ஆஸ்திரேலிய பந்துவீச்சாளர்களை பந்தாடிய மெக்முல்லன் - வைரலாகும் காணொளி!
ஆஸ்திரேலியா - ஸ்காட்லாந்து அணிகளுக்கு இடையேயான ஐசிசி டி20 உலகக்கோப்பை லீக் போட்டி செயின்ட் லூசியாவில் உள்ள டேரன் சமி தேசிய கிரிக்கெட் மைதானத்தில் இன்று நடைபெற்றது. இப்போட்டியில் டாஸ் வென்ற ஆஸ்திரேலிய அணியானது முதலில் பந்துவீசுவதாக அறிவித்தது. அதன்படி களமிறங்கிய ஸ்காட்லாந்து அணிக்கு ஜார்ஜ் முன்ஸி - மைக்கேல் ஜோன்ஸ் இணை தொடக்கம் கொடுத்தனர்.
இதில் மைக்கேல் ஜோன்ஸ் 2 ரன்களுடன் பெவிலியன் திரும்ப, அடுத்து இணைந்த முன்ஸி - மெக்முல்லன் கூட்டணியானது அபாரமான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இப்போட்டியில் சிறப்பான ஆட்டத்தை வெளிப்படுத்திய பிராண்டன் மெக்முல்லன் தனது அரைசதத்தையும் பதிவுசெய்து மிரட்டினார். அதேசமயம் மறுபக்கம் அரைசதம் அடிப்பார் என எதிர்பார்க்கப்பட்ட முன்ஸி 35 ரன்களுக்கு விக்கெட்டை இழந்தார்.
அதன்பின் மெக்முல்லன் 60 ரன்களுக்கும், மேத்யூஸ் கிராஸ் 18 ரன்களுக்கும் என விக்கெட்டை இழக்க, இறுதிவரை ஆட்டமிழக்காமல் இருந்த ரிச்சி பெர்ரிங்டன் 42 ரன்களைச் சேர்த்து ஃபினிஷிங்கைக் கொடுத்தார். இதன்மூலம் 20 ஓவர்கள் முடிவில் ஸ்காட்லாந்து அணியானது 5 விக்கெட் இழப்பிற்கு 180 ரன்களைச் சேர்த்தது. ஆஸ்திரேலிய அணி தரப்பில் கிளென் மேக்ஸ்வெல் 2 விக்கெட்டுகளையும், மிட்செல் ஸ்டார்க், ஆடம் ஸாம்பா மற்றும் நாதன் எல்லிஸ் ஆகியோர் தலா ஒரு விக்கெட்டையும் கைப்பற்றி அசத்தினர்.
இந்நிலையில் இப்போட்டியில் அசத்தலான ஆட்டத்தை வெளிப்படுத்திய பிராண்ட மெக்முல்லன் 34 பந்துகளில் 2 பவுண்டரி, 6 சிக்ஸர்கள் என 60 ரன்களைச் சேர்த்தார். அதிலும் குறிப்பாக அவர் அடித்த அனைத்து சிக்ஸர்களும் ரசிகர்களை கவரும் வகையில் அமைந்திருந்தது. இந்நிலையில் ஆஸ்திரேலிய பந்துவீச்சுக்கு எதிராக பிராண்டன் மெக்முல்லன் அடித்த சிக்ஸர் குறித்த காணொளியானது இணையத்தில் வைரலாகி வருகிறது.