வெஸ்ட் இண்டீஸ் டி20 தொடரில் பல சாதனைகளை படைக்க காத்திருக்கும் டேவிட் வார்னர்!

வெஸ்ட் இண்டீஸ் அணிக்கெதிரான முதல் டி20 போட்டியில் விளையாடும் பட்சத்தில் ஆஸ்திரேலிய அணி டேவிட் வார்னர் தனது 100ஆவது சர்வதேச டி20 போட்டியில் களமிறங்கவுள்ளார்.

வெஸ்ட் இண்டீஸ் டி20 தொடரில் பல சாதனைகளை படைக்க காத்திருக்கும் டேவிட் வார்னர்! (Image Source: Google)

ஆஸ்திரேலியாவில் சுற்றுப்பயணம் மேற்கொண்டுள்ள வெஸ்ட் இண்டீஸ் அணி 2 டெஸ்ட், 3 ஒருநாள் மற்றும் 3 டி20 போட்டிகள் கொண்ட தொடரில் விளையாடி வருகிறது. இதில் நடைபெற்று முடிந்த டெஸ்ட் தொடரை 1-1 என்ற கணக்கில் சமன்செய்த வெஸ்ட் இண்டீஸ் அணி, அதன்பின் நடைபெற்ற ஒருநாள் தொடரை 3-0 என்ற கணக்கில் இழந்து ஆஸ்திரேலிய அணியிடம் ஒயிட்வாஷ் ஆனது.

இந்நிலையில் ஆஸ்திரேலியா - வெஸ்ட் இண்டீஸ் அணிகளுக்கு இடையேயான மூன்று போட்டிகள் கொண்ட டி20 தொடர் நாளை முதல் தொடங்குகிறது. இதில் இரு அணிகளுக்கும் இடையேயான முதலாவது டி20 போட்டி நாளை ஹாபர்ட்டில் உள்ள பெல்லரிவ் ஓவல் கிரிக்கெட் மைதானத்தில் நடைபெறவுள்ளது. இப்போட்டிக்காக இரு அணிகளைச் சேர்ந்த வீரர்களும் தீவிரமாக தயாராகி வருகின்றனர்.

இந்நிலையில் இப்போட்டியில் விளையாடுவதன் மூலம் ஆஸ்திரேலிய அணியின் நட்சத்திர தொடக்க வீரர் டேவிட் வார்னர் சர்வதேச கிரிக்கெட்டில் புதிய சாதனை ஒன்றை படைக்கவுள்ளது. ஏனெனில் இது டேவிட் வார்னர் விளையாடும் 100ஆவது சர்வதேச டி20 போட்டியாகும். இதன்மூலம் டெஸ்ட், ஒருநாள் மற்றும் டி20 கிரிக்கெட் அனை மூன்று வடிவிலான கிரிக்கெட்டிலும் 100 அல்லது அதாற்கு மேற்பட்ட போட்டிகளில் விளையாடிய மூன்றாவது வீரர் எனும் வரலாற்று சாதனையை படைக்கவுள்ளார். 

இதற்கு முன்னதாக இந்தியா வீரர் விராட் கோலி 113 டெஸ்ட், 292 ஒருநாள் மற்றும் 117 டி20 போட்டிகளிலும், நியூசிலாந்து அணியின் முன்னாள் வீரர் ராஸ் டெய்லர் 112 டெஸ்ட், 236 ஒருநாள் மற்றும் 102 டி20 போட்டிகளில் விளையாடியும் சதனைப் படைத்துள்ளனர். அந்த வரிசையில் டேவிட் வார்னர் 112 டெஸ்ட், 161 ஒருநாள் மற்றும் 99 டி20 போட்டிகளில் விளையாடியுள்ளார். நாளைய போட்டியில் வார்னர் களமிறங்கும் பட்சத்தில் அவர் இச்சாதனையை படைப்பார் என்பது குறிப்பிடத்தக்கது.

