ஃபீல்டிங்கில் தான் இன்னும் முடிசூடா மன்னன் தான் என்று நிரூபித்த ஜாண்டி ரோட்ஸ் - காணொளி!

ஆஸ்திரேலியா மாஸ்டர்ஸ் அணிக்கு எதிரான லீக் போட்டியின் போது தென் ஆப்பிரிக்க மாஸ்டர்ஸ் அணி வீரர் ஜான்டி ரோட்ஸ் தனது அபாரமான ஃபீல்டிங் மூலம் ரசிகர்களின் கவனத்தை ஈர்த்துள்ளார்.

ஃபீல்டிங்கில் தான் இன்னும் முடிசூடா மன்னன் தான் என்று நிரூபித்த ஜாண்டி ரோட்ஸ் - காணொளி! (Image Source: Google)

ஆஸ்திரேலியா மாஸ்டர்ஸ் - தென் ஆப்பிரிக்க மாஸ்டர்ஸ் அணிகளுக்கு இடையேயான லீக் போட்டி நேற்று வதோதராவில் நடைபெற்றது. இப்போட்டியில் டாஸை இழந்து முதலில் பேட்டிங் செய்த ஆஸ்திரேலிய மாஸ்டர்ஸ் அணி 20 ஓவர்கள் முடிவில் ஒரு விக்கெட் இழப்பிற்கு 260 ரன்களைச் சேர்த்தது. 

அந்த அணியில் அதிகபட்சமாக கேப்டன் ஷேன் வாட்சன் தலா 9 பவுண்டரி, 9 சிக்ஸர்களைப் பறக்கவிட்டு 122 ரன்களையும், கல்லம் ஃபெர்குசன் 11 பவுண்டரிகள், 4 சிக்ஸர்கள் என 85 ரன்களைச் சேர்த்தனர். அதன்பின் இலக்கை நோக்கி விளையாடிய தென் ஆப்பிரிக்க மாஸ்டர்ஸ் அணியில் ஹாஷிம் ஆம்லா 30 ரன்களையும், அல்விரோ பீட்டர்சென் 28 ரன்களையும் சேர்த்ததை தவிர்த்து மற்ற வீரர்கள் ரன்கள் சேர்க்க தவறினர். 

இதனால் தென் ஆப்பிரிக்க மாஸ்டர்ஸ் அணி 17 ஓவர்களிலேயே அனைத்து விக்கெட்டுகளையும் இழந்து 123 ரன்களுக்கு ஆல் அவுட்டானது. ஆஸ்திரேலிய மாஸ்டர்ஸ் அணி தரப்பில் பென் லாக்லின் 3 விக்கெட்டுகளையும், சேவியர் தோஹெர்டி, பிரைஸ் மெக்கெய்ன் தலா 2 விக்கெட்டுகளையும் கைப்பற்றினர். இதன்மூலம் ஆஸ்திரேலியா மாஸ்டர்ஸ் அணி 137 ரன்கள் வித்தியாசத்தில் தென் ஆப்பிரிக்க மாஸ்டர்ஸ் அணியை வீழ்த்தி அபார வெற்றியைப் பதிவுசெய்தது. 

இந்நிலையில் உலகின் தலை சிறந்த ஃபீல்டர்களில் முதன்மையானவராக பார்க்கப்பட்டும் தென் ஆப்பிரிக்க அணியின் முன்னாள் வீரர் ஜான்டி ரோட்ஸ், தற்போது 55 வயதை எட்டியுள்ள நிலையில் தான்னுடைய ஃபீல்டிங் திறமையால் ரசிகர்களை வியப்பில் ஆழ்த்தி தவறுவதில்லை. அந்தவகையில் நேற்றைய ஆஸ்திரேலிய மாஸ்டர்ஸ் அணிக்கு எதிரான போட்டியிலும் கூட அப்படி ஒரு ஃபீல்டிங் திறனை வெளிப்படுத்தி ரசிகர்களின் கவனத்தை ஈர்த்துள்ளார்.

Jonty Rhodes IMLT20 TheBaapsOfCricket IMLonJioHotstar IMLonCineplex pic.twitter.com/RkHp1dKqri

mdash; INTERNATIONAL MASTERS LEAGUE (imlt20official) March 7, 2025

அதன்படி இன்னிங்ஸின் 19ஆவது ஓவரின் மூன்றாவது பந்தில் ஷேன் வாட்சன் ஒரு வலுவான ஷாட்டை விளையாட அது பவுண்டரியை நோக்கி சென்றது. ஆனால்,லாங் ஆஃப் திசையில் ஃபீல்டிங் செய்து கொண்டிருந்த ஜான்டி ரோட்ஸ் அபாரமான டைவ் செய்து பந்தை நிறுத்தினார். அவரது பீல்டிங்கைக் கண்டு மக்கள் திகைத்து நின்றனர். இதன்மூலம் தான் இன்னும் ஃபீல்டிங்கில் முடிசூடா மன்னன் என்பதையும் அவர் நிரூபித்தார். இந்நிலையில் ஜான்டி ரோட்ஸின் இந்த அபாரமான ஃபீல்டிங் குறித்த காணொளி வைரலாகி வருகிறது.