நியூசிலாந்துக்கு எதிரான இரண்டாவது டி20 போட்டியில் களமிறங்கும் ஸ்டீவ் ஸ்மித்?

நடப்பு நியூசிலாந்து டி20 தொடரில் ஸ்டீவ் ஸ்மித்திற்கு நிச்சயம் வாய்ப்பு வழங்கப்படும் என ஆஸ்திரேலிய அணியின் தலைமை பயிற்சியாளர் ஆண்ட்ரூ மெக்டொனால்ட் தெரிவித்துள்ளார்.

நியூசிலாந்துக்கு எதிரான இரண்டாவது டி20 போட்டியில் களமிறங்கும் ஸ்டீவ் ஸ்மித்? (Image Source: Google)

மிட்செல் மார்ஷ் தலைமையிலான ஆஸ்திரேலிய அணி தற்போது நியூசிலாந்தில் சுற்றுப்பயணம் மேற்கொண்டு மூன்று போட்டிகள் கொண்ட டி20 தொடரில் விளையாடி வருகிறது. இதில் இரு அணிகளுக்கும் இடையேயான முதலாவது டி20 போட்டி நேற்று வெலிங்டனில் நடைபெற்று முடிந்தது. இப்போட்டியில் ஆஸ்திரேலிய அணியானது கடைசி பந்தில் இலக்கை எட்டியதுடன் 7 விக்கெட் வித்தியாசத்தில் நியூசிலாந்தை வீழ்த்தி த்ரில் வெற்றியைப் பதிவுசெய்து அசத்தியுள்ளது. 

அதன்படி இப்போட்டியில் டாஸ் வென்று முதலில் பேட்டிங் செய்த நியூசிலாந்து அணி ரச்சின் ரவீந்திரா, டெவான் கான்வே ஆகியோரது அதிரடியின் காரணமாக 15 ரன்களைச் சேர்த்தது. இதையடுத்து இலக்கை துரத்திய ஆஸ்திரேலிய அணியில் கேப்டன் மிட்செல் மார்ஷ், டிம் டேவிட் ஆகியோர் இறுதிவரை ஆட்டமிழக்காமல் இருந்ததுடன, அணியை வெற்றிபெற வைத்து அசத்தினர். இதன்மூலம் ஆஸ்திரேலிய அணி 1-0 என்ற கணக்கில் தொடரில் முன்னிலைப் பெற்றுள்ளது. 

மேலும் நடப்பாண்டு ஜூன் மாதம் ஐசிசியின் டி20 உலகக்கோப்பை கிரிக்கெட் தொடர் நடைபெறவுள்ளது. இத்தொடருக்கு தயாராகும் முயற்சியில் தான் ஆஸ்திரேலிய அணி இத்தொடரில் விளையாடிவருகிறது. இந்நிலையில் இத்தொடருக்கான ஆஸ்திரேலிய அணியில் நட்சத்திர வீரர் ஸ்டீவ் ஸ்மித்தும் அணியில் சேர்க்கப்பட்டுள்ளார். ஆனால் முதல் போட்டிக்கான பிளேயிங் லெவனில் அவருக்கு இடம் கிடைக்கவில்லை. 

மாறாக டேவிட் வார்னர் மற்றும் டிராவிஸ் ஹெட் ஆகியோரே ஆஸ்திரேலிய அணியின் தொடக்க வீரர்களாக களமிறங்கினர். இதனால் ஸ்டீவ் ஸ்மித்திற்கு இத்தொடரில் வாய்ப்பு கிடைக்குமா என்ற கேள்விகளும் எழுந்துள்ளன. இந்நிலையில் டி20 உலகக்கோப்பை தொடருக்கான ஆஸ்திரேலிய அணி தேர்வுகளில் ஸ்டீவ் ஸ்மித்தும் இருப்பார் என்று அந்த அணியின் தலைமை பயிற்சியாளர் ஆண்ட்ரூ மெக்டொனால்ட் தெரிவித்துள்ளார். 

இதுகுறித்து பேசிய அவர், “ஸ்டீவ் ஸ்மித் டி20 உலகக்கோப்பை தொடருக்கான போட்டியில் இல்லை என்றால் அவர் இந்த நியூசிலாந்து தொடரில் இருந்திருக்க மாட்டார். அவரை விளையாட வைப்பதற்காகவே நங்கள் தேர்வுசெய்துள்ளோம். நிச்சயம் அவருக்கு இத்தொடரில் சில வாய்ப்புகள் கிடைக்கும் என்பதில் சந்தேகமில்லை. மேலும் நடைபெற்று முடிந்த ஒருநாள் உலகக்கோப்பை தொடருக்கு பின் இந்திய அணிக்கெதிரான தொடரிலும் அவருக்கு சில வாய்ப்புகள் கிடைத்தன.

 மேலும் கடந்த ஆண்டு தென் ஆப்பிரிக்கா அணிக்கெதிரான தொடரிலும் ஸ்டீவ் ஸ்மித்திற்கு வாய்ப்பளிக்க நாங்கள் திட்டமிட்டோம், ஆனால் துரதிருஷ்டவசமாக அவருக்கு அந்த நேரத்தில் மணிக்கட்டில் காயம் ஏற்பட்டது, அதனால் அவர் அந்த தொடரைத் தவறவிட்டார். ஆனாலும் அவர் நிச்சயமாக எங்களது தேர்வில் இருக்கிறார்” என்று தெரிவித்துள்ளார். இதன்மூலம் நியூசிலாந்துக்கு எதிரான இரண்டாவது டி20 போட்டிக்கான ஆஸ்திரேலிய அணியில் ஸ்டீவ் ஸ்மித் இடம்பிடிப்பார் என எதிர்பார்க்கப்படுகிறது. 

Win Big, Make Your Cricket Tales Now