CT2025: ஆன்ரிச் நோர்ட்ஜேவுக்கு மாற்றாக தென் ஆப்பிரிக்க அணியில் கார்பின் போஷ் தேர்வு!

காயம் காரணமாக சாம்பியன்ஸ் கோப்பை தொடரில் இருந்து விலகிய தென் ஆப்பிரிக்க அணியின் வேகப்பந்து வீச்சாளர் ஆன்ரிச் நோர்ட்ஜேவுக்கு பதிலாக கார்பின் போஷ் தேர்வு செய்யப்பட்டுள்ளார்.

CT2025: ஆன்ரிச் நோர்ட்ஜேவுக்கு மாற்றாக தென் ஆப்பிரிக்க அணியில் கார்பின் போஷ் தேர்வு! (Image Source: Google)

பாகிஸ்தான் மற்றும் ஐக்கிய அரபு அமீரகத்தில் நடப்பு ஐசிசி சாம்பியன்ஸ் கோப்பை கிரிக்கெட் தொடரானது வரும் பிப்ரவரி 19ஆம் தேதி முதல் நடைபெறவுள்ளது. ஒருநாள் தரவரிசையில் முதல் 8 இடங்களை பிடித்துள்ள அணிகள் நேருக்கு நேர் மோதவுள்ளதால் இத்தொடரின் மீதான எதிர்பார்ப்புகள் அதிகரித்துள்ளன. மேற்கொண்டு இத்தொடரில் பங்கேற்கும் அணிகளை அந்தந்த நாட்டு கிரிக்கெட் வாரியங்கள் அறிவித்துள்ளன. 

அந்தவகையில் இத்தொடரில் பங்கேற்கும் 15 பேர் அடங்கிய தென் ஆப்பிரிக்க அணியை தென் ஆப்பிரிக்க கிரிக்கெட் வாரியம் சமீபத்தில் அறிவித்தது. அதன்படி இந்த அணியின் கேப்டனாக டெம்பா பவுமா தொடரும் நிலையில், காயத்தால் சமீப காலங்களில் விளையாடாமல் இருந்த ஆண்ட்ரிச் நோர்ட்ஜே, லுங்கி இங்கிடி ஆகியோரும் இந்த அணியில் வாய்ப்பு வழங்கப்பட்டிருந்தது. ஆனால் இதில் ஆன்ரிச் நோர்ட்ஜே மீண்டும் காயமடைந்து இத்தொடரில் இருந்து விலகினார்.

மேற்கொண்டு நோர்ட்ஜேவுக்கு பதில் தேர்வு செய்யபட இருந்த ஜெரால்ட் கோட்ஸி பாகிஸ்தானில் நடைபெற்று வரும் முத்தரப்பு ஒருநாள் தொடரில் விளையாடும் தென் ஆப்பிரிக்க அணியில் தேர்வு செய்யப்பட்ட சில மணி நேரங்களிலேயே, பயிற்சியில் காயமடைந்து அத்தொடரில் இருந்து விலகினார். மேற்கொண்டு சாம்பியன்ஸ் கோப்பை தொடருக்கான தேர்வில் இருந்தும் ஜெரால்ட் கோட்ஸி விலகியதாக தென் ஆப்பிரிக்க கிரிக்கெட் வாரியம் அறிவித்திருந்தது. 

இந்நிலையில் சாம்பியன்ஸ் கோப்பை தொடரில் இருந்துவ் இலகிய ஆன்ரிச் நோர்ட்ஜேவுக்கு பதிலாக மற்றொரு வேகப்பந்து வீச்சாளார் கார்பின் போஷ் தென் ஆப்பிரிக்க அணியில் தேர்வு செய்யப்பட்டுள்ளதாக அந்நாட்டு கிரிக்கெட் வாரியம் அறிவித்துள்ளது. தென் ஆப்பிரிக்க அணிக்காக இதுவரை ஒரு டெஸ்ட் மற்றும் ஒரு ஒருநாள் போட்ட்டியில் மட்டுமே விளையாடியுள்ள அவர் 6 விக்கெட்டுகளையும், 121 ரன்களையும் எடுத்துள்ளார். 

அதேசமயம் சாம்பியன்ஸ் கோப்பை தொடரில் பங்கேற்கும் தென் ஆப்பிரிக்க அணியில் ரிஸர்வ் வீரராக மற்றொரு வேகப்பந்து வீச்சாளர் குவேனா மபாகா சேர்க்கப்பட்டுள்ளதாக தென் ஆப்பிரிக்க கிரிக்கெட் வாரியம் அறிவித்துள்ளது. இதையடுத்து டோனி டி ஸோர்ஸி, கார்பின் போஷ் மற்றும் குவேனா மபாகா ஆகியோர் இன்றைய தினம் பாகிஸ்தான் சென்று தென் ஆப்பிரிக்க அணியுடன் இணைவார்கள் என்றும் அறிவிக்கப்பட்டுள்ளது. 

தென் ஆப்பிரிக்க அணி: டெம்பா பவுமா (கேப்டன்), டோனி டி ஸோர்ஸி, மார்கோ ஜான்சன், ஹென்ரிச் கிளாசென், கேசவ் மகாராஜ், ஐடன் மார்க்ராம், டேவிட் மில்லர், வியான் முல்டர், லுங்கி இங்கிடி, காகிசோ ரபாடா, ரியான் ரிக்கல்டன், தப்ரைஸ் ஷம்சி, டிரிஸ்டன் ஸ்டப்ஸ், ராஸ்ஸி வான்டெர் டுசென், கார்பின் போஷ். 

ரிஸர்வ் வீரர் - குவேனா மபாகா

Win Big, Make Your Cricket Tales Now