ஆஸ்திரேலியாவில் நடபெற்று வரும் நடப்பு சீசன் மகளிர் பிக் பேஷ் லீக் தொடரானது விறுவிறுப்பான கட்டத்தை எட்டியுள்ளது. இதில் நேற்று நடைபெற்ற 32ஆவது லீக் போட்டியில் அடிலெய்ட் ஸ்டிரைக்கர்ஸ் மற்றும் பெர்த் ஸ்காச்சர்ஸ் மகளிர் அணிகள் பலப்பரீட்சை நடத்தின. அடிலெய்டில் நடைபெற்ற இப்போட்டியில் டாஸ் வென்ற பெர்த் அணி முதலில் பந்துவீசுவதாக அறிவித்தது.
அதன்படி களமிறங்கிய அடிலெய்ட் ஸ்டிரைக்கர்ஸ் அணிக்கு ஸ்மிருதி மந்தனா - காடி மேக் இணை அதிரடியான தொடக்கத்தை கொடுத்து அணிக்கு தேவையான அடித்தளத்தை அமைத்து கொடுத்தனர். இதில் இருவரும் இணைந்து முதல் விக்கெட்டிற்கு 81 ரன்கள் பார்ட்னர்ஷிப் அமைத்த நிலையில் அரைசதம் அடிப்பார் என எதிர்பார்க்கப்பட்ட ஸ்மிருதி மந்தனா மற்றும் காடி மேக் ஆகியோர் தலா 41 ரன்கள் எடுத்திருந்த நிலையில் விக்கெட்டை இழந்தனர்.
பின்னர் களமிறங்கிய லாரா வோல்வார்டும் அதிரடியாக விளையாடி 3 பவுண்டரி, 3 சிக்ஸர்கள் எனா 48 ரன்களில் ஆட்டமிழந்து அரைசதம் அடிக்கும் வாய்ப்பை தவறவிட்டார். இதனால் அடிலெய்ட் ஸ்டிரைக்கர்ஸ் அணி 20 ஓவர்கள் முடிவில் 6 விக்கெட்டுகளை இழந்து 169 ரன்களைச் சேர்த்தது. பெர்த் அணி தரப்பில் சிறப்பான பந்துவிச்சை வெளிப்படுத்திய அலானா கிங் 3 விக்கெட்டுகளையும், கேப்டன் சோஃபி டிவைன் 2 விக்கெட்டுகளையும் கைப்பற்றினர்.
பின்னர் இலக்கை நோக்கி களமிறங்கிய பெர்த் அணிக்கு தொடக்கமே அதிர்ச்சியளிக்கும் வகையில் மேடி டார்க், பெத் மூனி, தயாளன் ஹேமலதா, லூயிஸ் எட்ஜர் ஆகியோர் அடுத்தடுத்து சொற்ப ரன்களுக்கு விக்கெட்டுகளை இழந்தனர். பின்னர் ஜோடி சேர்ந்த கேப்டன் சோஃபி டிவைன் புரூக் ஹாலிடே இணை பொறுப்பான ஆட்டத்தை வெளிப்படுத்தி அணியின் விக்கெட் இழப்பை தடுத்ததுடன் ஸ்கோரையும் உயர்த்தினர்.
இதில் சோஃபி டிவைன் 35 ரன்னிலும், புரூக் ஹாலிடே 47 ரன்னிலும் ஆட்டமிழந்து அரைசதம் அடிக்கும் வாய்ப்பை தவறவிட்ட நிலையில், அடுத்து களமிறங்கிய வீராங்கனைகளில் அலானா கிங் 29 ரன்களைச் சேர்த்ததை தவிர்த்து மற்ற வீராங்கனைகள் சொற்ப ரன்களுக்கு விக்கெட்டை இழந்தனர். இதனால் அந்த அணி 20 ஓவர்கள் முடிவில் 8 விக்கெட்டுகளை இழந்து 139 ரன்களை மட்டுமே எடுத்தது. இதன்மூலம் அடிலெய்ட் அணி 30 ரன்கள் வித்தியாசத்தில் பெர்த் அணியை வீழ்த்தி வெற்றிபெற்றது.
Also Read: Funding To Save Test Cricket
இந்நிலையில் இப்போட்டியில் அடிலெய்ட் ஸ்டிரைக்கர்ஸ் அணியின் நட்சத்திர வீராங்கனை ஸ்மிருதி மந்தனா பிடித்த அபாரமான கேச்ட் குறித்த காணொளி இணையத்தில் வைரலாகி வருகிறது. அதன்படி பெர்த் அணி வீராங்கனை கார்லி லீசன் பவுண்டரி அடிக்கும் முயற்சியில் கவர் திசையை நோக்கி அடித்த நிலையில் அத்திசையில் ஃபீல்டிங் செய்து வந்த ஸ்மிருதி மந்தனா அபாரமான டைவின் மூலம் கேட்ச் பிடித்தார். இந்நிலையில் ஸ்மிருதி மந்தனாவின் கேட்ச்சானது ரசிகர்களின் கவனத்தை ஈர்த்துள்ளதுடன், பாராட்டுகளையும் பெற்று வருகிறது.