இலங்கை - ஆஸ்திரேலிய அணிகளுக்கு இடையேயான இரண்டாவது டெஸ்ட் போட்டி கலே கிரிக்கெட் மைதானத்தில் நடைபெற்று வருகிறது. இப்போட்டியில் டாஸை இழந்து முதலில் பேட்டிங் செய்த இலங்கை அணி முதல் இன்னிங்ஸில் 257 ரன்களைச் சேர்த்தது. அந்த அணியில் அதிகபட்சமாக குசால் மெண்டிஸ் 85 ரன்களையும், தினேஷ் சண்டிமால் 74 ரன்களையும் சேர்த்தனர். ஆஸ்திரேலிய தரப்பில் ஸ்டார்க், லையன், குஹ்னெமன் ஆகியோர் 3 விக்கெட்டுகளை கைப்பற்றினர்.
இதையடுத்து முதல் இன்னிங்ஸைத் தொடங்கிய ஆஸ்திரேலிய அணியில் டிராவிஸ் ஹெட் 21 ரன்களுக்கும், மார்னஸ் லபுஷாக்னே 4 ரன்களுக்கும், உஸ்மான் கவாஜா 36 ரன்களுக்கும் என விக்கெட்டை இழந்தனர். அதன்பின் ஜோடி சேர்ந்த கேப்டன் ஸ்டீவ் ஸ்மித் மற்றும் அலெக்ஸ் கேரி இருவரும் சதமடித்து அசத்த, இரண்டாம் நாள் ஆட்டநேர முடிவில் ஆஸ்திரேலிய அணியானது 3 விக்கெட் இழப்பிற்கு 330 ரன்களைச் சேர்த்தது.
இந்நிலையில் இன்று தொடங்கிய மூன்றாம் நாள் ஆட்டத்தில் ஸ்டீவ் ஸ்மித் 131 ரன்களைச் சேர்த்திருந்த நிலையில் விக்கெட்டை இழந்தனர். அதேசமயம் அவருடன் இணைந்து சிரப்பான ஆட்டத்தை வெளிப்படுத்தி வந்த அலெக்ஸ் கேரியும் 156 ரன்களைச் சேர்த்து விக்கெட்டை இழந்தார். இதில் இருவரும் இணைந்து 4ஆவது விக்கெட்டிற்கு 240 ரன்கள் பார்ட்னர்ஷிப் அமைத்தும் அசத்தினர். இதன்மூலம் அவர் புதிய சாதனை ஒன்றையும் படைத்து அசத்தியுள்ளார்.
அந்தவகையில் இப்போட்டியில் அவர் அலெக்ஸ் கேரியுடன் இணைந்து 200 ரன்கள் பார்ட்னர்ஷிப் அமைத்ததன் மூலம், 147 ஆண்டுகால டெஸ்ட் கிரிக்கெட் வரலாற்றில் 11 வெவ்வேறு பேட்ஸ்மேன்களுடன் 200 அல்லது அதற்கு மேற்பட்ட ரன்களை பார்ட்னர்ஷிப் செய்த முதல் வீரர் என்ற சாதனையை ஸ்டீவ் ஸ்மித் படைத்துள்ளார். மேற்கொண்டு இந்த பட்டியலில் அவர் ஆஸ்திரேலிய அணியின் முன்னாள் கேப்டன் ரிக்கி பாண்டிங்கின் சாதனையையும் முறியடித்துள்ளார்.
இதற்கு முன் மைக்கேல் கிளார்க், ஷான் மார்ஷ், கிறிஸ் ரோஜர்ஸ், ஆடம் வோகஸ், ஜோ பர்ன்ஸ், மிட்செல் மார்ஷ், மார்னஸ் லாபுஷாக்னே, டேவிட் வார்னர், உஸ்மான் கவாஜா, டிராவிஸ் ஹெட் மற்றும் அலெக்ஸ் கேரி ஆகியோருடன் ஸ்டீவ் ஸ்மித் டெஸ்ட் கிரிக்கெட்டின் ஒரு இன்னிங்ஸில் 200 அல்லது அதற்கு மேற்பட்ட ரன்களை பார்ட்னர்ஷிப் முறையில் எடுத்துள்ளார். இதற்கு முன் ரிக்கி பாண்டிங் 10 வீரர்களுடன் 200 ரன்கள் பார்ட்னர்ஷிப் அமைத்ததே சாதனையாக இருந்தது குறிப்பிடத்தக்கது.
Also Read: Funding To Save Test Cricket
முன்னதாக இப்போட்டியில் ஸ்டீவ் ஸ்மித் சதமடித்து அசத்தியதன் மூலம் சர்வதேச டெஸ்ட் கிரிக்கெட்டில் தனது 36ஆவது சதத்தைப் பதிவுசெய்து அசத்தினார். இதன்முலம் சர்வதேச டெஸ்ட் கிரிக்கெட்டில் அதிக சதங்களை அடித்த வீரர்கள் வரிசையில் இந்திய அணியின் ராகுல் டிராவிட், இங்கிலாந்தின் ஜோரூட் ஆகியோருடன் 5ஆவது இடத்தை பகிர்ந்துள்ளார் என்பது குறிப்பிடத்தக்கது.