BANW vs IND 2nd ODI: வங்கதேசத்தை வீழ்த்தி இந்திய அணி அபார வெற்றி!
வங்கதேச மகளிர் அணிக்கெதிரான இரண்டாவது ஒருநாள் போட்டியில் இந்திய மகளிர் அணி 108 ரன்கள் வித்தியாசத்தில் வெற்றிபெற்று அசத்தியது.
இப்போட்டியில் டாஸ் வென்ற வங்கதேச அணி முதலில் பந்துவீசுவதாக தீர்மானித்தது. அதன்படி களமிறங்கிய இந்திய அணியின் தொடக்க வீராங்கனை பிரியா புனியா 7 ரன்களுக்கும், யஸ்திகா பாட்டியா 15 ரன்களுக்கும் ஆட்டமிழக்க, மற்றொரு தொடக்க வீராங்கனையான ஸ்மிருதி மந்தனாவும் 35 ரன்களில் ஆட்டமிழந்து அரைசதம் அடிக்கும் வாய்ப்பை தவறவிட்டார்.
Trending
அதன்பின் ஜோடி சேர்ந்த கேப்டன் ஹர்மன்ப்ரீத் கவுர் - ஜெமிமா ரோட்ரிக்ஸ் இணை அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இதில் தொடர்ந்து சிறப்பாக விளையாடிய இருவரும் அரைசதம் கடந்தும் அசத்தினர். அதன்பின் 52 ரன்களில் ஹர்மன்ப்ரீத் கவுர் ஆட்டமிழந்தார்.
அதேசமயம் மறுபக்கம் சதமடிப்பார் என எதிர்பார்க்கப்பட்ட ஜெமிமா ரோட்ரிக்ஸும் 86 ரன்களில் ஆட்டமிழந்து பெவிலியனுக்கு திரும்பினார். அதன்பின் களமிறங்கிய வீராங்கனைகள் சோபிக்க தவறினர். இதனால் நிர்ணயிக்கப்பட்ட 50 ஓவர்கள் முடிவில் இந்திய மகளிர் அணி 8 விக்கெட்டுகள் இழப்பிற்கு 228 ரன்களைச் சேர்த்துள்ளது.
இதையடுத்து இலக்கை நோக்கி களமிறங்கிய வங்கதேச அணிக்கு முர்ஷிதா கதும் 12 ரன்களுக்கும், ஷார்மின் அக்தர் 2 ரன்களுக்கும், லதா மந்தல் 9 ரன்களுக்கும் என அடுத்தடுத்து ஆட்டமிழந்தனர். அதன்பின் இணைந்த ஃபர்கானா - ரிது மோனி இணை ஓரளவு தாக்குப்பிடித்து ஸ்கோரை உயர்த்தினர்.
இதில் அரைசதம் அடிப்பார் என எதிர்பார்க்கப்பட்ட ஃபர்கானா 47 ரன்களில் ஆட்டமிழக்க, அவரைத் தொடர்ந்து 27 ரன்களுக்கு ரிது மோனியும் விக்கெட்டை இழந்தார். பின்னர் களமிறங்கிய வீராங்கனைகளால் இந்திய அணியின் பந்துவீச்சுக்கு ஈடுகொடுக்க முடியாமல் அடுத்தடுத்து விக்கெட்டுகளை இழந்தனர்.
இதனால் வங்கதேச அணி 35.1 ஓவர்களில் அனைத்து விக்கெட்டுகளையும் இழந்து 120 ரன்களுக்கு ஆல் அவுட்டானது. இந்திய அணி தரப்பில் ஜெமிமா ரோட்ரிக்ஸ் 4 விக்கெட்டுகளையும், தேவிகா வைத்யா 3 விக்கெட்டுகளையும் கைப்பற்றினர். இதன்மூலம் இந்திய மகளிர் அணி 108 ரன்கள் வித்தியாசத்தில் வங்கதேச மகளிர் அணியை வீழ்த்தி அபார வெற்றியைப் பதிவுசெய்தது.
Win Big, Make Your Cricket Tales Now
