டி10 கிரிக்கெட் லீக் தொடரில் நேற்று நடைபெற்ற 14ஆவது லீக் ஆட்டத்தில் சென்னை பிரேவ்ஸ் - நார்த்தன் வாரியர்ஸ் அணிகள் பலப்பரீட்சை நடத்தின.
இப்போட்டியில் முதலில் பேட்டிங் செய்த நார்த்தன் வாரியர்ஸ் அணி மொயீன் அலி, கென்னர் லூயிஸ் ஆகியோரது அதிரடியான தொடக்கத்தினால் 10 ஓவர்கள் முடிவில் 4 விக்கெட்டுகளை இழந்து 152 ரன்களைச் சேர்த்தது.
இதில் அதிகபட்சமாக மொயின் அலி, கென்னர் லூயிஸ் இருவரும் தலா 49 ரன்களைச் சேர்த்து நூழிலையில் அரைசதத்தை தவறவிட்டனர்.
இதையடுத்து கடின இலக்கைத் துரத்திய சென்னை பிரேவ்ஸ் அணி வீரர்கள் வழக்கம் போல் எதிரணி பந்துவீச்சுக்கு ஈடுகொடுக்க முடியாமல் தடுமாறினர். அந்த அணியில் பனுகா ராஜபக்ஷ 34 ரன்களையும், ரவி போபாரா 30 ரன்களையும் சேர்த்து ஆட்டமிழந்தனர்.
இதனால் 9.5 ஓவர்களிலேயே சென்னை அணி அனைத்து விக்கெட்டுகளையும் இழந்து 133 ரன்களை மட்டுமே எடுத்தது. இதன் மூலம் நார்த்தன் வாரியர்ஸ் அணி 19 ரன்கள் வித்தியாசத்தில் சென்னை பிரேவ்ஸ் அணியை வீழ்த்தி முதல் வெற்றியைப் பதிவுசெய்தது.