கமிந்து மெண்டிஸ் ஓவரில் அடுத்தடுத்து சிக்ஸர்களை பறக்கவிட்ட பிரீவிஸ் - காணொளி!

ஐபிஎல் தொடரில் நேற்று சென்னை எம் ஏ சிதம்பரம் கிரிக்கெட் மைதானத்தில் நடைபெற்ற லீக் போட்டியின் சன்ரைசர்ஸ் ஹைதராபாத் ஆணி 5 விக்கெட் வித்தியாசத்தில் சென்னை சூப்பர் கிங்ஸை வீழ்த்தி அபார வெற்றியைப் பெற்றதுடன் பிளே ஆஃப் சுற்றுக்கான வாய்ப்பையும் தக்கவைத்துள்ளது. 

இப்போட்டியில் சிஎஸ்கே அணி தோல்வியைத் தழுவி இருந்தாலும், அறிமுக வீரராக விளையாடிய தென் ஆப்பிரிக்காவின் டெவால்ட் பிரீவிஸ் ரசிகர்களின் கவனத்தை ஈர்த்துள்ளார். அவர் தனது அதிரடியன பேட்டிங் பாணியில் அடுத்தடுத்து சிக்ஸர்களை விளாசி சிஎஸ்கே அணியின் மிடில் ஆர்டர் பிரச்சனைக்கும் ஒரு தீர்வை கொடுத்துள்ளார். அதில் அவர் இப்போட்டியில் ஒரே ஓவரில் மூன்று சிக்ஸர்களை விளாசியும் மிரட்டினார். 

அந்தவகையில் இன்னிங்ஸின் 12ஆவது ஓவரை சன்ரைசர்ஸ் தரப்பில் கமிந்து மெண்டிஸ் வீசிய நிலையில் ஓவரின் முதல் பந்திலேயே இமாலய சிக்ஸரைப் பறக்கவிட்டதுடன், அந்த 4ஆவது பந்தில் டீப் மிட் விக்கெட்டிலும், ஓவரின் கடைசி பந்தில் லாங் ஆஃப் திசையிலும் என சிக்ஸரை பறக்கவிட்டு அசத்தினார். இதன்மூலம் அந்த ஒரே ஓவரில் மட்டும் சிஎஸ்கே அணியானது 20 ரன்களைக் குவித்ததன் காரணமாக அணியின் ஸ்கோரையும் உயர்ந்தது. 

அதன்பின்னும் அதிரடியாக விளையாட முயற்சித்த டெவால்ட் பிரீவிஸ் ஒரு பவுண்டரி, 4 சிக்ஸர்களுடன் 42 ரன்களைச் சேர்த்த நிலையில் கமிந்து மெண்டிஸும் அபாரமான கேட்ச்சின் மூலம் தனது விக்கெட்டை இழந்தார். இதன் காரணமாக அவர் தனது அரைசதம் அடிக்கும் வாய்ப்பையும் தவறவிட்டார். இந்நிலையில் டெவால்ட் பிரிவீஸ் அடுத்தடுத்து சிக்ஸர்களை விளாசிய காணொளியானது இணையத்தில் வைரலாகி வருகிறது. 

முன்னதாக நடந்து முடிந்த வீரர்கள் மெகா ஏலத்தில் பங்கேற்ற டெவால்ட் பிரீவிஸை எந்த அணியும் ஏலத்தில் எடுக்க முன் வரவில்லை. இதற்கிடையில் சிஎஸ்கே அணியின் குர்ஜப்னித் சிங் காயம் காரணமாக தொடரிலிருந்து விலகிய நிலையில், அவருக்கு பதிலாக சிஎஸ்கே அணியில் ஒப்பந்தம் பெற்றார். இந்நிலையில் முதல் போட்டியிலேயே கவனம் ஈர்த்துள்ள டெவால்ட் பிரீவிஸ் இனி வரும் போட்டிகளிலும் சிறப்பாக செயல்படுவார் என்ற எதிர்பார்ப்புகள் ரசிகர்கள் மத்தியில் அதிகரித்துள்ளன.

இந்த போட்டி குறித்து பேசினால் டாஸை இழந்து முதலில் பேட்டிங் செய்த சென்னை சூப்பர் கிங்ஸ் அணியில் அறிமுக வீரர் டெவால்ட் பிரீவிஸ் அதிரடியாக விளையாடி ஒரு பவுண்டரி, 4 சிக்ஸர்கள் என 42 ரன்களிலும், ஆயூஷ் மாத்ரே 6 பவுண்டரிகளுடன் 30 ரன்களையும், தீபக் ஹூடா 22 ரன்களையும் சேர்த்ததை தவிர்த்து மற்ற வீரர்கள் அனைவரும் அடுத்தடுத்து சொற்ப ரன்களில் நடையைக் கட்டினர். இதனால் சிஎஸ்கே அணி 19.5 ஓவர்களிலேயே அனைத்து விக்கெட்டுகளையும் இழந்து 154 ரன்களுக்கு ஆல் அவுட்டானது. 

Also Read: LIVE Cricket Score

பின்னர் இலக்கை நோக்கி விளையாடிய சன்ரைசர்ஸ் ஹைதராபாத் அணிக்கு இஷான் கிஷான் 44 ரன்களையும், இறுதிவரை ஆட்டமிழக்காமல் இருந்த கமிந்து மெண்டிஸ் 32 ரன்களையும், நிதீஷ் ரெட்டி 19 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் சன்ரைசர்ஸ் ஹைதராபாத் அணி 18.4 ஓவர்களில் இலக்கை எட்டி 5 விக்கெட் வித்தியாசத்தில் சென்னை சூப்பர் கிங்ஸை வீழ்த்தி வெற்றிபெற்றது குறிப்பிடத்தக்கது.