ஐபிஎல் 2021: பிராவோ சாதனையை சமன் செய்த ஹர்ஷல் பட்டேல்!

ஐபிஎல் தொடரின் ஒரே சீசனில் அதிக விக்கெட்டுகளைக் கைப்பற்றிய பந்துவீச்சாளர் எனும் டுவைன் பிராவோவின் சாதனையை ஹர்ஷல் பட்டேல் நேற்று சமன் செய்தார்.

Harshal Patel Equals Dwayne Bravo's Record Of Most Wickets In Single IPL Season (Image Source: Google)

ஐக்கிய அரபு அமீரகத்தில் நடைபெற்று வரும் ஐபிஎல் தொடரானது தற்போது இறுதி கட்டத்தை நெருங்கியுள்ளது. இதில் நேற்று நடைபெற்ற எலிமினேட்டர் சுற்றில் கொல்கத்தா நைட் ரைடர்ஸ் அணி 4 விக்கெட் வித்தியாசத்தில் ராயல் சேலஞ்சர்ஸ் பெங்களூரு அணியை வீழ்த்தி வெற்றிபெற்றது. 

 இந்த போட்டியில் பெங்களூர் அணி தோற்றிருந்தாலும் அந்த அணி சார்பாக விளையாடிய ஹர்ஷல் பட்டேல் ஐபிஎல் தொடரில் சாதனையுடன் வெளியேறியுள்ளார். அந்த சாதனை யாதெனில் நேற்றைய போட்டியில் 4 ஓவர்கள் வீசி 19 ரன்கள் விட்டுக் கொடுத்து 2 விக்கெட்டுகளை வீழ்த்திய அவர் இந்த தொடரில் மொத்தம் 32 விக்கெட்டுகளை வீழ்த்தியுள்ளார். 

இதன் மூலம் ஒரே சீசனில் அதிக விக்கெட்டுகள் எடுத்தவராக இருந்த சென்னை அணியின் ஆல்ரவுண்டர் டுவைன் பிராவோவின் சாதனையை அவர் சமன் செய்துள்ளார். கடந்த 2012 ஆம் ஆண்டு முதல் ஐபிஎல் தொடரில் விளையாடி வரும் அவர் ஒன்பது சீசன்களாக பந்துவீசி உள்ளார். 

இதுவரை 63 போட்டிகளில் விளையாடியுள்ள ஹர்ஷல் பட்டேல் 78 விக்கெட்டுகளை வீழ்த்தியுள்ளார். அதில் 32 விக்கெட்டுகள் இந்த சீசனில் எடுக்கப்பட்டவை என்பது குறிப்பிடத்தக்கது. மேலும் 2013ஆம் ஆண்டு அதிக விக்கெட்டுகளை வீழ்த்திய பிராவோ 18 போட்டிகளில் விளையாடி 32 விக்கெட்டுகளை வீழ்த்தி இருந்தார்.

ஆனால் ஹர்ஷல் பட்டேல் தற்போது 15 போட்டிகளில் மட்டுமே விளையாடி 32 விக்கெட்டுகளை வீழ்த்தி உள்ளது குறிப்பிடத்தக்கது. நேற்றைய போட்டியின் ஹர்ஷல் பட்டேல் வீசிய 17ஆவது ஓவரில் சுனில் நரைன் கொடுத்த கேட்சை படிக்கல் தவறவிட்டார். ஒருவேளை அதை அவர் பிடித்து இருந்தால் ஒரே சீசனில் அதிக விக்கெட்டுகளை வீழ்த்திய பந்துவீச்சாளர் என்ற வரலாற்று சாதனையை ஹர்ஷல் பட்டேல் படைத்திருப்பார் என்பது குறிப்பிடத்தக்கது.

Win Big, Make Your Cricket Tales Now