சிபிஎல் 2024: எவின் லூயிஸ், கைல் மேயர்ஸ் அதிரடி வீண்; பேட்ரியாட்ஸை வீழ்த்தியது லூசியா கிங்ஸ்!
செயின்ட் கிட்ஸ் மற்றும் நேவிஸ் பேட்ரியாட்ஸ் அணிக்கு எதிரான லீக் போட்டியில் செயின்ட் லூசியா கிங்ஸ் அணி 5 விக்கெட் வித்தியாசத்தில் வெற்றிபெற்று அசத்தியது.
கரீபியன் பிரீமியர் லீக் டி20 கிரிக்கெட் தொடரில் இன்று நடைபெற்ற 5ஆவது லீக் ஆட்டத்தில் செயின்ட் கிட்ஸ் மற்றும் நேவிஸ் பேட்ரியாட்ஸ் மற்றும் செயின்ட் லூசியா கிங்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற செயின்ட் லூசியா கிங்ஸ் அணி முதலில் பந்துவீசுவதாக அறிவித்தது. இதனையடுத்து களமிறங்கிய பேட்ரியாட்ஸ் அணியில் கேப்டன் ஆண்ட்ரே ஃபிளெட்சர் ஒரு ரன் மட்டுமே எடுத்திருந்த நிலையில் விக்கெட்டை இழந்து பெவிலியனுக்கு நடையைக் கட்டினார். பின்னர் இணைந்த எவின் லூயிஸ் - கைல் மேயர்ஸ் இணை அதிரடியாக விளையாடி அணியின் ஸ்கோரை உயர்த்தினர்.
இதில் இருவரும் இணைந்து அடுத்தடுத்து பவுண்டரியும், சிக்ஸர்களையும் பறக்கவிட்டு அணியின் ஸ்கோரை மளமளவென உயர்த்தியதுடன், இருவரும் இணைந்து 199 ரன்கள் பார்ட்னர்ஷிப் அமைத்தும் அசத்தினர். இதில் சதமடிப்பார் என பெரிதும் எதிர்பார்க்கப்பட்ட கைல் மேயர்ஸ் 6 பவுண்டரி, 7 சிக்ஸர்கள் என 92 ரன்களைச் சேர்த்திருந்த நிலையில் விக்கெட்டை இழந்து சதமடிக்கும் வாய்ப்பை தவறவிட்டார். அதேசமயம் மறுபக்கம் இறுதிவரை ஆட்டமிழக்காமல் இருந்த எவின் லூயிஸ் 7 பவுண்டரி, 9 சிக்ஸர்கள் என சதத்தைப் பதிவுசெய்து மிரட்டினார்.
Trending
இதன்மூலம் பேட்ரியாட்ஸ் அணியானது 20 ஓவர்கள் முடிவில் 3 விக்கெட்டுகளை மட்டுமே இழந்து 201 ரன்களைக் குவித்து அசத்தியது. செயின்ட் லூசியா கிங்ஸ் தரப்பில் டேவிட் வைஸ் 2 விக்கெட்டுகளை கைப்பற்றினர். இதனையடுத்து இலக்கை நோக்கி விளையாடிய செயின்ட் லூசியா கிங்ஸ் அணிக்கு எதிர்பார்த்த தொடக்கம் கிடைக்கவில்லை. அந்த அணியின் டாப் ஆர்டர் வீரர்கள் கேப்டன் ஃபாஃப் டூ பிளெசிஸ் 2 ரன்களிலும், அகீப் 6 ரன்களிலும், ஜான்சன் சார்லஸ் 12 ரன்களிலும், ரோஸ்டன் சேஸ் 4 ரன்களிலும் என அடுத்தடுத்து விக்கெட்டுகளை இழந்து பெவிலியனுக்கு நடையைக் கட்டினர்.
பின்னர் இணைந்த பனுகா ராஜபக்க்ஷா - டிம் செய்ஃபெர்ட் இணை அதிரடியாக விளையாடி அணியின் ஸ்கோரை மளமளவென உயர்த்தியதுடன், அணியின் விக்கெட் இழப்பையும் தடுத்து நிறுத்தினர். தொடர்ந்து அபாரமாக விளையாடிய இருவரும் தங்களது அரைசதங்களைப் பதிவுசெய்து அசத்தினார். பின்னர் 6 பவுண்டரி, 4 சிக்ஸர்கள் என 68 ரன்களை எடுத்திருந்த பனுகா ராபக்க்ஷா தனது விக்கெட்டை இழந்தார். இதனையடுத்து டிம் செய்ஃபெர்டுடன் இணைந்த டேவிட் வைஸூம் அதிரடியாக விளையாட அணியின் ஸ்கோரும் மளமளவென உயர்ந்தது.
Also Read: Funding To Save Test Cricket
இதில் இறுதிவரை ஆட்டமிழக்காமல் இருந்த டிம் செய்ஃபெர்ட் 4 பவுண்டரி, 6 சிக்ஸர்கள் என 64 ரன்களையும், டேவிட் வைஸ் 2 பவுண்டரி, 2 சிக்ஸர்கள் என 34 ரன்களைச் சேர்த்து அணிக்கு வெற்றியைத் தேடிக்கொடுத்தனர். இதன் மூலம் செயின்ட் லூசியா கிங்ஸ் அணி 17.2 ஓவர்களில் இலக்கை எட்டியதுடன், செயின்ட் கிட்ஸ் மற்றும் நேவிஸ் பேட்ரியாட்ஸ் அணியை வீழ்த்தி அபார வெற்றியைப் பதிவுசெய்தது. இப்போட்டியில் செயின்ட் லூசியா கிங்ஸ் அணி வெற்றிபெற்றாலும், பேட்ரியாட்ஸ் அணி வீரர் கைல் மேயர்ஸ் இப்போட்டியின் ஆட்டநாயகனாக தேர்வுச் செய்யப்பட்டார்.
Win Big, Make Your Cricket Tales Now
