கும் முயற்சியில் ஷுப்மன் கில் இறங்கி வந்து விளையாடினார். அதனை சரியாக கணித்த நாதன் லையனும் தனது பந்துவீச்சு லெந்த்தை மாற்ற ஷுப்மன் கில் தடுமாறி பந்தை தடுக்க முயன்றார். 

Also Read: Funding To Save Test Cricket

ஆனால் அந்த பந்து ஷுப்மன் கில்லின் பேட்டில் பட்டில் ஸ்டீவ் ஸ்மித் கையில் தஞ்சமடைந்தது. இதனால் 20 ரன்களை எடுத்த கையோடு ஆட்டமிழந்து பெவிலியன் திரும்பினார். இந்நிலையில் உணவு இடைவேளைக்கு முன்னதாக ஷுப்மன் கில் ஏன் இதுபோன்ற தேவையில்லாத ஷாட்டை விளையாடி விக்கெட்டை பரிசளிக்க வேண்டும் என ரசிகர்கள் ஆதங்கத்தை வெளிப்படுத்தி வருகின்றனர். இந்நிலையில் ஷுப்மன் கில் விக்கெட்டை இழந்த காணொளி வைரலாகி வருகிறது.