AUS vs SA, 1st T20I: ரிக்கெல்டன் போராட்டம் வீண்; தென்னாப்பிரிக்காவை வீழ்த்தியது ஆஸ்திரேலியா!

தென்னாப்பிரிக்காவுக்கு எதிரான முதல் டி20 போட்டியில் ஆஸ்திரேலிய அணி 17 ரன்கள் வித்தியாசத்தில் வெற்றிபெற்று அசத்தியுள்ளது.

AUS vs SA, 1st T20I: ரிக்கெல்டன் போராட்டம் வீண்; தென்னாப்பிரிக்காவை வீழ்த்தியது ஆஸ்திரேலியா! (Image Source: Google)

AUS vs SA 1st T20I: ஆஸ்திரேலியாவுக்கு எதிரான முதல் டி20 போட்டியில் தென் ஆப்பிரிக்க அணியின் தொடக்க வீரர் ரியான் ரிக்கெல்டன் 71 ரன்களைச் சேர்த்து வெற்றிக்காக போராடிய நிலையில் மற்ற வீரர்கள் சோபிக்கத் தவறினர். 

தென்னாப்பிரிக்க அணி ஆஸ்திரேலியாவில் சுற்றுப்பயணம் செய்து 3 போட்டிகள் கொண்ட டி20 மற்றும் ஒருநாள் தொடரில் விளையாடி வருகிறது. இதில், இரு அணிகளுக்கும் இடையேயான முதல் டி20 போட்டி இன்று டார்வினில் நடைபேற்றது. இந்த போட்டியில் டாஸை வென்ற தென்னாப்பிரிக்க அணி முதலில் பந்துவீச்சை தேர்வு செய்து ஆஸ்திரேலியாவை பேட்டிங் செய்ய அழைத்தது. அதன்படி களமிறங்கிய அந்த அணியில் டிராவிஸ் ஹெட், கேப்டன் மிட்செல் மார்ஷ், ஜோஷ் இங்கிலிஸ் உள்ளிட்டோர் பெரிதாளவில் ரன்களைச் சேர்க்காமல் அடுத்தடுத்து விக்கெட்டுகளை இழந்தனர்.

பின்னர் ஜோடி சேர்ந்த கேமரூன் கிரீன் மற்றும் டிம் டேவிட் அதிரடியாக விளையாடி அணியின் ஸ்கோரை உயர்த்தினர். இதில் கிரீன் 13 பந்துகளில் 4 பவுண்டரிகள், 3 சிக்ஸர்கள் என 35 ரன்களில் விக்கெட்டை இழக்க, டிம் டேவிட் 29 பந்துகளில் தனது அரைசதத்தை பதிவுசெய்தார். அதேசமயம் மறுபக்கம் களமிறங்கிய மிட்செல் ஓவன், கிளென் மேக்ஸ்வெல் உள்ளிட்டோரும் சோபிக்க தவற டிம் டேவிட்டும் 4 பவுண்டரிகள், 8 சிக்ஸர்கள் என 83 ரன்களில் ஆட்டமிழந்தார். இதனால் ஆஸ்திரேலிய அணி 20 ஓவர்களில் அனைத்து விக்கெட்டுகளையும் இழந்து 178 ரன்களுக்கு ஆல் அவுட்டானது. 

தென் ஆப்பிரிக்க அணி தரப்பில் குவேனா மபாகா 4 விக்கெட்டுகளையும், காகிசோ ரபாடா 2 விக்கெட்டுகளையும் கைப்பற்றினர். அதன்பின் இலக்கை நோக்கி விளையாடிய தென் ஆப்பிரிக்க அணியில் கேப்டான் மார்க்ரம் 12 ரன்னிலும், லுவான் ட்ரே பிரிட்டோரியஸ் 14 ரன்னிலும், டெவால்ட் பிரீவிஸ் 2 ரன்னிலும் என ஆட்டமிழந்தனர். அதன்பின் இணைந்த ரியான் ரிக்கெல்டன் - டிரிஸ்டன் ஸ்டப்ஸ் இணை விக்கெட் இழப்பை தடுத்ததுடன், அணியின் ஸ்கோரையும் உயர்த்தின்ர். இதில் அதிரடியாக விளையாடிய ரிக்கெல்டன் தனது அரைசதத்தைப் பதிவுசெய்தார். 

மறுபக்கம் டிரிஸ்டன் ஸ்டப்ஸ் 37 ரன்களுடன் நடையைக் கட்ட, அடுத்து வந்த வீரர்களும் சோபிக்க தவறினர். பின் 7 பவுண்டரி, ஒரு சிக்ஸர் என 71 ரன்களில் ரிக்கெல்டனும் விக்கெட்டை இழக்க, தென் ஆப்பிரிக்க அணி 20 ஓவர்களில் 9 விக்கெட்டுகளை இழந்து 161 ரன்களுக்கு ஆல் அவுட்டானது. ஆஸ்திரேலிய அணி தரப்பில் ஜோஷ் ஹேசில்வுட் மற்றும் பென் துவார்ஷூயிஸ் தலா 3 விக்கெட்டுகளை கைப்பற்றின்ர். இதன் மூலம் ஆஸ்திரேலிய அணி 17 ரன்கள் வித்தியாசத்தில் தென் ஆப்பிரிக்க அணியை வீழ்த்தியதுடன் 1-0 என்ற கணக்கில் தொடரில் முன்னிலையும் பெற்றுள்ளது. 

Read More