ஐசிசி டி20 உலகக்கோப்பை 2024: டேவிட் வைஸ் அசத்தல்; சூப்பர் ஓவரில் ஓமனை வீழ்த்தியது நமீபியா!

ஐசிசி ஆடவர் டி20 உலகக்கோப்பை தொடரின் லீக் போட்டிகள் விறுவிறுப்பாக நடைபெற்று வருகின்றன. இதில் இன்று நடைபெற்ற மூன்றாவது லீக் போட்டியில் குரூப் பி பிரிவில் இடம்பிடித்துள்ள நமீபியா மற்றும் ஓமன் அணிகள் பலப்பரீட்சை நடத்தின. பார்படாஸில் உள்ள கெனிங்ஸ்டன் ஓவல் மைதானத்தில் நடைபெற்ற இப்போட்டியில் டாஸ் வென்ற நமீபியா அணியானது முதலில் பந்துவீச முடிவுசெய்து ஓமன் அணியை பேட்டிங் செய்ய அழைத்தது. அதன்படி களமிறங்கிய ஓமன் அணிக்கு காஷ்யப் பிரஜபதி மற்றும் நசீம் குஷி இணை தொடக்கம் கொடுத்தனர். 

இதில் காஷ்யப் பிரஜபதி மற்றும் மூன்றாம் இடத்தில் களமிறங்கிய கேப்டன் அகில் இலியாஸ் ஆகியோர் ரூபன் டிரம்பெல்மேன் பந்துவீச்சில் இன்னிங்ஸின் முதலிரண்டு பந்துகளிலேயே அடுத்தடுத்து விக்கெட்டுகளை இழந்து பெவிலியனுக்கு நடையைக் கட்டி அதிர்ச்சியளித்தனர். அதன்பின் மற்றொரு தொடக்க வீரரான நசீம் குஷியும் 6 ரன்களில் டிரம்பெல்மேனின் பந்துவீச்சிலேயே விக்கெட்டை இழந்தார். இதனால் ஓமன் அணி 10 ரன்களில் 3 விக்கெட்டுகளை இழந்து தடுமாறியது. பின்னர் இணைந்த ஸீசான் மக்சூத் - கலித் கைல் இணை ஓரளவு தாக்குப்பிடித்து அணியின் ஸ்கோரை உயர்த்தும் முயற்சியில் இறங்கினர். 

பின் 22 ரன்களில் ஸீசான் மக்சூத் ஆட்டமிழக்க, அடுத்து களமிறங்கிய அயான் கான் 15 ரன்களுக்கும், முகமது நதீம் 6 ரன்களுக்கும் என அடுத்தடுத்து விக்கெட்டுகளை இழந்தனர். அவர்களைத் தொடர்ந்து மறுபக்கம் நிதான ஆட்டத்தை வெளிப்படுத்தி வந்த கலித் கைல் ஒரு பவுண்டரி, ஒரு சிக்ஸர் உள்பட 34 ரன்கள் சேர்த்திருந்த நிலையில் ஆட்டமிழந்து பெவிலியனுக்கு நடையைக் கட்டினார். இதனைத்தொடர்ந்து களமிறங்கிய மெஹ்ரான் கான், கலீமுல்லா, பிலால் கான் உள்ளிட்ட வீரர்களும் அடுத்தடுத்து சொற்ப ரன்களில் ஆட்டமிழந்து பெவிலுயனுக்கு திரும்பினார். 

இதன் காரணமாக ஓமன் அணியானது 19.4 ஓவர்கள் முடிவில் அனைத்து விக்கெட்டுகளையும் இழந்து 109 ரன்களுக்கு ஆல் அவுட்டானது. ஓமன் அணி தரப்பில் அபாரமான பந்துவீசிய ரூபன் டிரம்பெல்மேன் 4 விக்கெட்டுகளையும், டேவிட் வைஸ் 3 விக்கெட்டுகளையும், கேப்டன் ஜெராட் எராஸ்மஸ் 2 விக்கெட்டுகளையும் கைப்பற்றி அசத்தினர். இதனைத்தொடர்ந்து 110 ரன்கள் என்ற எளிய இலக்கை நோக்கி களமிறங்கிய நமீபியா அணிக்கு ஆரம்பத்திலேயே அதிர்ச்சியளிக்கும் வகையில் தொடக்க வீரர் மைக்கேல் வான் லின்கன் ரன்கள் ஏதுமின்றி இன்னிங்ஸின் இரண்டாவது பந்திலேயே விக்கெட்டை இழந்தார். 

