பரபரப்பான ஆட்டத்தில் விண்டீஸை வீழ்த்தி டி20 தொடரையும் வென்றது இங்கிலாந்து!

வெஸ்ட் இண்டீஸுக்கு எதிரான இரண்டாவது டி20 போட்டியில் இங்கிலாந்து அணி 4 விக்கெட் வித்தியாசத்தில் வெற்றி பெற்றதுடன் 2-0 என்ற கணக்கில் தொடரையும் வென்றுள்ளது.

பரபரப்பான ஆட்டத்தில் விண்டீஸை வீழ்த்தி டி20 தொடரையும் வென்றது இங்கிலாந்து! (Image Source: Google)

இங்கிலந்தில் சுற்றுப்பயணம் செய்துவரும் இங்கிலாந்து அணி தற்சமயம் மூன்று போட்டிகள் கொண்ட டி20 தொடரில் விளையாடி வருகிறது. இதில் முதல் போட்டியில் இங்கிலாந்து வெற்றிபெற்று தொடரில் முன்னிலைப் பெற்றுள்ள நிலையில், இரு அணிகளுக்கும் இடையேயான இரண்டாவது போட்டி பிரிஸ்டோலில் இன்று நடைபெற்றது.

இப்போட்டியில் டாஸ் வென்ற இங்கிலாந்து அணி பந்துவீச்சை தேர்வு செய்த நிலையில், முதலில் பேட்டிங் செய்ய களமிறங்கிய வெஸ்ட் இண்டீஸ் அணியில் எவின் லூயிஸ் முதல் பந்திலேயே விக்கெட்டை இழந்து ஏமாற்றமளித்தார். பின்னர் இணைந்த ஜான்சன் சார்லஸ் மற்றும் கேப்டன் ஷாய் ஹோப் இணை பொறுப்புடன் விளையாடி விக்கெட் இழப்பை தடுத்ததுடன் தேவைப்படும் நேரங்களில் பவுண்டரிகளை விளாசி அணியின் ஸ்கோரையும் உயர்த்தும் முயற்சியில் இறங்கினர். இதன் மூலம் இருவரும் இணைந்து இரண்டாவது விக்கெட்டிற்கு 90 ரன்கள் பார்ட்னர்ஷிப் அமைத்தனர். 

அதன்பின் அரைசதம் அடிப்பார் என எதிர்பார்க்கப்பட்ட கேப்டன் ஷாய் ஹோப் 2 பவுண்டரி, 4 சிக்ஸ்ர்கள் என 49 ரன்களில் விக்கெட்டை இழக்க, அடுத்து களமிறங்கிய ஷெர்ஃபேன் ரூதர்ஃபோர்டும் 6 ரன்களுடன் நடையைக் கட்டினார். மேற்கொண்டு அரைசதத்தை நெருங்கிய ஜான்சன் சார்லஸும் 3 பவுண்டரி, 3 சிக்ஸர்களுடன் 47 ரன்களில் பெவிலியன் திரும்ப, மறுபக்கம் அதிரடி காட்டிய ரோவ்மன் பாவெலும் 3 பவுண்டரி, 2 சிக்ஸர்களுடன் விக்கெட்டை இழந்தார். இதையடுத்து ஜோடி சேர்ந்த ஜேசன் ஹோல்டர் - ரொமாரியோ ஷெஃபர்ட் இணை அடுத்தடுத்து சிக்ஸர்களை பறக்கவிட்டு ஸ்கோரை உயர்த்தினர்.

இதில் ரொமாரியோ ஷெஃபர்ட் 2 சிக்ஸர்களுடன் 19 ரன்களில் தனது விக்கெட்டை இழக்க, இறுதிவரை ஆட்டமிழக்காமல் இருந்த ஜேசன் ஹோல்டர் 2 பவுண்டரி, 3 சிக்ஸர்களுடன் 29 ரன்களையும், ரோஸ்டன் சேஸ் சிக்ஸர் அடித்தும் அணிக்கு ஃபினிஷிங்கைக் கொடுத்தனர். இதன்மூலம் வெஸ்ட் இண்டீஸ் அணி 20 ஓவர்கள் முடிவில் 6 விக்கெட்டுகளை இழந்து 196 ரன்களைச் சேர்த்தது. இங்கிலாந்து தரப்பில் லுக் வுட் 2 விக்கெட்டுகளையும், பிரைடன் கார்ஸ், ஜேக்கப் பெத்தெல் மற்றும் ஆதில் ரஷித் ஆகியோர் தலா ஒரு விக்கெட்டையும் கைப்பற்றினர். 

இதையடுத்து சவாலான இலக்கை நோக்கி விளையாடிய இங்கிலாந்து அணியில் ஜேமி ஸ்மித் 4 ரன்களில் ஆட்டமிழந்தார். பின்னர் இணைந்த பென் டக்கெட் மற்றும் ஜோஸ் பட்லர் இருவரும் அதிரடியாக விளையாடி அணியின் ஸ்கோரை உயர்த்தும் முயற்சியில் இறங்கினர். இருவரும் இணைந்து 63 ரன்கள் பார்ட்னர்ஷிப் அமைத்திருந்த நிலையில் பென் டக்கெட் 30 ரன்களுக்கும், அரைசதத்தை நெருங்கிய ஜோஸ் பட்லர் 47 ரன்களுக்கும் என விக்கெட்டுகளை இழந்தனர். மேற்கொண்டு கேப்டன் ஹாரி புரூக் 34 ரன்களிலும், ஜேக்கப் பெத்தெல் 26 ரன்களிலும் என ஆட்டமிந்தனர். 

ஒருமுனையில் விக்கெட்டுகள் சரிந்த நிலையிலும் மறுபக்கம் அதிரடியாக விளையாடி வந்த டாம் பான்டன் 3 பவுண்டரிகள், 2 சிக்ஸர்கள் என 30 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் இங்கிலாந்து அணி 18.3 ஓவர்களில் இலக்கை எட்டியதுடன் 4 விக்கெட் வித்தியாசத்தில் வெஸ்ட் இண்டீஸை வீழ்த்தி வெற்றிபெற்றது. வெஸ்ட் இண்டீஸ் தரப்பில் அல்ஸாரி ஜோசப் 2 விக்கெட்டுகளை கைப்பற்றினார். இந்த வெற்றியின் மூலம் இங்கிலாந்து அணி மூன்று போட்டிகள் கொண்ட டி20 தொடரையும் 2-0 என்ற கணக்கில் வென்றுள்ளது.