பிபிஎல் 2024-25: மேக்ஸ் பிரைண்ட், ரென்ஷா அதிரடியில் பிரிஸ்பேன் ஹீட் அணி வெற்றி!
பிக் பேஷ் லீக் 2024-25: சிட்னி தண்டர் அணிக்கு எதிரான லீக் போட்டியில் பிரிஸ்பேன் ஹீட் அணி 5 விக்கெட்டுகள் வித்தியாசத்தில் வெற்றிபெற்று அசத்தியது.
பிக் பேஷ் லீக் டி20 தொடரின் 14ஆவது சீசன் விறுவிறுப்பான கட்டத்தை எட்டியுள்ளது. இதில் இன்று நடைபெற்ற 25ஆவது லீக் ஆட்டத்தில் பிரிஸ்பேன் ஹீட் மற்றும் சிட்னி தண்டர் அணிகள் பலப்பரீட்சை நடத்தின. பிரிஸ்பேனில் நடைபெற்ற இப்போட்டியில் டாஸ் வென்ற பிரிஸ்பேன் ஹீட் அணி முதலில் பந்துவீசுவதாக அறிவித்து சிட்னி தண்டர் அணியை பேட்டிங் செய்ய அழைத்தது.
அதன்படி களமிறங்கிய சிட்னி தண்டர் அணிக்கு ஒலிவியர் டேவிஸ் - கேப்டன் டேவிட் வார்னர் இணை தொடக்கம் கொடுத்தனர். இதில் ஒலிவியர் டேவிஸ் 10 ரன்களில் விக்கெட்டை இழக்க, அடுத்து களமிறங்கிய மேத்யூ கில்க்ஸும் 20 ரன்களுடன் நடையைக் கட்டினார். அவர்களைத் தொடர்ந்து களமிறங்கிய சாம் பில்லிங்ஸ் 10 ரன்களுக்கும், ஷெர்ஃபேன் ரூதர்ஃபோர்ட் 11 ரன்களுக்கும், ஹக் வெய்ப்ஜென் 11 ரன்களுக்கும் என விக்கெட்டை இழந்தனர். அதேசமயம் மறுமுனையில் சிறப்பான ஆட்டத்தை வெளிப்படுத்திய டேவிட் வார்னர் தனது அரைசதத்தைப் பதிவுசெய்து அசத்தினார்.
Trending
பின்னர் 50 ரன்களைச் சேர்த்த கையோடு டேவிட் வார்னர் தனது விக்கெட்டை இழக்க, அடுத்து களமிறங்கிய வீரர்களில் டேனியல் கிறிஸ்டன் இறுதிவரை ஆட்டமிழக்காமல் 23 ரன்களைச் சேர்த்து அணிக்கு தேவையான ஃபினிஷிங்கைக் கொடுத்தார். இதன்மூலம் சிட்னி தண்டர் அணி 20 ஓவர்கள் முடிவில் 8 விக்கெட்டுகளை இழந்து 173 ரன்களைச் சேர்த்தது. பிரிஸ்பேன் ஹீட் அணி தரப்பில் சிறப்பான பந்துவீச்சை வெளிப்படுத்திய ஸ்பென்சர் ஜான்சன் 3 விக்கெட்டுகளையும், மைக்கேல் நேசர், மேத்யூ குஹ்னேமன் ஆகியோர் தலா 2 விக்கெட்டுகளை கைப்பற்றினர்.
இதனையடுத்து இலக்கை நோக்கி விளையாடிய பிரிஸ்பேன் ஹீட் அணிக்கு எதிர்பார்த்த தொடக்கம் கிடைக்கவில்லை. அந்த அணியின் தொடக்க வீரர் ஜேக் வுட் 2 ரன்களில் விக்கெட்டை இழக்க, அடுத்து வந்த நாதன் மெக்ஸ்வினியும் 7 ரன்களுக்கு ஆட்டமிழந்தார். அவர்களைத் தொடர்ந்து அணியின் மற்றொரு தொடக்க வீரர் காலின் முன்ரோவும் 23 ரன்களுடன் ஆட்டமிழந்தார். இதனால் அந்த அணி 43 ரன்களில் 3 விக்கெட்டுகளை இழந்து தடுமறியது. அதன்பின் ஜோடி சேர்ந்த மேத்யூ ரென்ஷா மற்றும் மேக்ஸ் பிரைண்ட் இணை அதிரடியாக விளையாடி அணியின் ஸ்கோரை உயர்த்தினர்.
Also Read: Funding To Save Test Cricket
இதில் அரைசதம் கடந்து விளையாடிய மேக்ஸ் பிரைண்ட் 7 பவுண்டரி, 4 சிக்ஸர்கள் என 72 ரன்களைச் சேர்த்து விக்கெட்டை இழக்க மறுமுனையில் இறுதிவரை ஆட்டமிழக்காமல் இருந்த மேத்யூ ரென்ஷா 48 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் பிரிஸ்பேன் ஹீட் அணி 18.5 ஓவர்களில் இலக்கை எட்டியதுடன் 5 விக்கெட் வித்தியாசத்தில் சிட்னி தண்டர் அணியை வீழ்த்தி வெற்றிபெற்றது.
Win Big, Make Your Cricket Tales Now
