புரூக், லிவிங்ஸ்டோனை க்ளீன் போல்டாக்கிய வருண் சக்ரவர்த்தி - காணொளி!

இந்தியா மற்றும் இங்கிலாந்து அணிகளுக்கு இடையேயான முதல் டி20 போட்டி கொல்கத்தாவில் உள்ள ஈடன் கார்டன் மைதானத்தில் இன்று தொடங்கி நடைபெற்று வருகிறது. இதில் டாஸ் வென்ற இந்திய அணி கேப்டன் சூர்யகுமார் யாதவ் பந்து வீச்சை தேர்வு செய்தார். அதன்படி களமிறங்கிய இங்கிலாந்து அணியில் தொடக்க வீரர்கள் பில் சால்ட் மற்றும் பென் டக்கெட் ஆகியோர் சொற்ப ரன்களுக்கு விக்கெட்டை இழந்து ஏமாற்றமளித்தனர். 

அதன்பின் களமிறங்கிய கேப்டன் ஜோஸ் பட்லர் அரைசதம் கடந்ததுடன் 8 பவுண்டரி, 2 சிக்ஸர்கள் என 68 ரன்களைச் சேர்த்ததை தவிர்த்து மற்ற வீரர்கள் சொற்ப ரன்களில் ஆட்டமிழந்தனர். இதனால் இங்கிலாந்து அணி 20 ஓவர்கள் முடிவில் அனைத்து விக்கெட்டுகளையும் இழந்து 132 ரன்களுக்கு ஆல் அவுட்டானது. இந்திய அணி சார்பில் அர்ஷ்தீப் சிங், ஹர்திக் பாண்ட்யா, அக்சார் படேல் தலா 2 விக்கெட்டும், வருண் சக்ரவர்த்தி 3 விக்கெட்டும் வீழ்த்தினர்.

இதனையடுத்து 133 ரன்கள் எடுத்தால் வெற்றி என்ற இலக்குடன் களமிறங்கிய இந்திய அணிக்கு சஞ்சு சாம்சன் அதிரடியான தொடக்கத்தை வழங்கி 26 ரன்களைச் சேர்த்து விக்கெட்டை இழக்க, அடுத்து களமிறங்கிய கேப்டன் சூர்யகுமார் யாதவ் ரன்கள் ஏதுமின்றி விக்கெட்டை இழந்தார். பின்னர் மற்றொரு தொடக்க வீரரான் அபிஷேக் சர்மா அடுத்தடுத்து சிக்ஸர்களை விளாசியதுடன் 20 பந்துகளில் அரைசதம் கடந்து அணியின் வெற்றியை உறுதிசெய்தார். 

அதன்பின் அபிஷேக் சர்மா 5 பவுண்டரிகள், 8 சிக்ஸர்கள் என 79 ரன்களைச் சேர்த்த நிலையில் விக்கெட்டை இழக்க, திலக் வர்மா 19 ரன்களை எடுத்து அணிக்கு வெற்றியைத் தேடிக்கொடுத்தார். இதன்மூலம் இந்திய அணி 12.5 ஓவர்களிலேயே வெற்றியை இலக்கை எட்டியதுடன் 7 விக்கெட் வித்தியாசத்தில் இங்கிலாந்து அணியை வீழ்த்தி அபார வெற்றியையும் பதிவுசெய்து அசத்தியது. இந்த வெற்றியின் மூலம் இந்திய அணி 1-0 என்ற கணக்கில் இந்த டி20 தொடரில் முன்னிலையும் பெற்றுபெற்றுள்ளது. 

Also Read: Funding To Save Test Cricket

இப்போட்டியில் சிறப்பான பந்துவீச்சை வெளிப்படுத்திய வருண் சக்ரவர்த்தி ஆட்டநாயகன் விருதை வென்றார். இந்நிலையில் இப்போட்டியில் வருண் சக்ரவர்த்தி தனது ஒரே ஓவரில் இங்கிலாந்து அணியின் நட்சத்திர வீரர்கள் ஹாரி புரூக் மற்றும் லியாம் லிவிங்ஸ்டோன் ஆகியோரை அடுத்தடுத்து க்ளீன் போல்டாக்கி வெளியேற்றினார். தற்போது வருண் சக்ரவர்த்தி விக்கெட்டுகளை வீழ்த்தி காணொளியானது இணையத்தில் வைரலாகி வருகிறது.