BAN vs PAK: முக்கிய வீரர்கள் ஓய்வு; இளம் படையை களமிறக்கும் வங்கதேசம்!

பாகிஸ்தானுக்கு எதிரான டி20 தொடரில் விளையாடும் வங்கதேச அணியிலிருந்து பிரபல வங்கதேச வீரர் முஷ்ஃபிகுர் ரஹிம்மிற்கு ஓய்வளிக்கப்பட்டுள்ளது.

டி20 உலகக் கோப்பைப் போட்டியில் சூப்பர் 12 சுற்றில் வங்கதேச அணி விளையாடிய 5 ஆட்டங்களிலும் தோற்றது. அடுத்ததாக, சொந்த மண்ணில் பாகிஸ்தானுக்கு எதிராக 3 டி20, 2 டெஸ்ட் போட்டிகள் கொண்ட தொடரில் அந்த அணி விளையாடுகிறது. 

அதன்படி நவம்பர் 19 முதல் டி20 தொடரும் நவம்பர் 26 முதல் டெஸ்ட் தொடரும் தொடங்குகின்றன. இத்தொடருக்கான பாகிஸ்தான் அணியும் நேற்று அறிவிக்கப்பட்டது.

இந்நிலையில் இந்த டி20 தொடரில் விளையாடும் வங்கதேச அணி இன்று அறிவிக்கப்பட்டுள்ளது. இதில் அணியின் முக்கிய வீரராக திகழும் முஷ்பிக்கூர் ரஹிமிற்கு ஓய்வளிக்கப்பட்டுள்ளது. மேலும் உலகக்கோப்பை தொடரின் போது காயமடைந்த ஷாகிப் அல் ஹசன் இத்தொடரிலிருந்து விலகியுள்ளார். 

மேலும் செளமியா சர்கார், லிடன் தாஸ், ருபல் ஹுசைன் போன்ற வீரர்கள் அணியிலிருந்து நீக்கப்பட்டு, சயிஃப் ஹாசன், ஷஹிதுல் இஸ்லாம், யாசிர் அலி, அக்பர் அலி ஆகிய இளம் வீரர்களுக்கு இத்தொடரில் வாய்ப்பு வழங்கப்பட்டுள்ளது. 

வங்கதேச டி20 அணி: மஹ்முதுல்லா (கேப்டன்), நைம் ஷேக், நஜ்முல் ஹொசைன் ஷாந்தோ, அஃபிஃப் ஹொசைன், நூருல் ஹசன் சோஹன், மஹேதி ஹசன், அமினுல் இஸ்லாம் பிப்லப், முஸ்தபிசூர் ரஹ்மான், ஷோரிஃபுல் இஸ்லாம், தஸ்கின் அகமது, ஷமிம் ஹொசைன், நசும் அஹ்மத், சாய்ஃப் ஹொசைன், யாஷிர் அலி, சைஃப்ஹுல் இஸ்லாம், அக்பர் அலி.