அல்ஸாரி ஜோசப் இரண்டு போட்டிகளில் விளையாட தடை விதித்தது கிரிக்கெட் வெஸ்ட் இண்டீஸ்!

வெஸ்ட் இண்டீஸ் - இங்கிலாந்து அணிகளுக்கு இடையேயான மூன்றாவது மற்றும் கடைசி ஒருநாள் போட்டி நேற்று முன் தினம் பார்படாஸில் நடைபெற்றது. இப்போட்டியில் வெஸ்ட் இண்டீஸ் அணியானது 8 விக்கெட் வித்தியாசத்தில் இங்கிலாந்து அணியை வீழ்த்தி அபார வெற்றியைப் பதிவுசெய்து அசத்தியதுடன், ஒருநாள் தொடரையும் 2-1 என்ற கணக்கில் கைப்பற்றி சாதனை படைத்தது. 

இந்நிலையில் இப்போட்டியின் போது வெஸ்ட் இண்டீஸ் அணி வேகப்பந்து வீச்சாளர் அல்ஸாரி ஜோசப் மற்றும் கேப்டன் ஷாய் ஹோப் ஆகியோர் வார்த்தை மோதலில் ஈடுபட்ட சம்பவம் பரபரப்பை ஏற்படுத்தியது. அதன்படி இன்னிங்ஸின் 4ஆவது ஓவரை அல்ஸாரி ஜோசப் வீச அதனை இங்கிலாந்து வீரர் ஜோர்டன் காக்ஸ் எதிர்கொண்டார். அப்போது அந்த ஓவரில் அல்ஸாரி ஜோசப் ஃபீல்டர்களை மாற்றும் படி கேப்டன் ஷாய் ஹோப்புடன் பரிந்துரைத்தார்.

ஆனால் அதற்னை ஏற்க மறுத்த ஷாய் ஹோப் அதே ஃபீல்டை வைத்தே பந்துவீசும் படி கூறினார். இதனால் அதிருப்தியடைந்த அல்ஸாரி ஜோசப் வசை பாடிய படியே, அடுத்த பந்தை வீசியதுடன் அதில் ஜோர்டன் காக்ஸின் விக்கெட்டையும் கைப்பற்றி அசத்தினார். இருப்பினும் அந்த ஓவர் முடிந்த கையோடு அல்ஸாரி ஜோசப் யாரிடமும் ஏதும் சொல்லாமல் பெவிலியனுக்கு நடையைக் கட்டினார். இதனால் விண்டீஸ் அணி அடுத்த ஓவரில் 10 வீரர்களை மட்டுமே கொண்டு ஃபீல்டிங் செய்தது.

இச்சம்பவம் வெஸ்ட் இண்டீஸ் கிரிக்கெட் வாட்டாரத்தில் பரபரப்பை ஏற்படுத்தியது. மேலும் அணியின் கேப்டன் ஷாய் ஹோப் இதுகுறித்து ஏதும் பேச விரும்பவில்லை என்றும், அணியின் பயிற்சியாளர் டேரன் சமி, அல்ஸாரி ஜோசப்பின் இந்த செயலானது கண்டிக்கத்தக்கது என்றும் விமர்சனம் செய்தனர். மேற்கொண்டு முன்னாள் வீரர்கள் சிலரும் அல்ஸாரி ஜோசபின் செயல் குறித்து தங்கள் அதிருப்தியை வெளிப்படுத்தியுள்ளனர்.

இந்நிலையில் களத்தை விட்டு பாதியிலேயே வெளியேறிய காரணத்தால் அல்ஸாரி ஜோசபிற்கு இரண்டு போட்டிகளில் விளையாட தடை விதிக்கப்படுவதாக வெஸ்ட் இண்டீஸ் கிரிக்கெட் வாரியம் அறிவித்துள்ளார். இதுகுறித்து அந்த அணி வெளியிட்டுள்ள அறிக்கையில், அல்ஸாரி ஜோசபின் இந்த நடத்தை வெஸ்ட் இண்டீஸ் கிரிக்கெட் வாரியத்திற்கு எதிராணதாக்கும். இத்தகைய நடத்தையை எங்களால் ஏற்றுக்கொள்ள முடியாது. அதனால் இதற்கான நடவடிக்கையை நாங்கள் எடுத்துள்ளோம்” என்று தெரிவித்துள்ளார். 

Also Read: Funding To Save Test Cricket

அதேசமயம் தனது செயலிற்கு மன்னிப்பு தெரிவித்துள்ள அல்ஸாரி ஜோசப் கூறுகையில், “கேப்டன் ஷாய் ஹோப் மற்றும் எனது சக வீரர்கள் மற்றும் நிர்வாகத்திடம் மற்றும் வெஸ்ட் இண்டீஸ் ரசிகர்களிடம் நான் எனது மனப்பூர்வமான மன்னிப்பை கேட்டுக்கொள்கிறேன். வீரர்களின் ஒவ்வொரு செயலில் உளள ஒரு சிறிய குறைபாடு கூட தொலைநோக்கு தாக்கத்தை ஏற்படுத்தும் என்பதை நான் புரிந்துகொள்கிறேன். எனது செயலுக்காக நான் மிகவும் வருந்துகிறேன்” என்று கூறியுள்ளார்.