CWC 2023 Qualifiers: அமெரிக்காவை வீழ்த்தியது அயர்லாந்து!
அமெரிக்க அணிக்கெதிரான உலகக்கோப்பை தகுதிச்சுற்று ஆட்டத்தில் அயர்லாந்து அணி 6 விக்கெட் வித்தியாசத்தில் வெற்றிபெற்றது.
இதில் டாஸ் வென்ற அயர்லாந்து அணி முதலில் பந்துவீசுவதாக தீர்மானித்தது. அதன்படி களமிறங்கிய அமெரிக்க அணிக்கு ஸ்டீவ் டெய்லர் - சுஷாந்த் மதானி இணை அதிரடியான தொடக்கத்தைக் கொடுத்தனர். இதில் ஸ்டீவ் டெய்லர் 23 ரன்களில் ஆட்டமிழக்க, அடுத்து களமிறங்கிய கேப்டன் மொனாக் படேலும் முதல் பந்திலேயே விக்கெட்டை இழந்து ஏமாற்றமளித்தார்.
Trending
அதன்பின் சுஷாந்துடன் இணைந்த முக்கமல்லாவும் அதிரடியாக விளையாட அணியின் ஸ்கோரும் உயர்ந்தது. இதில் அபார ஆட்டத்தை வெளிப்படுத்திய இருவரும் அரைசதம் கடந்து அசத்தினர். பின் இருவரும் தலா 55 ரன்களை எடுத்திருந்த நிலையில் அடுத்தடுத்து விக்கெட்டுகளை இழந்தனர். இவர்களைத் தொடர்ந்து களமிறங்கிய வீரர்களாலும் எதிரணியின் பந்துவீச்சைத் தாக்குப்பிடிக்க முடியவில்லை.
இதனால் 40.2 ஓவர்களில் அமெரிக்க அணி அனைத்து விக்கெட்டுகளையும் இழந்து 196 ரன்களுக்கு ஆல் அவுட்டானது. அயர்லாந்து தரப்பில் கிரேக் யங் 3 விக்கெட்டுகளைக் கைப்பற்றினார். இதையடுத்து இலக்கை நோக்கி களமிறங்கிய அயர்லாந்து அணியில் ஆண்டி மெக்பிரையன் - பால் ஸ்டிர்லிங் இணை அதிரடியான தொடக்கத்தைக் கொடுத்து அடித்தளம் அமைத்தனர்.
இதில் ஸ்டிர்லிங் அரைசதம் கடக்க, மறுமுமுனையில் மெக்பிரையன் 35 ரன்களில் ஆட்டமிழந்தார். அவரைத் தொடர்ந்து ஸ்டிர்லிங்கும 58 ரன்களுக்கு விக்கெட்டை இழக்க, அடுத்து களமிறங்கிய ஹேரி டெக்டரும் 25 ரன்களில் விக்கெட்டை இழந்து பெவிலியன் திரும்பினார். இதையடுத்து ஜோடி சேர்ந்த கேப்டன் ஆண்ட்ரூ பால்பிர்னி - லோர்கன் டக்கர் இணை இறுதிவரை களத்தில் இருந்ததுடன் அணிக்கு வெற்றியையும் தேடிக்கொடுத்தனர்.
இதில் பால்பிர்னி 45 ரன்களையும், டக்கர் 25 ரன்களையும் சேர்த்தனர். இதன்மூலம் அயர்லாந்து அணி 34.2 ஓவர்களில் இலக்கை எட்டி, 6 விக்கெட் வித்தியாசத்தில் அமெரிக்க அணியை வீழ்த்தியது. இதில் இப்போட்டியின் வெற்றிக்கு காரணமாக இருந்த கிரேக் யங் ஆட்டநாயகனாகத் தேர்வு செய்யப்பட்டார்.
Win Big, Make Your Cricket Tales Now
