இங்கிலாந்தில் சுற்றுப்பயணம் செய்துவரும் ஆஸ்திரேலிய அணியானது தற்சமயம் 5 போட்டிகள் கொண்ட ஒருநாள் தொடரில் விளையாடி வருகின்றது. இதில் நடைபெற்ற முதலிரண்டு ஒருநாள் போட்டிகளிலும் ஆஸ்திரேலிய அணியானது வெற்றிபெற்று அசத்தியதுடன் 2-0 என்ற கணக்கில் தொடரிலும் முன்னிலை வகித்து வருகிறது.
இந்நிலையில் இரு அணிகளுக்கும் இடையேயான மூன்றாவது ஒருநாள் போட்டியானது செஸ்டர் லீ ஸ்ட்ரீட்டில் இன்று நடைபெற்றது. இப்போட்டியில் டாஸை இழந்து முதலில் பேட்டிங் செய்த ஆஸ்திரேலிய அணியானது தொடக்கத்தில் விக்கெட்டுகளை இழந்து தடுமாறினாலும், ஸ்டீவ் ஸ்மித் மற்றும் அலெக்ஸ் கேரி ஆகியோரது பொறுப்பான ஆட்டத்தின் மூலமாக சரிலிருந்து மீண்டெழுந்தது. இதில் அபாரமாக விளையாடிய இருவரும் தங்கள் அரைசதங்களைப் பதிவுசெய்தனர்.
அதன்பின் 60 ரன்கள் எடுத்த நிலையில் ஸ்டீவ் ஸ்மித் விக்கெட்டை இழக்க, அடுத்து களமிறங்கிய கிளென் மேக்ஸ்வெல் 30 ரன்களையும், ஆரோன் ஹார்டி 44 ரன்களையும் சேர்த்து விக்கெட்டுகளை இழந்த நிலையில், இறுதிவரை ஆட்டமிழக்காமல் களத்தில் இருந்த அலெக்ஸ் கேரி 77 ரன்களைச் சேர்த்து அணிக்கு தேவையான ஃபினிஷிங்கைக் கொடுத்தார். இதன்மூலம் ஆஸ்திரேலிய அணி 50 ஓவர்கள் முடிவில் 7 விக்கெட் இழப்பிற்கு 304 ரன்களைச் சேர்த்தது.
இதனையடுத்து கடின இலக்கை நோக்கி களமிறங்கிய இங்கிலாந்து அணியில் தொடக்க வீரர்கள் பில் சால்ட் ரன்கள் ஏதுமின்றியும், பென் டக்கெட் 8 ரன்களிலும் என மிட்செல் ஸ்டார்க்கின் அடுத்தடுத்த ஓவர்களில் விக்கெட்டை இழந்தனர். இதனால் இங்கிலாந்து அணி 11 ரன்களில் 2 விக்கெட்டுகளை இழந்து தடுமாறிய நிலையில் ஜோடி சேர்ந்துள்ள வில் ஜேக்ஸ் மற்றும் கேப்டன் ஹாரி ப்ரூக் இணை நிதான ஆட்டத்தை வெளிப்படுத்தி அணியை சரிலிருந்து மீட்டுவருகின்றனர்.
இந்நிலையில் இப்போட்டியில் இங்கிலாந்து வீரர் பிரைடன் கார்ஸ் பவுண்டரி லைனில் பிடித்த கேட்ச் ஒன்று ரசிகர்களை வியப்பில் ஆழ்த்தியது. அதன்படி ஜோஃப்ரா ஆர்ச்சர் வீசிய 35ஆவது ஓவரின் 3ஆவது பந்தை ஆஸ்திரேலிய வீரர் ஸ்டீவ் ஸ்மித் பவுண்டரி அடிக்கும் முயற்சியில் தூக்கி அடித்தார். ஆனால் பந்து அவர் எதிர்பார்த்தார் போல் பேட்டில் படாத காரணத்தால் அது நேராக டீப் ஸ்கொயர் திசையை நோக்கி சென்றது.
Also Read: Funding To Save Test Cricket
அப்போது அத்திசையில் ஃபீல்டிங் செய்து கொண்டிருந்த பிரைடன் கார்ஸ் பந்தை சரியாக கணித்ததுடன் அசத்தலான டைவை அடித்து கேட்ச் பிடித்தும் அசத்தினார். இதனை சற்றும் எதிர்பாராத ஸ்டீவ் ஸ்மித் ஒரு கணம் என்ன நடந்தது என்று புரியாமல் திகைத்ததுடன் 60 ரன்களை மட்டுமே எடுத்த நிலையில் விக்கெட்டையும் இழந்து பெவிலியன் திரும்பினார். இந்நிலையில் பிரைடன் கார்ஸ் பிடித்த இந்த கேட்ச் குறித்த காணொளி இணையத்தில் வைரலாகி வருகிறது.