ENG vs NZ, 4th ODI: நியூசிலாந்தை வீழ்த்தி தொடரை வென்றது இங்கிலாந்து!

நியூசிலாந்துக்கு எதிரான நான்காவது ஒருநாள் போட்டியில் இங்கிலாந்து அணி 100 ரன்கள் வித்தியாசத்தில் வெற்றிபெற்றதுடன், 3-1 என்ற கணக்கில் ஒருநாள் தொடரையும் கைப்பற்றி அசத்தியது.

ENG vs NZ, 4th ODI: நியூசிலாந்தை வீழ்த்தி தொடரை வென்றது இங்கிலாந்து! (Image Source: Google)

இங்கிலாந்தில் சுற்றுப்பயணம் மேற்கொண்டுள்ள நியூசிலாந்து அணி 4 போட்டிகள் கொண்ட ஒருநாள் மற்றும் டி20 கிரிக்கெட் தொடரில் விளையாடிவருகிறது. இதில் நடைபெற்று முடிந்த டி20 தொடரில் இரு அணிகளும் தலா 2 வெற்றிகளைப் பதிவுசெய்து தொடரை சமன்செய்தன. இதைத்தொடர்ந்து நடைபெற்றுவரும் ஒருநாள் தொடரின் முதல் 3 போட்டிகளில் இங்கிலாந்து அணி இரண்டு வெற்றிகளைப் பெற்று 2-1 என்ற கணக்கில் தொடரில் முன்னிலைப் பெற்றுள்ளது. 

இந்நிலையில் இத்தொடரின் வெற்றியாளரைத் தீர்மானிக்கும் நான்காவது மற்றும் கடைசி ஒருநாள் போட்டி இன்று லண்டனிலுள்ள புகழ்பெற்ற லார்ட்ஸ் கிரிக்கெட் மைதானத்தில் நடைபெற்றது. இப்போட்டியில் டாஸ் வென்ற இங்கிலாந்து அணியின் கேப்டன் ஜோஸ் பட்லர் முதலில் பேட்டிங் செய்வதாக அறிவித்து, நியூசிலாந்தை பந்துவீச அழைத்தார்.

இதையடுத்து களமிறங்கிய இங்கிலாந்து அணிக்கு ஜானி பேர்ஸ்டோவ் - டேவிட் மாலன் இணை தொடக்கம் கொடுத்தனர். இதில் ஜானி பேர்ஸ்டோவ் 13 ரன்களில் ஆட்டமிழந்து ஏமாற்றமளிக்க, அடுத்து களமிறங்கிய ஜோ ரூட் 29, ஹாரி ப்ரூக் 10 ரன்கள் என அடுத்தடுத்து ஆட்டமிழந்து பெவிலியனுக்கு நடையைக் கட்டினர். 

அதன்பின் இணை டேவிட் மாலன் - ஜோஸ் பட்லர் இணை நிதான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் அபார ஆட்டத்தை வெளிப்படுத்தி வந்த டேவிட் மாலன் சர்வதேச ஒருநாள் கிரிக்கெட்டில் தனது 5ஆவது ஒருநாள் சதத்தைப் பதிவுசெய்து அசத்தினார். அதேசமயம் மறுப்பக்கம் அரைசதம் அடிப்பார் என எதிர்பார்க்கப்பட்ட ஜோஸ் பட்லர் 36 ரன்களுக்கு அட்டமிழந்து அரைசதம் அடிக்கும் வாய்ப்பை தவறவிட்டார்.

அவரைத்தொடர்ந்து சிறப்பான ஆட்டத்தை வெளிப்படுத்தி வந்த டேவிட் மாலன் 14 பவுண்டரி, 3 சிக்சர்கள் என 129 ரன்களைச் சேர்த்து ஆட்டமிழக்க, மறுபக்கம் களமிறங்கிய லியாம் லிவிங்ஸ்டோன் 28 ரன்களுக்கும், மொயீன் அலி 3 ரன்களுக்கும் என விக்கெட்டை இழந்து ஏமாற்றமளித்தனர். அவரைத்தொடர்ந்து அணியின் நம்பிக்கையாக பார்க்கப்பட்ட சாம் கரணும் 20 ரன்களில் விக்கெட்டை இழந்தார்.

