விட்டதை பிடித்த ஹசன் மஹ்முத்; அதிர்ச்சியில் ரோஹித் - வைரல் காணொளி!
எட்டாவது சீசன் டி20 உலகக்கோப்பை தொடர் ஆஸ்திரேலியாவில் விறுவிறுப்பாக நடைபெற்று வருகிறது. இதில் இன்று அடிலெய்டில் நடைபெற்றுவரும் சூப்பர் 12 ஆட்டத்தில் இந்தியா - வங்கதேச அணிகள் பலப்பரீட்சை நடத்தி வருகின்றன.
இந்திய அணி இதுவரை விளையாடிய 3 ஆட்டங்களில் 2இல் வெற்றி பெற்று 4 புள்ளிகளுடன் 2அம் இடத்தில் உள்ளது. இந்த ஆட்டத்தில் வெற்றி பெற்றால் முதல் இடத்துக்கு முன்னேறிவிடும். வங்கதேச அணியும், 3 ஆட்டங்களில் 2 வெற்றி, ஒரு தோல்வி என 4 புள்ளிகளுடன் 3ஆம் இடத்தில் உள்ளது.
இப்போட்டியில் டாஸ் வென்ற வங்கதேச கேப்டன் ஷாகிப் அல் ஹசன் ஃபீல்டிங்கைத் தேர்வு செய்தார். வங்கதேச அணியில் செளமியா சர்காருக்குப் பதிலாக ஷொரிஃபுல் இஸ்லாம் விளையாடுகிறார். இந்திய அணியில் தீபக் ஹூடாவுக்குப் பதிலாக அக்ஷர் படேல் இடம்பெற்றுள்ளார்.
இதையடுத்து களமிறங்கிய இந்திய அணியின் தொடக்க வீரர்களாக ரோஹித் சர்மா - கேஎல் ராகுல் ஆகியோர் வங்கதேச அணியின் முதல் சில ஓவர்களில் ரன் அடிக்க தடுமாறினர். அதிலும் அந்த அணியின் டஸ்கின் அஹ்மதுவின் பந்துவீச்சை சமாளிக்க இருவரும் திணறினர்.
இதில் டஸ்கின் அஹ்மது வீசிய இன்னிங்ஸின் மூன்றாவது ஓவரில் ரோஹித் சர்மா சிக்சர் விளாச முற்பட்டு தூக்கி அடித்தார். ஆனால் அவர் எதிர்பார்த்த அளவு பந்த் பேட்டில் படாததால், தேர்ட்மேன் திசையிலிருந்த ஹசன் மஹ்முதை நோக்கி சென்றது. எப்படியும் அவர் பந்தை பிடித்துவிடுவார் என எதிர்பார்க்கப்பட்ட நிலையில், அவர் அந்த எளிய கேட்சை தவறவிட்டார்.
இதனால் தனக்கு கிடைத்த அருமையான வாய்ப்பை பயன்படுத்தி ரோஹித் சர்மா இன்றைய போட்டியில் மிரட்டுவார் என எதிர்பார்க்கப்பட்டது. ஆனால், ஆட்டத்தின் நான்காவது ஓவரை வீசிய ஹசன் மஹ்முத் தனது இரண்டாவது பந்திலேயே ரோஹித் சர்மாவை வீழ்த்தி, தனது தவறை தானே சரிசெய்தார்.
இதனால் வெறும் இரண்டு ரன்களை மட்டுமே எடுத்திருந்த ரோஹித் சர்மா, இப்போட்டியிலும் சீக்கிரம் ஆட்டமிழந்து ரசிகர்களுக்கு ஏமாற்றமளித்தார். இதற்கிடையில் ரோஹித் சர்மா ஆட்டமிழந்த காணொளி இணையத்தில் வைரலாகி வருகிறது.