டி20 உலகக்கோப்பை: தோனி இல்லாமல் முதல் முறையாக நாக் அவுட் சுற்றில் விளையாடும் இந்திய அணி!

ஆஸ்திரேலியாவில் நடந்து வரும் 8ஆவது உலகக் கோப்பை கிரிக்கெட் தொடர் இறுதி கட்டத்தை எட்டியுள்ளது. இதில் சிட்னி கிரிக்கெட் மைதானத்தில் நேற்று நடைபெற்ற முதல் அரையிறுதி போட்டியில் நியூசிலாந்து அணியை 7 விக்கெட்டுகள் வித்தியாசத்தில் வீழ்த்தி பாகிஸ்தான் முதல் அணியாக இறுதி போட்டிக்கு தகுதி பெற்றுள்ளது.

நாளை அடிலெய்ட்டில் நடைபெறும் 2ஆவது அரையிறுதி போட்டியில் இந்தியா-இங்கிலாந்து அணிகள் மோதுகிறது. இதில் வெற்றி பெறும் அணி வரும் 13ஆம் தேதி மெல்போர்னில் நடைபெறும் இறுதிப்போட்டியில் பாகிஸ்தான் அணியை எதிர்கொள்கிறது.

இந்த நிலையில் கடந்த 19 வருடங்களில் இந்திய அணி முன்னாள் கேப்டனான மகேந்திர சிங் தோனி இல்லாமல் நாக் அவுட் எனப்படும் வெளியேற்றுதல் சுற்றுக்கு தகுதி பெற்றுள்ளது இதுவே முதல் முறையாகும். தோனி அணியில் சேர்வதற்கு முன்னதாக கடந்த 2003ஆம் ஆண்டு சவுரவ் கங்குலி தலைமையில் இந்திய அணி ஒருநாள் உலகக்கோப்பை தொடரின் இறுதிப்போட்டிக்கு முன்னேறியிருந்தது. 

ஆதன்பின் 2007 ஆம் ஆண்டிலிருந்து 2019 ஆம் ஆண்டு நடைபெற்ற அனைத்து உலக கோப்பை தொடர்களிலும் தோனி பங்கேற்றார். பின்னர் கடந்த 2020 ஆம் ஆண்டு சர்வதேச கிரிக்கெட்டில் இருந்து தோனி ஓய்வு பெற்றார்.

இதன் பின்னர், இந்திய அணி ஐசிசி உலகக் கோப்பை தொடரின் நாக் அவுட் போட்டிக்கு முன்னேறவில்லை. கடந்த ஆண்டு நடைபெற்ற 2021ஆம் ஆண்டு டி20 உலகக்கோப்பையில் கூட நாக் அவுட் சுற்றுக்கு முன்னேறாமல் வெளியேறியது. 

இந்த நிலையில் ரோகித் சர்மா தலைமையிலான இந்திய கிரிக்கெட் அணி டி20 உலகக்கோப்பையில் தற்போது அரை இறுதி சுற்றுக்கு முன்னேறி உள்ளதால் கடந்த 19 வருடங்களில் தோனி இல்லாமல் இந்திய அணி விளையாடும் முதல் ஐசிசி உலகக் கோப்பை நாக் அவுட் போட்டியாக இது மாறி உள்ளது.

இந்த தொடரில் இந்திய அணி இதுவரை சிறப்பாக செயல்பட்டு வருகிறது. இதனால் நாளைய போட்டியில் இந்திய அணி வெற்றி பெறுமா என ரசிகர்கள் ஆவலுடன் எதிர்பார்த்து காத்திருக்கின்றனர்.