WPL 2025: நாட் ஸ்கைவர் பிரண்ட் அபாரம்; வாரியர்ஸை வீழ்த்தி மும்பை இந்தியன்ஸ் வெற்றி!
மகளிர் பிரீமியர் லீக் தொடரின் 3ஆவது சீசன் விறுவிறுப்பான கட்டத்தை எட்டியுள்ளது. இத்தொடரில் இன்று நடைபெறும் 11ஆவது லீக் போட்டியில் மும்பை இந்தியன்ஸ் அணியை எதிர்த்து யுபி வாரியர்ஸ் அணி பலப்பரீட்சை நடத்தின. இதில் டாஸ் வென்ற மும்பை இந்தியன்ஸ் அணி முதலில் பந்துவீசுவதாக அறிவித்தது.
அதன்படி களமிறங்கிய யுபி வாரியர்ஸ் அணிக்கு கிரண் நவ்கிரே மற்றும் கிரேஸ் ஹாரிஸ் இணை தொடக்கம் கொடுத்தனர். இதில் கிரண் நவ்கிரே ஒரு ரன்னில் விக்கெட்டை இழந்து ஏமாற்றமளித்தார். அதன்பின் கிரேஸ் ஹாரிஸுடன் ஜோடி சேர்ந்த விருந்தா தினேஷ் பொறுப்பான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இதில் இருவரும் இணைந்து 79 ரன்கள் பார்ட்னர்ஷிப் அமைத்தும் அசத்தினர். அதன்பின் 6 பவுண்டரி, 2 சிக்ஸர்கள் என 45 ரன்களில் கிரேஸ் ஹேரிஸ் விக்கெட்டை இழந்து அரைசதம் அடிக்கும் வாய்ப்பை தவறவிட்டார்.
அவரைத்தொடர்ந்து 5 பவுண்டரிகளுடன் 33 ரன்களைச் சேர்த்திருந்த விருந்தா தினேஷும் தனது விக்கெட்டை இழந்தார். அவர்களைத் தொடர்ந்து களமிறங்கிய தீப்தி சர்மா நான்கு ரன்னிலும், தஹ்லியா மெக்ராத் ஒரு ரன்னிலும், ஸ்வேதா செஹ்ராவத் 19 ரன்னிலும், உமா சேத்ரி 13 ரன்னிலும் என விக்கெட்டை இழக்க, யுபி வாரியர்ஸ் அணி 20 ஓவர்கள் முடிவில் 9 விக்கெட்டுகளை இழந்து 142 ரன்களைச் சேர்த்தது. மும்பை இந்தியன்ஸ் தரப்பில் நாட் ஸ்கைவர் 3 விக்கெட்டுகளையும், சப்னைம் இஸ்மைல், சமஸ்கிருதி குப்தா ஆகியோர் தல 2 விக்கெட்டுகளை வீழ்த்தினர்.
அதன்பின் இலக்கை நோக்கி களமிறங்கிய மும்மை இந்தியன்ஸ் அணியில் தொடக்க வீரர் யஷ்திகா பாட்டியா ரன்கள் ஏதுமின்றி விக்கெட்டை இழந்தார். அதன்பின் ஜோடி சேர்ந்த ஹீலி மேத்யூஸ் மற்றும் நாட் ஸ்கைவர் பிரண்ட் இணை அதிரடியாக விளையாடி அணியின் ஸ்கோரை மளமளவென உயர்த்தினர். தொடர்ந்து அபாரமான ஆட்டத்தை வெளிப்படுத்தி வந்த இருவரும் தங்களது அரைசதங்களைப் பதிவுசெய்து அசத்தியதுடன், இரண்டாவது விக்கெட்டிற்கு 133 ரன்கள் பார்ட்னர்ஷிப் அமைத்து அணியின் வெற்றியையும் உறுதிசெய்தனர்.
Also Read: Funding To Save Test Cricket
இதில் 7 பவுண்டரி, 2 சிக்ஸர்கள் என 59 ரன்களை எடுத்த நிலையில் ஹீலி மேத்யூஸ் விக்கெட்டை இழக்க, மறுபக்கம் இறுதிவரை ஆட்டமிழக்காமல் இருந்த நாட் ஸ்கைவர் பிரண்ட் 13 பவுண்டரிகளுடன் 75 ரன்களைச் சேர்த்து அணிக்கு வெற்றியைத் தேடித்தந்தார். இதன்மூலம் மும்பை இந்தியன்ஸ் மகளிர் அணி 17 ஓவர்களில் இலக்கை எட்டியதுடன் 8 விக்கெட் வித்தியாசத்தில் யுபி வாரியர்ஸ் அணியை வீழ்த்தி அபார வெற்றியைப் பெற்றது. இப்போட்டியில் பேட்டிங், பந்துவீச்சில் அசத்திய நாட் ஸ்கைவர் பிரண்ட் ஆட்டநாயகி விருதை வென்றார்.