WCWC 2025: லாரா வோல்வார்ட் தலைமையில் தென் ஆப்பிரிக்க அணி அறிவிப்பு!

South Africa Womens Squad: ஐசிசி மகளிர் ஒருநாள் உலகக்கோப்பை தொடருக்கான தென் ஆப்பிரிக்க அணியை அந்நாட்டு கிரிக்கெட் வாரியம் அறிவித்துள்ள நிலையில், அணியின் கேப்டனாக லாரா வோல்வார்ட் நியமிக்கப்பட்டுள்ளார். 

ஐசிசி மகளிர் ஒருநாள் உலகக்கோப்பை தொடரின் 13ஆவது பதிப்பானது இந்தாண்டு செப்டம்பர் 30ஆம் தேதி முதல் கோலாகலமாக நடைபெறவுள்ளது. மொத்தம் 8 அணிகள் பங்கேற்கும் இத்தொடரை இந்திய கிரிக்கெட் கட்டுப்பாட்டு வாரியம் நடத்தவுள்ளது. முன்னதாக இத்தொடரின் அனைத்து போட்டிகளும் இந்தியாவில் மட்டுமே நடைபெறும் என அறிவிக்கப்பட்டிருந்த நிலையில், பாகிஸ்தானில் நடைபெற்ற சாம்பியன்ஸ் கோப்பை தொடரில் இந்திய அணி பங்கேற்காகது, இந்திய-பாகிஸ்தான் எல்லை பதற்றம் உள்ளிட்ட காரணங்களினால் பாகிஸ்தான் அணி இந்தியாவில் விளையாட மறுப்பு தெரிவித்தது.

இதன் காரணமாக பாகிஸ்தான் அணி விளையாடும் போட்டிகள் மட்டும் பொதுவான இடத்தில் நடத்தவும் கோரிக்கை விடுக்கப்பட்டிருந்தது. அந்த வகையில் தற்சமயம் ஐசிசி மகளிர் உலகக்கோப்பை தொடருக்கான மைதானங்களை சமீபத்தில் அறிவித்தது. இதில் பாகிஸ்தான் மகளிர் அணி விளையாடும் போட்டிகள் மட்டும் கொழும்புவில் உள்ள ஆர்.பிரேமதாச கிரிக்கெட் மைதானத்தில் நடைபெறும் என்று அறிவிக்கப்பட்டுள்ளது. இதனையடுத்து இந்த தொடருக்காக அனைத்து அணிகளும் தீவிரமாக தயாராகி வருகின்றனர். மேலும் ஒவ்வொரு அணியும் அறிவிக்கப்பட்டு வருகின்றன. 

அந்தவகையில் உலகக்கோப்பை தொடருக்கான தென் ஆப்பிரிக்க மகளிர் அணியும் இன்று அறிவிக்கப்பட்டுள்ளது. 15 பேர் அடங்கிய இந்த அணியின் கேப்டனாக லாரா வோல்வார்ட் நியமிக்கப்பட்டுள்ளார். இதன்மூலம், வோல்வார்ட் முதல் முறையாக தென் ஆப்பிரிக்க அணியை உலகக்கோப்பை தொடரில் வழிநடத்தவுள்ளார். மேற்கொண்டு இந்த அணியில் மரிஸான் கேப், தஸ்மின் பிரிட்ஸ், சுனே லூஸ், அன்னேரி டெர்க்சன், மசபாட்டா கிளாஸ் ஆகியோரும் அணியில் சேர்க்கப்பட்டுள்ளனர். இருப்பினும் ஓய்வு முடிவை திரும்ப பெற்ற அந்த அணியின் முன்னாள் கேப்டன் டேன் வான் நீகெர்க் இந்த உலகக்கோப்பை தொடருக்கான அணியில் இடம்பிடிக்கவில்லை.

Also Read: LIVE Cricket Score

தென்னாப்பிரிக்க மகளிர் அணி: லாரா வோல்வர்ட் (கேப்டன்), அயபோங்கா காக்கா, சோலே டிரையான், நதின் டி கிளர்க், மாரிசேன் கேப், தஸ்மின் பிரிட்ஸ், சினோலா ஜாஃப்டா, நான்குலுலேகோ மிலாபா, அன்னேரி டெர்க்சன், அன்னேகே போஷ், மஸபட்டா கிளாஸ், சூனே லூஸ், கராபோ மெசோ, துமி சேகுகுனே, நோண்டுமிசோ ஷங்கசே..