தி ஹண்ட்ரட் கிரிக்கெட் தொடரில் இருந்து விலகினார் கஸ் அட்கின்சன்!

தி ஹண்ட்ரட் கிரிக்கெட் தொடரின் இறுதிப்போட்டி நாளை நடைபெறவுள்ள நிலையில், ஓவல் இன்விசிபில் அணியில் இடம்பிடித்திருந்த இங்கிலாந்து வேகப்பந்து வீச்சாளர் கஸ் அட்கின்சன் தொடரில் இருந்து விலகியுள்ளார்.

தி ஹண்ட்ரட் கிரிக்கெட் தொடரில் இருந்து விலகினார் கஸ் அட்கின்சன்! (Image Source: Google)

இங்கிலாந்தில் நடைபெற்று வரும் தி ஹண்ட்ரட் கிரிக்கெட் தொடரானது இறுதிக்கட்டடத்தை எட்டியுள்ளது. இதில் சாம் பில்லிங்ஸ் தலைமையிலான ஓவல் இன்விசிபில் அணியானது முதல் அணியாக இறுதிப்போட்டிக்கு முன்னேறி அசத்தியுள்ளது. அதேசமயம் பர்மிங்ஹாம் ஃபீனிக்ஸ் மற்றும் சதர்ன் பிரேவ் அணிகள் எலிமினேட்டர் சுற்று ஆட்டத்தில் விளையாடவுள்ளன. இதில் வெற்றிபெறும் அணி இறுதிப்போட்டியில் ஓவல் இன்விசிபில் அணியுடன் பலப்பரீட்சை நடத்தவுள்ளது. 

இந்நிலையில் இப்போட்டிக்கு முன்னதாக ஓவல் இன்விசிபில் அணிக்கு பெரும் பின்னடைவு ஏற்பட்டுள்ளது. அதன்படி அந்த அணியின் நட்சத்திர வேகப்பந்து வீச்சாளர் கஸ் அட்கின்சன் இறுதிப்போட்டிக்கு முன்னதாக தி ஹண்ட்ரட் கிரிக்கெட் தொடரில் இருந்து விலகுவதாக அறிவித்துள்ளார். ஆனால் அவருக்கு காயமோ அல்லது குடும்ப சூழ்நிலை காரணமாகவோ இந்த தொடரில் இருந்து வெளியேறவில்லை என்று கூறப்படுகிறது. 

ஏனெனில் இங்கிலாந்து அணியானது இன்னும் சில தினங்களில் இலங்கை அணிக்கு எதிரான டெஸ்ட் தொடரில் விளையாடவுள்ளது. இத்தொடருக்கான இங்கிலாந்து அணியின் முக்கிய வேகப்பந்து வீச்சாளராக கஸ் அட்கின்சன் பார்க்கப்படுகிறார். இதன்காரணமாகவே அவர் தற்சமயம் தி ஹண்ட்ரட் கிரிக்கெட் தொடரில் இருந்து விலகியுள்ளதுடன், தனது பயிற்சியை மேற்கொள்வதற்காக இங்கிலாந்து அணியுடன் இணைந்துள்ளதாக கூறப்படுகிறது. 

இதன்மூலம் தி ஹண்ட்ரட் தொடரில் இருந்து விலகும் மூன்றாவது இங்கிலாந்து வீரர் இவர். முன்னதாக இத்தொடரில் இருந்து இங்கிலாந்து அணியின் டெஸ்ட் அணி கேப்டன் பென் ஸ்டோக்ஸ் மற்றும் வேகப்பந்து வீச்சாளர் கிறிஸ் வோக்ஸ் ஆகியோர் காயம் காரணமாக இத்தொடரில் இருந்து விலகியுள்ளனர். அதேசமயம் இறுதிப்போட்டிக்கு முன்னதாக கஸ் அட்கின்சன் தொடரில் இருந்து விலகியுள்ளது ஓவல் இன்விசிபில் அணிக்கு பின்னடைவாக பார்க்கப்படுகிறது. 

Win Big, Make Your Cricket Tales Now