யுஸ்வேந்திர சஹால், ஷிகர் தவான் சாதனையை முறியடிப்பாரா ஹர்திக் பாண்டியா?

இங்கிலாந்து அணிக்கு எதிரான இரண்டாவது டி20 போட்டியின் மூலம் ஹர்திக் பாண்டியா சில சாதனைகளை முறியடிக்கும் வாய்ப்பை பெற்றுள்ளார்.

யுஸ்வேந்திர சஹால், ஷிகர் தவான் சாதனையை முறியடிப்பாரா ஹர்திக் பாண்டியா? (Image Source: Google)

இங்கிலாந்து அணி இந்தியாவில் சுற்றுப்பயணம் மேற்கொண்டு ஐந்து போட்டிகள் கொண்ட டி20 தொடரிலும் மற்றும் மூன்று ஒருநாள் போட்டிகள் கொண்ட ஒருநாள் தொடரிலும் விளையாடவுள்ளது. இதில் இரு அணிகளுக்கும் இடையேயான ஐந்து போட்டிகள் கொண்ட டி20 தொடரானது கடந்த ஜனவரி 22தேதி தொடங்கியது. இத்தொடரின் முதல் போட்டியில் இந்திய அணி  7 விக்கெட் வித்தியாசத்தில் அபார வெற்றியைப் பதிவுசெய்து அசத்தியுள்ளது.

இதனையடுத்து இந்தியா மற்றும் இங்கிலாந்து அணிகளுக்கு இடையேயான இரண்டாவது டி20 போட்டி இன்று (ஜனவரி 25) சென்னையில் உள்ள எம்ஏ சிதம்பரம் கிரிக்கெட் மைதானத்தில் நடைபெறவுள்ளது. இதில் இந்திய அணி ஏற்கெனவே முதல் போட்டியில் வென்றுள்ள உத்வேகத்துடன் இப்போட்டியை எதிர்கொள்ளவுள்ளது. மறுபக்கம் முந்தைய தோல்விக்கு பதிலடி கொடுக்கும் முனைப்பில் இங்கிலாந்து அணி இப்போட்டியில் விளையாடவுள்ளது. 

இந்நிலையில் இப்போட்டியில் இந்திய அணியின் நட்சத்திர ஆல்ரவுண்டர் ஹர்திக் பாண்டியா இப்போட்டியின் மூலம் பேட்டிங் மற்றும் பந்தில் சிறப்பான ஆட்டத்தை வெளிப்படுத்துவதன் மூலம் தனது பெயரில் சில சிறப்பு சாதனைகளை படைக்கும் வாய்ப்பைப் பெற்றுள்ளார். அதன்படி ஷிகர் தவான், யுஸ்வேந்திர சாஹல் ஆகியோரிசன் சாதனைகளை முறியடிக்கும் வாய்ப்பு ஹர்திக் பாண்டியாவிற்கு கிடைத்துள்ளது.

சஹால் சாதனையை முறியடிக்கும் வாய்ப்பு

இங்கிலாந்துக்கு எதிரான சர்வதேச டி20 போட்டிகளில் இந்திய அணியின் மிகவும் வெற்றிகரமான பந்து வீச்சாளர்களில் ஒருவர் ஹர்திக் பாண்டியா. அவர் இங்கிலாந்து அணிக்கு எதிராக 16 டி20 போட்டிகளில் 15 இன்னிங்ஸ்களில் விளையாடி 16 விக்கெட்டுகளை வீழ்த்தியுள்ளார். இதன்மூலம் சர்வதேச டி20 கிரிக்கெட்டில் இங்கிலாந்து அணிக்கு எதிராக அதிக விக்கெட்டுகளை வீழ்த்திய வீரர்கள் பட்டியலில் யுஸ்வேந்திர சாஹலுடன் ஹர்திக் பாண்டியா கூட்டாக முதலிடத்தில் உள்ளார்.

அந்தவகையில் இங்கிலாந்துக்கு எதிராக யுஸ்வேந்திர சஹால் 11 இன்னிங்ஸ்களில் 16 விக்கெட்டுகளை கைப்பற்றி அசத்தியுள்ளார். இந்நிலையில் இப்போட்டியில் ஹர்திக் பாண்டியா ஒரு விக்கெட்டை கைப்பற்றும் பட்சத்தில் இங்கிலாந்து அணிக்கு எதிராக அதிக டி20 விக்கெட்டுகளை வீழ்த்திய இந்திய வீரர் எனும் சாதனையைப் படைக்கும் வாய்ப்பினை பெற்றுள்ளார். இந்தப் பட்டியலில் ஜஸ்பிரித் பும்ரா மற்றும் புவனேஷ்வர் குமார் ஆகியோர் தலா 9 விக்கெட்டுகளை வீழ்த்தி இரண்டாம் இடத்தில் உள்ளனர். 

ஷிகர் தவானை முந்தும் வாய்ப்பு

இங்கிலாந்து அணிக்கு எதிரான இந்த டி20 தொடரில் ஹர்திக் பாண்டியா மேற்கொண்டு 57 ரன்களைச் சேர்க்கும் பட்சத்தில் சர்வதேச டி20 கிரிக்கெட்டில் அதிக ரன்களை குவித்த இந்திய வீரர்கள் பட்டியலில் முன்னாள் வீரர் ஷிகர் தவானின் சாதனையை முறியடிக்கும் வாய்ப்பை பெற்றுள்ளார். இதுவரை ஹார்டிக் இந்திய அணிக்காக 110 டி20 போட்டிகளில் 86 இன்னிங்ஸ்களில் விளையாடி 1703 ரன்கள் எடுத்துள்ளார்.  மறுபுறம், ஷிகர் 68 போட்டிகளில் 66 இன்னிங்ஸ்களில் 1759 ரன்கள் எடுத்துள்ளார் என்பது குறிப்பிடத்தக்கது. 

இந்திய டி20 அணி: சூர்யகுமார் யாதவ் (கேப்டன்), சஞ்சு சாம்சன் (விக்கெட் கீப்பர்), அபிஷேக் சர்மா, திலக் வர்மா, ஹர்திக் பாண்ட்யா, ரிங்கு சிங், நிதிஷ் குமார் ரெட்டி, அக்சர் படேல் (துணை கேப்டன்), ஹர்ஷித் ராணா, அர்ஷ்தீப் சிங், முகமது ஷமி, வருண் சக்ரவர்த்தி, ரவி பிஷ்னோய். .

Win Big, Make Your Cricket Tales Now