விராட் கோலிக்கு ஆதரவாக கருத்து கூறிய பிரையன் லாரா!
வெஸ்ட் இண்டீஸ் ஜாம்பவான் பிரைன் லாரா இந்திய முன்னாள் கேப்டனுக்கு பெரிய ஆதரவை கொடுத்துள்ளார்.
இந்தியாவின் நம்பிக்கை நட்சத்திர வீரர் விராட் கோலி கடந்த 2019க்குப்பின் சதமடிக்கவில்லை என்பதற்காக கடுமையான விமர்சனங்களை சந்தித்து வருகிறார். கடந்த 10 வருடங்களாக உலகின் அனைத்து இடங்களிலும் தரமான பவுலர்களையும் எதிர்கொண்டு 23000+ ரன்களையும் 70 சதங்களையும் அடித்து நிறைய சரித்திர வெற்றிகளை பெற்றுக்கொடுத்த அவர் ஏற்கனவே ஜாம்பவானாக நிரூபித்துள்ளார்.
இருப்பினும் 2019க்குப்பின் பள்ளத்தாக்கை போன்ற மிகப்பெரிய வீழ்ச்சியை சந்தித்து டெஸ்ட், ஒருநாள், டி20 மற்றும் ஐபிஎல் என அனைத்து வகையான கிரிக்கெட்டையும் சேர்த்து 100 போட்டிகளுக்கும் மேலாக அடுத்த சதமடிக்க முடியாமல் தவித்து வருகிறார்.
Trending
அதுபோக தொடர்ச்சியாக விளையாடிய களைப்பு ஆட்டத்தில் தெரிவதால் ஐபிஎல் 2022 தொடரிலிருந்து வெளியேறிய சில மாதங்கள் ஓய்வெடுத்து புத்துணர்ச்சியுடன் பார்முக்கு திரும்புமாறு ரவி சாஸ்திரி போன்ற முன்னாள் வீரர்கள் கொடுத்த ஆலோசனையை பின்பற்றாத அவர் விளையாடினால் தானே பார்முக்கு திரும்ப முடியும் என்று பதிலளித்தார். ஆனால் சொன்னது போல் தொடர்ச்சியாகவும் விளையாடாமல் இங்கிலாந்து சுற்றுப்பயணத்தில் மட்டும் விளையாடிவிட்டு அடுத்ததாக நடைபெறும் வெஸ்ட் இண்டீஸ் தொடரில் ஓய்வெடுக்கிறார்.
இதுவே ஐபிஎல் தொடராக இருந்தால் இப்படி ஓய்வெடுப்பாரா என்று அதற்காக தனியாக விமர்சனத்தையும் அவர் சந்தித்தார். இருப்பினும் 70 சதங்களை அடிப்பது சிறிய விஷயமல்ல என்ற வகையில் கெவின் பீட்டர்சன், கிரேம் ஸ்வான், ரிக்கி பாண்டிங் போன்ற வெளிநாட்டவர்கள் விமர்சனத்தையும் மிஞ்சிய பெரிய ஆதரவை விராட் கோலிக்கு கொடுத்து வருகிறார்கள்.
அந்த வரிசையில் வெஸ்ட் இண்டீஸ் ஜாம்பவான் பிரைன் லாரா இந்திய முன்னாள் கேப்டனுக்கு பெரிய ஆதரவை கொடுத்துள்ளார். இதுகுறித்து பேசிய அவர், “ஒரு வீரராக விராட் கோலியை நான் மிகவும் மதிக்கிறேன். மேலும் இந்த மோசமான தருணத்திலிருந்து அவர் முன்பை விட மிகச்சிறந்த வீரராக வெளியே வருவார். இது போன்ற கடினமான தருணத்தில் அவர் மேலும் நிறைய பாடங்களை கற்றுக் கொள்வார். எனவே அவரை நீங்கள் யாரும் வீழ்ந்துவிட்டார் என்று குறைத்து மதிப்பிட வேண்டாம்” என்று கூறினார்.
Win Big, Make Your Cricket Tales Now
