ஐபிஎல் 2023: வெளியானது போட்டி அட்டவணை; முதல் போட்டியிலேயே ரசிகர்களுக்கு விருந்து!

ஐபிஎல் தொடரின் 16ஆவது சீசன் வரும் மார்ச் 31ஆம் தேதி தொடங்கி, மே 28ஆம் தேதி வரை நடைபெறுமென ஐபிஎல் நிர்வாகக்குழு அறிவித்துள்ளது.

Gujarat Titans will take on Chennai Super Kings in the first match in IPL 2023! (Image Source: Google)

ஐபிஎல் 16ஆவது சீசனுக்கான மினி ஏலம் கடந்த டிசம்பர் 23ஆம் தேதி கொச்சியில் நடைபெற்றது.இதில் சென்னை சூப்பர் கிங்ஸ் அணி பென் ஸ்டோக்ஸையும், மும்பை இந்தியன்ஸ் அணி கேமரூன் கிரீனையும் வாங்கியது. இதில் அதிகபட்ச தொகையான ரூ. 18.50 கோடிக்கு இங்கிலாந்து ஆல் ரவுண்டர் சாம் கரனை பஞ்சாப் கிங்ஸ் அணி வாங்கியது.

சென்னை சூப்பர் கிங்ஸ் அணி பென் ஸ்டோக்ஸை தவிர்த்து அஜிங்கிய ரஹானே என்ற பெரிய வீரரை மட்டும்தான் வாங்கியது. இதனைத் தொடர்ந்து நடைபெற்ற ஐபிஎல் மீட்டிங்கில், போட்டிகள் அனைத்தும் இந்தியாவில் வழக்கம்போல உள்ளூர் மைதானங்களில்தான் போட்டிகள் நடைபெறும் என அறிவிக்கப்பட்டது.

அதாவது சென்னை சூப்பர் கிங்ஸ் அணி ஒரு அணிக்கு எதிராக ஒரு போட்டியை சேப்பாக்கத்திலும், மற்றொரு போட்டியை எதிரணியின் சொந்த மைதானத்திலும் விளையாடும். அதாவது 2019ஆம் ஆண்டில் இருந்த நடைமுறை மீண்டும் அமல்படுத்தப்பட உள்ளது.

இந்நிலையில், 16ஆவது சீசனுக்கான ஐபிஎல் அட்டவணை எப்பது வெளியாகும் என்பது குறித்து தகவல் வெளியாகியுள்ளது. அதன்படி வரும் மார்ச் மாதம் 31ஆம் தேதி இத்தொடர் ஆரம்பிக்கப்பட்டு மே மாதம் 28ஆம் தேதி முடிக்க திட்டமிடப்பட்டுள்ளது. மொத்தம் 70 போட்டிகளைக் கொண்டு இத்தொடர் நடைபெறவுள்ளது. 

அதன்படி தொடக்க ஆட்டத்தில் நடப்பு சாம்பியன் குஜராத் டைட்டன்ஸ் அணி, 4 முறை சாம்பியன் பட்டத்தை வென்ற சென்னை சூப்பர் கிங்ஸ் அணியை எதிர்கொள்கிறது. இப்போட்டி அகமதாபாத்திலுள்ள நரேந்திர மோடி கிரிக்கெட் மைதானத்தில் நடைபெறுகிறது. மேலும் தொடரின் இறுதிப்போட்டியும் இதே மைதானத்தில் நடைபெறவுள்ளது. 

ஐபிஎல் தொடரின் எல்கிளாசிகோ என்றழைக்கப்படும் சிஎஸ்கே, மும்பை இந்தியன்ஸ் அணிகளுக்கு இடையேயான போட்டிகள் ஏப்ரல் 8ஆம் தேதி மும்பையிலும், மே 6ஆம் தேதி சென்னை சேப்பாக்கம் கிரிக்கெட் மைதானத்திலும் நடைபெறவுள்ளது.