ஆசியக் கோப்பையில் என்னால் நிச்சயம் சிறப்பாக விளையாட முடியும் - விராட் கோலி!

2018ஆம் ஆண்டிற்குப் பிறகு ஆசியக் கோப்பை தொடர் வரும் ஆகஸ்ட் 27ஆம் தேதி தொடங்கி நடைபெறவுள்ளது. இந்திய அணி ஐபிஎல் 15ஆவது சீசனுக்குப் பிறகு அட்டகாசமாக விளையாடி வருவதால், ஆசியக் கோப்பையிலும் கெத்துக்காட்டும் என எதிர்பார்க்கப்பட்டது. 

இந்நிலையில் பும்ரா காயம் காரணமாக விலகியுள்ளதால், வேறு வழியில்லாமல் ஆவேஷ் கான் சேர்க்கப்பட்டார். இவர் ஜிம்பாப்வேக்கு எதிராக படுமோசமாக சொதப்பி ஷாக் கொடுத்தார். அதேபோல் கடந்த பிப்ரவரிக்கு பிறகு இந்திய அணியில் இடம்பெறாமல் இருந்த ராகுலும் ஜிம்பாப்வேவுக்கு எதிராக பெரிதளவில் சிறப்பாக செயல்படவில்லை. இதுவும் பின்னடைவாக பார்க்கப்படுகிறது.

இந்த ஆசியக் கோப்பைக்கான இந்திய அணியில் மற்றொரு பிரச்சினையும் மிகமுக்கியமானதாக இருக்கிறது. அது விராட் கோலியின் ஃபார்ம்தான். ஐபிஎல் 15ஆவது சீசனில் கோலி சிறப்பாக செயல்படவில்லை. இதனைத் தொடர்ந்து இங்கிலாந்து தொடர்களில் மட்டுமே பங்கேற்ற அவர், அதிலும் பெரிய தாக்கத்தை ஏற்படுத்தவில்லை. அடுத்து மேற்கிந்தியத் தீவுகள் தொடரின்போது ஓய்வுக்கு சென்றார்.

அப்படி கோலி தனது திறமையை நிரூபிக்காமல் ஓய்வுக்கு சென்றிருப்பதால், ஆசியக் கோப்பையில் அவர் எப்படி விளையாடப் போகிறாரோ என்ற அச்சம் ரசிகர்கள் மத்தியில் நிலவி வருகிறது. ஒருவேளை கோலி முதல் போட்டியில் பாகிஸ்தானுக்கு எதிராக சொதப்பினால், அடுத்து பிளேயிங் லெவனில் இருந்து நீக்கப்பட அதிக வாய்ப்புள்ளது முன்பு தகவல் வெளியாகி வருகிறது.

இந்நிலையில், ஆசியக் கோப்பையில் எப்படி விளையாடுவேன் என்பது குறித்து விராட் கோலி அதிரடியாக பேசியுள்ளார். அதில், ‘‘இங்கிலாந்தில் நடைபெற்ற சொதப்பல்கள் எல்லாம் ஒரே மாதிரியான தவறை செய்ததால்தான். ஓய்வின் போது அதனை கண்டறிந்து சரிசெய்துவிட்டேன். தற்போது சரிசெய்வதற்கு எந்த தவறும் கிடையாது. தற்போது எவ்வித பிரச்சினையும் இல்லாததால், பயிற்சியின்போது சிறப்பாகத்தான் பேட்டிங் செய்து வருகிறேன்.

பயிற்சியின்போது எனக்கான ப்ளோ கிடைக்கிறது. அதாவது, நான் சிறப்பாகத்தான் விளையாடப் போகிறேன் என்பதை இது வெளிகாட்டுகிறது. ஆசியக் கோப்பையில் என்னால் நிச்சயம் சிறப்பாக விளையாட முடியும். நான் தயார்நிலையில் இருக்கிறேன்’’ என அதிரடியாக அறிவித்துள்ளார்.