ENG vs WI, 1st T20I: பட்லர், டௌசன் அசத்தல்; விண்டீஸை வீழ்த்தியது இங்கிலாந்து!
வெஸ்ட் இண்டீஸுக்கு எதிரான முதல் டி20 போட்டியில் இங்கிலாந்து அணி 21 ரன்கள் வித்தியாசத்தில் அபார வெற்றியைப் பதிவுசெய்து அசத்தியுள்ளது.
அதன்படி களமிறங்கிய இங்கிலாந்து அணிக்கு பென் டக்கெட் - ஜேமி ஸ்மித் இணை தொடக்கம் கொடுத்தனர். இதில் பென் டக்கெட் ஒரு ரன் மட்டுமே எடுத்த நிலையில் ஆட்டமிழக்கம, அடுத்து களமிறங்கிய ஜோஸ் பட்லர் அதிரடியாக விளையாடி அணியின் ஸ்கோரை உயர்த்தினார். ஜேமி ஸ்மித் - ஜோஸ் பட்லர் இணை இரண்டாவது விக்கெட்டிற்கு 80 ரன்கள் பார்ட்னர்ஷிப் அமைத்திருந்த நிலையில் 4 பவுண்டரி, 2 சிக்ஸர்களுடன் ஜேமி ஸ்மித் விக்கெட்டை இழந்தார். அவரைத்தொடர்ந்து களமிறங்கிய ஹாரி புரூக், டாம் பான்டன் ஆகியோரும் சொற்ப ரன்களில் நடையைக் கட்டினர்.
ஒருபக்கம் விக்கெட்டுகள் சரிந்த நிலையிலும், மறுமுனையில் அபாரமாக விளையாடி வந்த ஜோஸ் பட்லர் தனது அரைசதத்தைப் பூர்த்தி செய்ததுடன் 6 பவுண்டரி, 4 சிக்ஸர்கள் என 96 ரன்களில் விக்கெட்டை இழந்து சதமடிக்கும் வாய்ப்பை தவறவிட்டார். இறுதியில் ஜேக்கப் பெத்தல் 23 ரன்களைச் சேர்க்க, இங்கிலாந்து அணி 20 ஓவர்கள் முடிவில் 6 விக்கெட்டுகளை இழந்து 188 ரன்களைச் சேர்த்தது. வெஸ்ட் இண்டீஸ் அணி தரப்பில் அதிகபட்சமாக ரொமாரியோ ஷெஃபர்ட் 2 விக்கெட்டுகளையும், அல்ஸாரி ஜோசப், ஆண்ட்ரே ரஸல், ரோஸ்டன் சேஸ் தலா ஒரு விக்கெட்டையும் வீழ்த்தினர்.
அதன்பின் சவாலான இலக்கை நோக்கி களமிறங்கிய வெஸ்ட் இண்டீஸ் அணிக்கு எவின் லூயிஸ் மற்றும் ஜான்சன் சார்லஸ் இணை அதிரடியான தொடக்கத்தைக் கொடுத்தனர். இதில் ஜான்சன் சார்லஸ் 2 பவுண்டரி, ஒரு சிக்ஸர் என 18 ரன்களுக்கும், அடுத்து களமிறங்கிய கேப்டன் ஷாய் ஹோப் 3 ரன்களுக்கும் என ஆட்டமிழந்தனர். அவர்களைத் தொடர்ந்து 3 பவுண்டரி, 3 சிக்ஸர்கள் என 39 ரன்களைச் சேர்த்திருந்த எவின் லூயிஸும் விக்கெட்டை இழந்து அரைசதம் அடிக்கும் வாய்ப்பை தவறவிட்டார். பின்னர் வந்த ரூதர்ஃபோர்ட், ரோவ்மன் பவேல், ஆண்ட்ரே ரஸல் உள்ளிட்டோரும் சோபிக்க முடியவில்லை.
Also Read: LIVE Cricket Score
இதனால் வெஸ்ட் இண்டீஸ் அணி 20 ஓவர்கள் முடிவில் 9 விக்கெட்டுகளை இழந்து 167 ரன்களை மட்டுமெ சேர்த்தது. இங்கிலாந்து அணி தரப்பில் அபாரமான பந்துவீச்சை வெளிப்படுத்திய லியாம் டௌசன் 4 விக்கெட்டுகளையும், மேத்யூ பாட்ஸ் மற்றும் ஜேக்கப் பெத்தல் அகியோர் தலா 2 விக்கெட்டுகளையும் கைப்பற்றினர். இதன்மூலம் இங்கிலாந்து அணி 21 ரன்கள் வித்தியாசத்தில் வெஸ்ட் இண்டீஸை வீழ்த்தியதுடன் 1-0 என்ற கணக்கில் தொடரிலும் முன்னிலைப் பெற்றுள்ளது. இந்த போட்டியில் சிறப்பான பந்துவீச்சை வெளிப்படுத்திய லியாம் டௌசன் ஆட்டநாயகன் விருதை வென்றார்.
Win Big, Make Your Cricket Tales Now
