சிக்ஸர் லைனில் விக்கெட்டை இழந்த ஸ்டொய்னிஸ்; ஷாக் ரியாக்‌ஷன் கொடுத்த ஜோகோவிச் - காணொளி!

பிக் பேஷ் லீக் தொடரில் நேற்று நடைபெற்ற 32ஆவது லீக் போட்டியில் மெல்போர்ன் ஸ்டார்ஸ் மற்றும் மெல்போர்ன் ரெனிகேட்ஸ் அணிகள் பலப்பரீட்சை நடத்தின. இப்போட்டியில் டாஸை இழந்து முதலில் பேட்டிங் செய்த மெல்போர்ன் ஸ்டார்ஸ் அணி தொடக்கம் முதலே சீரான இடைவேளையில் விக்கெட்டுகளை இழந்து தடுமாறியது. பின்னர் களமிறங்கிய கிளென் மேக்ஸ்வெல் அதிரடியாக விளையாடி அணியை சரிவிலிருந்து மீட்டெடுத்தார். 

இதில் அபார ஆட்டத்தை வெளிப்படுத்திய கிளென் மேக்ஸ்வெல் அரைசதம் கடந்து அசத்தியதுடன், இறுதிவரை களத்தில் இருந்து  4 பவுண்டரி, 10 சிக்ஸர்கள் என 90 ரன்களை சேர்த்தார். இதன்மூலம் மெல்போர்ன் ஸ்டார்ஸ் அணி 20 ஓவர்கள் முடிவில் அனைத்து விக்கெட்டுகளையும் இழந்து 165 ரன்களைச் சேர்த்தது. இதனையடுத்து இலக்கை நோக்கி விளையாடிய மெல்போர்ன் ரெனிகேட்ஸ் அணி வீரர்களும் தொடக்கம் முதலே சீரான இடைவேளையில் விக்கெட்டுகளை இழந்தனர். 

அதிலும் அணியின் நட்சத்திர வீரர்கள் ஜோஷ் பிரௌன், மார்கஸ் ஹாரிஸ், ஜேக் ஃபிரேசர் மெக்குர்க், ஜேக்கப் பெத்தல், டிம் செய்ஃபெர்ட், கேப்டன் வில் சதர்லேண்ட் உள்ளிட்டோர் அடுத்தடுத்து சொற்ப ரன்களில் ஆட்டமிழந்தனர். இதனால் மெல்போர்ன் ரெனிகேட்ஸ் அணி 19.5 ஓவர்களில் அனைத்து விக்கெட்டுகளை இழந்து 123 ரன்களுக்கு ஆல் அவுட்டானது. மெல்போர்ன் ஸ்டார்ஸ் தரப்பில் அபாரமான பந்துவீச்சை வெளிப்படுத்திய மார்க் ஸ்டெக்கிடி 5 விக்கெட்டுகளை கைப்பற்றி அசத்தினார்.

இதன்மூலம் மெல்போர்ன் ஸ்டார்ஸ் அணி 42 ரன்கள் வித்தியாசத்தில் மெல்போர்ன் ரெனிகேட்ஸ் அணியை வீழ்த்தி வெற்றிபெற்றது. இப்போட்டியில் அதிரடியாக விளையாடி அணியை சரிவிலிருந்து மீட்ட கிளென் மேக்ஸ்வெல் ஆட்டநாயகன் விருதை வென்றார். இந்நிலையில் இப்போட்டியில் மெல்போர்ன் ஸ்டார்ஸ் அணி கேப்டன் மார்கஸ் ஸ்டோய்னிஸ் விக்கெட்டை இழந்த காணொளியானது ரசிகர்கள் மத்தியில் வைரலாகி வருகிறது. 

அதன்படி இப்போட்டியில் அதிரடியாக விளையாடி வந்த மார்கஸ் ஸ்டொய்னிஸ், இன்னிங்ஸின் 8ஆவது ஓவரின் 3ஆவது பந்தை சிக்ஸர் அடிக்கும் முயற்சியில் மிட் ஆன் திசையை நோக்கி இமாலய ஷாட்டை விளாசினார். இதனைக் கண்ட அனைவரும் பந்து சிக்ஸருக்கு சென்றது என நினைத்தனர். ஆனால் அந்த பந்தானது அத்திசையில் ஃபீல்டிங் செய்துகொண்டிருந்த கேன் ரிச்சர்ட்சன் கைகளில் தஞ்சமடைந்தது. 

இருப்பினும் இப்போட்டி முழுமையாக அடைக்கப்பட்ட மைதானத்தில் நடைபெற்றதால், பந்து மைதானத்தின் மேற்கூரையில் பட்டதா என்றும் சோதனை செய்யப்பட்டது. இருப்பினும் அது மேற்கூரையில் படாமல் ஃபீல்டரிடம் சென்றதையடுத்து அவுட் என தீர்ப்பு வழங்கப்பட்டது. இதனை சற்றும் எதிர்பார்க்காத ஸ்டொய்னிஸ் 18 ரன்களை மட்டுமே எடுத்த நிலையில் விக்கெட்டை இழந்து ஏமாற்றத்துடன் பெவிலியன் திரும்பினார். 

Also Read: Funding To Save Test Cricket

இதில் சுவாரஸ்யமான விசயம் என்னவெனில், இப்போட்டியை காண உலகின் முன்னணி டென்னிஸ் வீரரான நோவாக் ஜோகோவிச்சும் மைதானத்தில் இருந்தார். இந்த கேட்சைப் பார்த்த அவரும் என்ன நடந்தது என நம்பமுடியாமல் ஒருகணம் அதிர்ச்சியில் உறைந்தார். இந்நிலையில் ஸ்டோய்னிஸ் விக்கெட் இழந்த விதத்தைப் பார்த்து ஷாக்கான ஜோகோவிச்சின் காணொளியானது வைரலாகி வருகிறது.