WI vs AUS, 4th T20I: லூயிஸ், ஹோப் அதிரடியில் இங்கிலாந்தை வீழ்த்தியது வெஸ்ட் இண்டீஸ்!

இங்கிலாந்து அணி தற்சமயம் வெஸ்ட் இண்டீஸில் சுற்றுப்பயணம் செய்து 5 போட்டிகள் கொண்ட டி20 தொடரில் விளையாடி வருகிறது. அதன்படி டி20 தொடரில் நடந்து முடிந்துள்ள 3 போட்டிகளின் முடிவில் இங்கிலாந்து அணி மூன்று போட்டிகளிலும் வெற்றிபெற்று 3-0 என்ற கணக்கில் வெஸ்ட் இண்டீஸை வீழ்த்தி தொடரை வென்றுள்ளது.

இதனைத்தொடர்ந்து வெஸ்ட் இண்டீஸ் - இங்கிலாந்து அணிகளுக்கு இடையேயான தொடரின் 4ஆவது டி20 போட்டியானது இன்று (நவ.17)செயின்ட் லூசியாவில் உள்ள டேரன் சமி சர்வதேச கிரிக்கெட் மைதானத்தில் நடைபெற்றது. இப்போட்டியில் டாஸ் வென்ற வெஸ்ட் இண்டீஸ் அணி முதலில் பந்துவீசுவதாக அறிவித்தது. இதையடுத்து களமிறங்கிய இங்கிலாந்து அணிக்கு பில் சால்ட் - வில் ஜேக்ஸ் இணை தொடக்கம் கொடுத்தனர். இதில் இருவரும் இணைந்து ஆரம்பம் முதலே அதிரடியன ஆட்டத்தை வெளிப்படுத்தியதுடன், முதல் விக்கெட்டிற்கு 54 ரன்கள் பார்ட்னர்ஷிப் அமைத்தும் அசத்தினர். 

அதன்பின் 25 ரன்களைச் சேர்த்த நிலையில் வில் ஜேக்ஸ் தனது விக்கெட்டை இழக்க, மறுபக்கம் அரைசதம் கடந்து அசத்திய பில் சால்ட் 5 பவுண்டரி, 4 சிக்ஸர்கள் என 55 ரன்களுக்கு ஆட்டமிழந்தார். அவர்களைத் தொடர்ந்து களமிறங்கிய கேப்டன் ஜோஸ் பட்லர் தனது பங்கிற்கு 38 ரன்களைச் சேர்த்து ஆட்டமிழக்க, அடுத்து வந்த ஜேக்கப் பெத்தெல் இறுதிவரை ஆட்டமிழக்காமல் 4 பவுண்டரி, 5 சிக்ஸர்கள் என 62 ரன்களையும், சாம் கரண் 2 சிக்ஸர்களுடன் 24 ரன்களையும் சேர்க்க, இங்கிலாந்து அணி நிர்ணயிக்கப்பட்ட 20 ஓவர்களில் 5 விக்கெட்டுகளை இழந்து 218 ரன்களைச் சேர்த்தது. விண்டீஸ் தரப்பில் குடகேஷ் மோட்டி 2 விக்கெட்டுகளை கைப்பற்றினார். 

அதன்பின் கடின இலக்கை நோக்கி களமிறங்கிய வெஸ்ட் இண்டீஸ் அணிக்கு எவின் லூயிஸ் மற்றும் ஷாய் ஹோப் இணை தொடக்கம் கொடுத்தனர். இருவரும் இணைந்து தொடக்கம் முதலே  அதிரடியான ஆட்டத்தை வெளிப்படுத்தியதுடன் அடுத்தடுத்து பவுண்டரிகளையும் சிக்ஸர்களையும் பறக்கவிட்டு அணிக்கு தேவையான அடித்தளத்தையும் அமைத்து கொடுத்தனர். தொடர்ந்து அபாரமாக விளையாடிய இருவரும் தங்கள் அரைசதங்களை பதிவுசெய்ததுடன, முதல் விக்கெட்டிற்கு 136 ரன்கள் பார்ட்னர்ஷிப் அமைத்தும் அசத்தினர். பின் 4 பவுண்டரி, 7 சிக்ஸர்கள் என 68 ரன்களைச் சேர்த்த நிலையில் எவின் லூயிஸ் தனது விக்கெட்டை இழந்தார். 

அவரைத் தொடர்ந்து ஷாய் ஹோப் 7 பவுண்டரி, 3 சிக்ஸர்களுடன் 54 ரன்களிலும், அடுத்து களமிறங்கிய நிக்கோலஸ் பூரன் ரன்கள் ஏதுமின்றியும், ஷிம்ரான் ஹெட்மையர் 7 ரன்களுக்கும் என ஆட்டமிழந்து ஏமாற்றமளித்தனர். அதன்பின் ஜோடி சேர்ந்த கேப்டன் ரோவ்மன் பாவெல் - ஷெர்ஃபேன் ரூதர்ஃபோர்ட் இணையும் அதிரடியாக விளையாட வெஸ்ட் இண்டீஸ் அணியின் வெற்றியும் உறுதியானது. இப்போட்டியில் தொடர்ந்து சிறப்பான ஆட்டத்தை வெளிப்படுத்திய ரோவ்மன் பாவெல் 2 பவுண்டரி, 3 சிக்ஸர்கள் என 38 ரன்களை எடுத்திருந்த நிலையில் ஆட்டமிழந்து பெவிலியன் திரும்பினார். 

Also Read: Funding To Save Test Cricket

இருப்பினும் இறுதிவரை ஆட்டமிழக்காமல் இருந்த ஷெர்ஃபேன் ரூதர்ஃபோர்ட் 3 சிக்ஸர்களுடன் 27 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் வெஸ்ட் இண்டீஸ் அணி 19 ஓவர்களிலேயே இலக்கை எட்டியதுடன் 5 விக்கெட் வித்தியாசத்தில் இங்கிலாந்து அணியை வீழ்த்தி வெற்றிபெற்றது. இந்த வெற்றியின் மூலம் இந்த டி20 தொடரில் வெஸ்ட் இண்டீஸ் அணியானது முதல் வெற்றியைப் பதிவுசெய்துள்ளது. இப்போட்டியில் சிறப்பான ஆட்டத்தை வெளிப்படுத்திய ஷாய் ஹோப் ஆட்டநாயகன் விருதை வென்றார்.