முதல் டெஸ்டில் அஸ்வினுக்கு வாய்ப்பு இருக்கா? - கம்பீர் தேர்வு செய்த பிளேயிங் லெவன்!

தென் ஆப்பிரிக்க அணிக்கெதிரான முதலாவது டெஸ்ட் போட்டியில் விளையாடும் இந்திய அணியின் பிளேயிங் லெவனை முன்னாள் வீரர் கவுதம் கம்பீர் கணித்துள்ளார்.

முதல் டெஸ்டில் அஸ்வினுக்கு வாய்ப்பு இருக்கா? - கம்பீர் தேர்வு செய்த பிளேயிங் லெவன்! (Image Source: Google)

தென் ஆப்பிரிக்கா மற்றும் இந்திய அணிகளுக்கு இடையேயான 2 போட்டிகள் கொண்ட டெஸ்ட் தொடர் ரசிகர்களிடம் எதிர்பார்ப்பை ஏற்படுத்தியுள்ளது. குறிப்பாக ஆஸ்திரேலியா, இங்கிலாந்து, நியூசிலாந்து போன்ற நாடுகளில் வெற்றி வாகை சூடியுள்ள இந்தியா வரலாற்றில் தென் ஆப்பிரிக்க மண்ணில் மட்டும் 1992 முதல் இதுவரை வென்றதில்லை. எனவே அந்த மோசமான வரலாற்றை இம்முறை இந்தியா மாற்றி சரித்திரம் படைக்குமா என்ற எதிர்பார்ப்பு ரசிகர்களிடம் காணப்படுகிறது.

அதன்படி நாளை தொடங்கும் முதல் போட்டியில் 11 பேர் கொண்ட இந்திய அணியில் விளையாடப் போவது யார் என்ற எதிர்பார்ப்பும் ரசிகர்களிடம் இருக்கிறது. ஏனெனில் பொதுவாக தங்களுடைய சொந்த மண்ணில் 3 சுழல் பந்து வீச்சாளர்கள் வரை இந்தியா விளையாடுவது வழக்கமாகும். ஆனால் தென் ஆப்பிரிக்க மண்ணில் இருக்கும் மைதானங்களில் எப்போதுமே வேகப்பந்து வீச்சாளர்கள் அதிக ஆதிக்கத்தை செலுத்துவார்கள்.

அதனால் எவ்வளவு தான் உலகத்தரம் வாய்ந்த வீரர்களாக இருந்தாலும் ரவிச்சந்திரன் அஸ்வின் மற்றும் ரவீந்திர ஜடேஜா ஆகியோர் முதல் போட்டியில் ஜோடியாக விளையாடுவது சந்தேகமாகவே பார்க்கப்படுகிறது. இந்நிலையில் முதல் போட்டிக்கான தம்முடைய 11 பேர் கொண்ட இந்திய பிளேயிங் லெவனை முன்னாள் வீரர் கவுதம் கம்பீர் தேர்வு செய்துள்ளார்.

இதுகுறித்து பேசிய அவர், தொடக்க வீரர்களாக கேப்டன் ரோஹித் சர்மா மற்றும் யஷஸ்வி ஜெய்ஸ்வால் விளையாடுவார் என்று தெரிவித்துள்ளார். அதனால் 3வது இடத்தில் நீண்ட காலமாக விளையாடி வந்த புஜாராவுக்கு பதிலாக ஷுப்மன் கில் ஆடுவார் என்று தெரிவிக்கும் அவர் 4ஆவது இடத்தில் நட்சத்திர வீரர் விராட் கோலியும் 5ஆவது இடத்தில் விக்கெட் கீப்பராக கேஎல் ராகுலையும் தேர்வு செய்துள்ளார்.

அதை தொடர்ந்து 6ஆவது இடத்தில் ஸ்ரேயாஸ் ஐயரை தேர்ந்தெடுத்துள்ள அவர் ஸ்பின்னராகவும் ஆல் ரவுண்டராகவும் ரவீந்திர ஜடேஜா இருப்பார் என்று கூறியுள்ளார். இருப்பினும் பிட்ச் எப்படி இருக்கும் என்பதை பார்த்து விட்டு ரவிச்சந்திரன் அஸ்வினை சந்தேகமாக 2ஆஅவது ஸ்பின்னராக தம்முடைய அணியில் சேர்ப்பதாக தெரிவிக்கும் அவர், வேகப்பந்து வீச்சாளராக பும்ரா, பிரசித் கிருஷ்ணா, முஹம்மது சிராஜ் ஆகியோரையும் தேர்ந்தெடுத்துள்ளார்.

கவுதம் கம்பீர் தேர்வு செய்த இந்திய அணி: ரோஹித் சர்மா (கேப்டன்), யசஸ்வி ஜெயஸ்வால், ஷுப்மன் கில், விராட் கோலி, கேஎல் ராகுல் (கீப்பர்), ஸ்ரேயாஸ் ஐயர், ரவீந்திர ஜடேஜா, ரவிச்சந்திரன் அஸ்வின்/ஷர்துல் தாக்கூர், ஜஸ்ப்ரித் பும்ரா, பிரஷித் கிருஷ்ணா, முகமது சிராஜ்.