பின்னர் இணைந்த நிகோலஸ் டேவின் - ஜான் ஃபிரைலிங்க் இணை பொறுப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். இருவரும் இணைந்து 42 ரன்கள் பார்ட்னர்ஷிப் அமைத்த நிலையில் நிக்கோலஸ் டேவின் 24 ரன்களில் ஆட்டமிழந்து பெவிலியன் திரும்ப, அடுத்து களமிறங்கிய கேப்டன் ஜெர்ஹார்ட் எராஸ்மஸும் 13 ரன்களிலும் ஜேஜே ஸ்மித் 8 ரன்களுக்கும் என விக்கெட்டை இழந்து ஏமாற்றமளித்தார். இதனால் நமீபியா அணி 96 ரன்களில் நான்காவது விக்கெட்டை இழந்ததுடன், கடைசி இரண்டு ஓவர்களில் 14 ரன்கள் அடிக்க வேண்டும் என்ற அழுத்தமான சூழ்நிலைக்கும் தள்ளப்பட்டது. 

அதன்பின் இன்னிங்ஸின் 19ஆவது ஓவரை எதிர்கொண்ட டேவிட் வைஸ், சிக்ஸர் அடித்து அசத்த கடைசி ஓவரில் நமீபிய அணிக்கு 5 ரன்கள் தேவை என்ற நிலை ஏற்பட்டது. ஓமன் தரப்பில் இன்னிங்ஸின் கடைசி ஓவரை மெஹ்ரான் கான் வீச, அந்த ஓவரின் முதல் பந்திலேயே 45 ரன்களைச் சேர்த்திருந்த ஜான் ஃபிரைலிங்க் விக்கெட்டை இழந்து அதிர்ச்சியளிக்க, அடுத்து களமிறங்கிய ஸனே க்ரீனும் ரன்கள் ஏதுமின்றி விக்கெட்டை இழந்து ஆட்டத்தின் மீதான அழுத்தத்தை அதிகரித்தார். அதன்பின் களத்தில் இருந்த டேவிட் வைஸ் கடைசி பந்தில் 2 ரன்கள் தேவை என்ற நிலையில் ஒரு ரன்னை மட்டுமே எடுத்து ஸ்கோரை சமன்செய்தார்.

இதன்மூலம் இப்போட்டியானது சூப்பர் ஓவருக்கு சென்றது. இதையடுத்து சூப்பர் ஓவரில் முதலில் பேட்டிங் செய்த நமீபியா அணிக்கு டேவிட் வைஸ் - ஜெர்ஹார்ட் எராஸ்மஸ் களமிறங்கினர். ஓமன் தர்பபில் சூப்பர் ஓவரை பிலால் கான் வீச, அந்த ஓவரின் முதல் இரண்டு பந்துகளிலும் டேவிட் வைஸ் பவுண்டரி சிக்ஸரை பறக்கவிட்டதுடன் 4 பந்துகளில் 13 ரன்களைச் சேர்க்க, அதன்பின் கடைசி இரண்டு பந்துகளை எதிர்கொண்ட எராஸ்மஸும் அடுத்தடுத்து பவுண்டரிகளை விளாசி 8 ரன்களைச் சேர்த்தார். இதன்மூலம் நமீபியா அணி சூப்பர் ஓவரில் 21 ரன்களைச் சேர்த்தது.

இதையடுத்து சூப்பர் ஓவரில் 22 ரன்கள் எடுத்தால் வெற்றி என்ற இலக்கை நோக்கி விளையாடிய ஓமன் அணிக்கு நசீம் குஷீ - ஸீசான் மக்சூத் இணை களமிறங்க, நமீபியா தரப்பில் டேவிட் வைஸ் சூப்பர் ஓவரை வீசினார். அந்த ஓவரில் நசீம் குஷியின் விக்கெட்டை வீழ்த்தியதுடன் அந்த ஓவரில் 10 ரன்களை மட்டுமே கொடுத்து டேவிட் வைஸ் வெற்றியைத்தேடிக்கொடுத்தார். இதன்மூலம் நமீபியா அணி சூப்பர் ஓவரில் 11 ரன்கள் வித்தியாசத்தில் ஓமன் அணியை வீழ்த்தி த்ரில் வெற்றியைப் பதிவுசெய்ததுடன், நடப்பு டி20 உலகக்கோப்பை தொடரையும் வெற்றியுடன் தொடங்கியுள்ளது.