இம்மாத தொடக்கத்தில் இங்கிலாந்துக்கு எதிராக நடைபெற்ற 4ஆவது ஒருநாள் போட்டியின்போது நியூசிலாந்து அணியின் நட்சத்திர வீரர் டிம் சௌதீக்கு காயம் ஏற்பட்டது. அவர் ஃபீல்டிங் செய்துகொண்டிருக்கும்போது கேட்ச் பிடிக்க முயற்சித்து வலது கை கட்டை விரலில் எலும்பு முறிவு ஏற்பட்டது. இதனால் அவர் இந்தியாவில் நடைபெறும் உலகக் கோப்பையில் கலந்து கொள்வாரா என்ற சந்தேகம் எழுந்தது.
இந்த நிலையில், காயத்திலிருந்து குணமடைந்து வருவதால் உலகக் கோப்பைக்கான நியூசிலாந்து அணியுடன் அந்த அணியின் வேகப் பந்துவீச்சாளர் டிம் சௌதீ இணைய உள்ளதாக அந்நாட்டு கிரிக்கெட் வாரியம் தெரிவித்துள்ளது.
இதுகுறித்து நியூசிலாந்து அணி வெளியிட்டுள்ள அறிவிப்பில், “வலது கை கட்டை விரல் காயத்திலிருந்து டிம் சௌதீ குணமடைந்து வருவதால் அவர் நியூசிலாந்து அணியுடன் இந்தவார இறுதியில் இணையவுள்ளார். அவருக்கு எலும்பு முறிவு ஏற்பட்டதால் அதற்கான அறுவை சிகிச்சை மேற்கொள்ளப்பட்டுள்ளது. அவருடன் நியூசிலாந்து அணியுடன் வேகப் பந்துவீச்சாளர் கைல் ஜேமிசனும் இணையவுள்ளார்” எனத் தெரிவிக்கப்பட்டுள்ளது.
உலகக் கோப்பைத் தொடரின் முதன்மையான போட்டிக்கு முன்னதாக நியூசிலாந்து அணி பாகிஸ்தான் மற்றும் தென் ஆப்பிரிக்க அணிகளுக்கு எதிராக இரண்டு பயிற்சி ஆட்டங்களில் விளையாடவுள்ளது. அதனைத்தொடர்ந்து அக்டோபர் 5ஆம் தேதி தொடங்கும் முதல் போட்டியில் நடப்பு சாம்பியன் இங்கிலாந்து அணியை எதிர்த்து நியூசிலாந்து விளையாடவுள்ளது குறிப்பிடத்தக்கது.