ஹெல்மெட்டை தாக்கிய பந்து; பதிலடி கொடுத்த ஃபின் ஆலன் - காணொளி!

பிக் பேஷ் லீக் தொடரில் நேற்று நடைபெற்ற 26ஆவது லீக் ஆட்டத்தில் பெர்த் ஸ்கார்ச்சர்ஸ் மற்றும் மெல்போர்ன் ரெனிகேட்ஸ் அணிகள் பலப்பரீட்சை நடத்தின. பெர்த் கிரிக்கெட் மைதானத்தில் நடைபெற்ற இப்போட்டியில் டாஸ் வென்ற மெல்போர்ன் ரெனிகேட்ஸ் அணி முதலில் பந்துவீசுவதாக அறிவித்தது. 

அதன்படி களமிறங்கிய பெர்த் ஸ்கார்ச்சர்ஸ் அணியில் ஆரோன் ஹார்டி 34 ரன்களையும், ஆஷ்டன் அகர் 51 ரன்களையும் சேர்த்ததை தவிர்த்து மற்ற வீரர்கள் அனைவரும் அடுத்தடுத்து சொற்ப ரன்களில் விக்கெட்டை இழந்தனர். இதனால் பெர்த் ஸ்கார்ச்சர்ஸ் அணி 20 ஓவர்கள் முடிவில் 8 விக்கெட்டுகளை இழந்து 147 ரன்களைச் சேர்த்தது. மெல்போர்ன் ரெனிகேட்ஸ் அணி தரப்பில் ஆடம் ஸாம்பா 3 விக்கெட்டுகளையும், டாம் ரோஜர்ஸ், வில் சதர்லெட் ஆகியோர் தலா 2 விக்கெட்டுகளை கைப்பற்றினர்.  

அதன்பின் இலக்கை நோக்கி களமிறங்கிய மெல்போர் ரெனிகேட்ஸ் அணிக்கும் எதிர்பார்த்த தொடக்கம் கிடைக்கவில்லை. அந்த அணியின் டாப் ஆர்டர் வீரர்கள் சோபிக்க தவறியதன் காரணமாக, அந்த அணி 44 ரன்களில் 5 விக்கெட்டுகளை இழந்து தடுமாறியது. பின்னர் இணைந்த கேப்டன் வில் சதர்லெட் - தாமஸ் ரோஜர்ஸ் இணை அதிரடியாக விளையாடி அணியின் விக்கெட் இழப்பை தடுத்ததுடன் அணியை வெற்றியை நோக்கியும் அழைத்துச் சென்றனர்.

இதில் சிறப்பான ஆட்டத்தை வெளிப்படுத்திய கேப்டன் வில் சதர்லெட் அரைசதம் கடந்ததுடன், 5 பவுண்டரி, 3 சிக்சர்கள் என 70 ரன்களைச் சேர்த்து தனது விக்கெட்டை இழந்தார்.  அதேசமயம் மறுமுனையில் தாமஸ் ரோஜர்ஸ் 4 பவுண்டரி, 3 சிக்ஸர்கள் என 49 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் மெல்போர்ன் ரெனிகேட்ஸ் அணி 19.4 ஓவர்களில் இலக்கை எட்டியதுடன் 4 விக்கெட் வித்தியாசத்தில் பெர்த் ஸ்கார்ச்சர்ஸ் அணியை வீழ்த்தி வெற்றிபெற்றது. 

இந்நிலையில் இப்போட்டியில் பெர்த் அணி பேட்டிங் செய்த போது டாம் ரோஜர்ஸ் வீசிய முதல் ஓவரிலேயே நட்சத்திர வீரர் ஃபின் ஆலன் ஹெல்மட்டில் அடிவாங்கினார். அந்தவகையில் ரோஜர்ஸ் தனது முதல் ஓவரின் மூன்றாவது பந்தை ஷார்ட் பந்தாக வீசினார். இதனை எதிர்கொண்ட ஃபின் ஆலன் அதை அடிக்கு முயன்று தவறவிட, அது நேரடியாக அவரின் ஹெல்மட்டை பதம் பார்த்தது. அதன்பின் அடுத்த பந்தை எதிர்கொண்ட ஃபின் ஆலன் பவுண்டரி அடித்து கம்பேக் கொடுத்தார். 

Also Read: Funding To Save Test Cricket

அத்துடன் நிற்கான ஃபின் ஆலான் அடுத்த பந்திலேயே அபாரமான சிக்ஸர் ஒன்ரையும் பறக்கவிட்டு பதிலடியைக் கொடுத்தார். அதிலும் குறிப்பாக ஹெல்மெட்டில் பந்து தாக்கியதால் கோபமடைந்த ஃபின் ஆலன், அடுத்தடுத்த பந்துகளில் பவுண்டரி மற்றும் சிக்ஸரை பறக்கவிட்டு அசத்திய ரசிகர்களை ஆச்சரியத்தில் ஆழ்த்தியது. இந்நிலையில் வின் ஆலன் அடுத்தடுத்து பவுண்டரிகளை விளாசிய காணொளியானது இணையத்தில் வைரலாகி வருகிறது.