ஆஸ்திரேலியாவின் உள்ளூர் கிரிக்கெட் தொடரான பிக் பேஷ் லீக்கின் 12ஆவது சீசன் விறுவிறுப்பாக நடைபெற்று வருகிறது. இதில் இன்று நடைபெற்ற ஆட்டத்தில் மெல்போர்ன் ரெனிகேட்ஸ் - சிட்னி தண்டர் அணிகள் பலப்பரீட்சை நடத்தின. இப்போட்டியில் டாஸ் வென்ற மெல்போர்ன் ரெனிகேட்ஸ் அணி முதலில் பேட்டிங் செய்ய தீர்மானித்தது.
அதன்படி களமிறங்கிய ரெனிகேட்ஸ் அணியில் ஜேக் ஃப்ரசெர் 5 ரன்களிலும், சாம் ஹார்பர் 8 ரன்களிலும் ஆட்டமிழக்க, மறுமுனையில் அதிரடியாக விளையாடி வந்த மார்ட்டின் கப்தில் 3 பவுண்டரி, ஒரு சிக்சர் என 30 ரன்களைச் சேர்த்து விக்கெட்டை இழந்தார்.
பின்னர் களமிறங்கிய கேப்டன் ஆரோன் ஃபிஞ்ச் ஒருமுனையில் நிதானம் காட்ட, வெல்ஸ், மத்தேயு கிரிட்ச்லி ஆகியோர் அடுத்தடுத்து ஆட்டமிழந்தனர். இதையடுத்து ஃபிஞ்சும் 22 ரன்களோடு பெவிலியன் திரும்பினார். இறுதியில் சதர்லெண்ட் அதிரடியாக விளையாடி 23 பந்துகளில் 3 சிக்சர், 2 பவுண்டரி என 42 ரன்களைச் சேர்த்தார்.