மேலும் ஆஸ்திரேலிய அணிக்காக 100 அல்லது அதற்கு மேற்பட்ட டி20 போட்டிகளில் விளையாடிய மூன்றாவது வீரர் எனும் பெருமையையும் டேவிட் வார்னர் பெறவுள்ளார். இப்போட்டியில் ஆஸ்திரேலிய அணியின் முன்னாள் கேப்டன் ஆரோன் ஃபிஞ்ச், நட்சத்திர ஆல் ரவுண்டர் கிளென் மேக்ஸ்வெல் ஆகியோர் மட்டுமே 100 சர்வதேச டி20 போட்டிகளில் விளையாடியுள்ளனர்.

இதைத்தவிர்த்து, டி20 கிரிக்கெட்டில் 1,200 பவுண்டரிகள் என்ற இலக்கை தொட, வார்னர் 10 பவுண்டரிகளை மட்டுமே அடிக்க வேண்டும். இதற்கு முன்னதாக இங்கிலாந்து அணியின் அதிரடி தொடக்க வீரர் அலெக்ஸ் ஹேல்ஸ் மட்டுமே டி20 கிரிக்கெட்டில் 1,200 பவுண்டரிகளை விளாசி சாதனை படைத்துள்ளார். இதில் தற்போது டேவிட் வார்னரின் பெயரும் இடம்பிடிப்பதற்கான வாய்ப்பு பிரகாசமாகியுள்ளது. 

அதேபோல் இத்தொடரில் டேவிட் வார்னர் 106 ரன்களைச் சேர்க்கும் பட்சத்தில் சர்வதேச டி20 கிரிக்கெட்டில் 3000 ரன்களை கடப்பார். இதன்மூலம் சர்வதேச டி20 கிரிக்கெட்டில் 3ஆயிரம் ரன்களைக் கடந்த இரண்டாவது ஆஸ்திரேலிய வீரர் மற்றும் ஏழாவது கிரிக்கெட் வீரர் எனும் பெருமையையும் டேவிட் வார்னர் பெறுவார். இதற்கு முன் ஆஸ்திரேலிய அணியின் கேப்டன் ஆரோன் ஃபிஞ்ச் மட்டுமே சர்வதேச டி20 கிரிக்கெட்டில் 3ஆயிரம் ரன்களை கடந்த வீரர் என்பது குறிப்பிடத்தக்கது. 

மேலும், டி20 கிரிக்கெட்டில் டேவிட் வார்னர் 12,000 ரன்களை எட்ட இன்னும் 140 ரன்கள் மட்டுமே தேவை. இதுவரை 366 டி20 போட்டிகளில் விளையாடியுள்ள டேவிட் வார்னர், 36.94 என்ற சராசரியுடன் 11,860 ரன்களைக் குவித்துள்ளார். இத்தொடரில் அவர் இந்த மைல்கல்லை எட்டும் பட்சத்தில், கிறிஸ் கெயில், ஷோயப் மாலிக், கீரென் பொல்லார் மற்றும் அலெக்ஸ் ஹேல்ஸ் ஆகியோருடன் டி20 கிரிக்கெட்டில் 12,000 ரன்களைக் கடந்த 5ஆவது வீரர் எனும் சாதனையை படைப்பார் என்பது குறிப்பிடத்தக்கது. 

ஆஸ்திரேலிய அணி: மிட்செல் மார்ஷ் (கே), சீன் அபோட், ஜேசன் பெஹ்ரன்டார்ஃப், டிம் டேவிட், நாதன் எல்லிஸ், ஜோஷ் ஹசில்வுட், டிராவிஸ் ஹெட், ஜோஷ் இங்கிலிஸ், கிளென் மேக்ஸ்வெல், மேத்யூ ஷார்ட், மார்கஸ் ஸ்டோனிஸ், மேத்யூ வேட், டேவிட் வார்னர், ஆடம் ஸாம்பா.