அதன்பின் களமிறங்கிய டேவிட் வில்லி, பிரைடன் கார்ஸ் ஆகியோர் ஒரு சில பவுண்டரிகளை விளாச, இங்கிலாந்து அணி 50 ஓவர்கள் முயிவில் 9 விக்கெட்டுகளை இழந்து 311 ரன்களைச் சேர்த்தது. நியூசிலாந்து அணி தரப்பில் ரச்சின் ரவீந்திரா 4 விக்கெட்டுகளையும், டெரில் மிட்செல், மேட் ஹென்றி தலா 2 விக்கெட்டுகளையும் கைப்பற்றினர். 

இதையடுத்து கடின இலக்கை நோக்கி களமிறங்கிய நியூசிலாந்து அணியின் தொடக்க வீரர் டெவான் கான்வே  7 ரன்களுக்கு ஆட்டமிழந்து ஏமாற்றமளிக்க, பின்னர் இணைந்த வில் யங் - ஹென்றி நிக்கோலஸ் இணை ஓரளவு தாக்குப்பிடித்து ரன்களைச் சேர்த்தனர். அதன்பின் 24 ரன்களில் வில் யங் ஆட்டமிழக்க, அடுத்து களமிறங்கிய டெரில் மிட்செல் 4 ரன்களிலும், கேப்டன் டாம் லேதம் 13 ரன்களிலும் என அடுத்தடுத்து விக்கெட்டுகளை இழந்தனர். 

அதேசமயம் மறுபக்கம் அரைசதம் அடிப்பார் என எதிர்பார்க்கப்பட்ட ஹென்றி நிக்கோலஸ் 41 ரன்களில் ஆட்டமிழந்து அரைசதம் அடிக்கும் வாய்ப்பை தவறவிட்டார். இதையடுத்து களமிறங்கிய அதிரடி வீரர் கிளென் பிலீப்ஸ் 25 ரன்களில் விக்கெட்டை இழக்க, அவரைத்தொடர்ந்து வந்த கைல் ஜேமிசன் , மேட் ஹென்றி ஆகியோரும் சொற்ப ரன்களுக்கு ஆட்டமிழந்தனர். 

ஒருப்பக்கம் விக்கெட்டுகள் சரிந்தாலும் மறுமுனையில் அதிரடியாக விளையாடிய ரச்சின் ரவீந்திரா சர்வதேச ஒருநாள் கிரிக்கெட்டில் தனது முதல் அரைசதத்தைப் பதிவுசெய்து அசத்தினார். அதனைத்தொடர்ந்தும் அதிரடி காட்டிய ரச்சின் ரவீந்திரா 3 பவுண்டரி, 4 சிக்சர்கள் என 61 ரன்களைச் சேர்த்து விக்கெட்டை இழந்தார். அதன்பின் நியூசிலாந்து அணியின் டிம் சௌதீ பேட்டிங் செய்ய வராததால் போட்டி முடிவடைந்ததாக அறிவிக்கப்பட்டது.

அதன்படி நியூசிலாந்து அணி 38.2 ஓவர்கள் முடிவில் அனைத்து விக்கெட்டுகளையும் இழந்து 211 ரன்களுக்கு ஆல் அவுட்டானது. இங்கிலாந்து அணி தரப்பில் அபாரமாக பந்துவீசிய மொயீன் அலி 4 விக்கெட்டுகளை கைப்பற்றி அசத்தினார். இதன்மூலம் இங்கிலாந்து அணி 100 ரன்கள் வித்தியாசத்தில் நியூசிலாந்தை வீழ்த்தியதுடன், 3-1 என்ற கணக்கில் ஒருநாள் தொடரையும் கைப்பற்றி அசத்தியது.