மகளிர் ஒருநாள் உலகக்கோப்பை தொடருக்கான தகுதிச்சுற்று போட்டிகள் பாகிஸ்தானில் நடைபெற்று வருகின்றன. இதில் இன்று லாகூரில் நடைபெற்ற 5ஆவது லீக் போட்டியில் வெஸ்ட் இண்டீஸ் மற்றும் அயர்லாந்து மகளிர் அணிகள் பலப்பரீட்சை நடத்தின. மழை காரணமாக இப்போட்டி 33 ஓவர்கள் கொண்ட ஆட்டமாக நடைபெற்றது.
இப்போட்டியில் டாஸ் வென்ற அயர்லாந்து மகளிர் அணி முதலில் பந்துவீசுவதாக அறிவித்தது. இதையடுத்து களமிறங்கிய வெஸ்ட் இண்டீஸ் அணிக்கு கேப்டன் ஹீலி மேத்யூஸ் - கியானா ஜோசப் இணை தொடக்கம் கொடுத்தனர். இதில் கியானா ஜோசப் 4 ரன்களில் விக்கெட்டை இழந்தார். அவரைத்தொடர்ந்து 23 ரன்கள் சேர்த்த நிலையில் ஹீலி மேத்யூஸும், 36 ரன்கள் எடுத்திருந்த நிலையில் ஸைதா ஜேம்ஸும் என விக்கெட்டுகளை இழந்தனர்.
பின்னர் இணைந்த ஸ்டேஃபானி டெய்லர் மற்றும் சினெல்லே ஹென்றி இணை பொறுப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் இருவரும் 90 ரன்களுக்கு மேல் பார்ட்னர்ஷிப் அமைத்து அசத்தினர். பின் இருவரும் அரைசதம் அடிப்பார்கள் என எதிர்பார்க்கப்பட்ட நிலையில் ஸ்டெஃபானி டெய்லர் 46 ரன்களில் ஆட்டமிழக்க, இறுதிவரை ஆட்டமிழக்காமல் இருந்த சினெல்லே ஹென்றியும் 46 ரன்களைச் சேர்த்தார்.
இதன்மூலம் 33 ஓவர்கள் முடிவில் வெஸ்ட் இண்டீஸ் அணி 6 விக்கெட்டுகளை இழந்து 181 ரன்களைச் சேர்த்தது. அயர்லாந்து அணி தரப்பில் ஜேன் மாகுயர் 3 விக்கெட்டுகளை வீழ்த்தினார். பின்னர் இலக்கை நோக்கி விளையாடிய அயர்லாந்து அணிக்கு ஏமி ஹண்ட்ர் - கேப்டன் கேபி லூயிஸ் இணை தொடக்கம் கொடுத்தனர். இதில் கேபி லூயிஸ் 17 ரன்களில் ஆட்டமிழக்க, அடுத்து களமிறங்கிய ஓர்லா பிரெண்டர்காஸ்ட்டும் ஒரு ரன்னுடன் நடையைக் கட்டினார்.
பின்னர் ஏமி ஹண்டருடன் இணைந்த லாரா டெலானி ஒராளவு தாக்குப்பிடித்து ஸ்கோரை உயர்த்தினர். அதன்பின் 48 ரன்கள் எடுத்திருந்த நிலையில் ஹேமி ஹண்டர் விக்கெட்டை இழந்து அரைசதம் அடிக்கும் வாய்ப்பை தவறவிட, அவரைத்தொடர்ந்து 32 ரன்களை எடுத்திருந்த லாரா டெலானியும் விக்கெட்டை இழந்தார். அதன்பின் களமிறங்கிய வீராங்கனைகளில் குல்டர் ரெய்லி 26 ரன்களைச் சேர்த்ததை தவிர்த்து மற்ற வீராங்கனைகள் சோபிக்க தவறினர்.
Also Read: Funding To Save Test Cricket
இதனால் அயர்லாந்து மகளிர் அணி 32.2 ஓவர்களில் அனைத்து விக்கெட்டுகளையும் இழந்து 175 ரன்களில் ஆல் அவுட்டானது. வெஸ்ட் இண்டீஸ் அணி தரப்பில் கேப்டன் ஹெய்லி மேத்யூஸ் 4 விக்கெட்டுகளையும், கரிஷ்மா ரம்ஹராக, ஆலியா அலீன் தலா 2 விக்கெட்டுகளை கைப்பற்றினர். இதன்மூலம் வெஸ்ட் இண்டீஸ் மகளிர் அணி 6 ரன்கள் வித்தியாசத்தில் அயர்லாந்து மகளிர் அணியை வீழ்த்தி த்ரில் வெற்றியைப் பதிவுசெய்தது.