என்னால் 5 கீ.மீ தூரத்தை 30 நிமிடங்களில் ஓட முடியும் - ஃபிட்னஸ் குறித்து சர்ஃப்ராஸ் கான்!

எனக்கு எந்த எதிர்பார்ப்பும் இல்லை. ஆனால் வாய்ப்பு கிடைத்தால் அதற்காக தயாராக இருப்பேன் என இந்திய அணியின் இளம் வீரர் சர்ஃப்ராஸ் கான் தெரிவித்துள்ளார்.

என்னால் 5 கீ.மீ தூரத்தை 30 நிமிடங்களில் ஓட முடியும் - ஃபிட்னஸ் குறித்து சர்ஃப்ராஸ் கான்! (Image Source: Google)

உள்ளூர் கிரிக்கெட்டின் ‘டான் பிராட்மேன்’ என்ற பெயரைப் பெற்றவர் சர்ஃப்ராஸ் கான். இந்தாண்டு தொடக்கத்தில் நடைபெற்ற இங்கிலாந்து டெஸ்ட் தொடரின் போது இந்திய அணிக்காக சர்வதேச டெஸ்ட் கிரிக்கெட்டில் அறிமுகமான சர்ஃப்ராஸ் கான் தனது முதல் போட்டியிலேயே அரைசதம் கடந்து ரசிகர்களில் கவனத்தை ஈர்த்தார். அதிலும் குறிப்பாக டெஸ்ட் கிரிக்கெட்டில் அதிரடியாக விளையாடும் அனுகுமுறையையும் அவர் பெற்றிருந்தது கூடுதல் சிறப்பம்சமாக பார்க்கப்பட்டது. 

இதனால் இனிவரும் டெஸ்ட் போட்டிகளுக்கான இந்திய அணியின் சர்ஃப்ராஸ் கான் தொடர்ச்சியான வாய்ப்புகளை பெறுவார் என்ற கருத்துகளும் நிலவிவருகின்றன. இந்நிலையில் இந்திய அணி அடுத்ததாக வங்கதேச அணிக்கு எதிராக சொந்த மண்ணில் இரண்டு போட்டிகள் கொண்ட டெஸ்ட் தொடரில் விளையாடவுள்ளது. இத்தொடருக்கான இந்திய அணியிலும் சர்ஃப்ராஸ் கான் இடம்பிடிப்பார் என்ற எதிர்பார்ப்புகள் உள்ளன.

மேற்கொண்டு இத்தொடருக்காக தயாராகும் வகையில் இந்திய அணி வீரர்கள் தற்சமயம் உள்ளூர் போட்டிகளில் இடம்பிடித்து விளையாடி வருகின்றனர். அதிலும் தமிழ்நாட்டில் நடைபெற்றுவரும் புஜ்ஜி பாபு கோப்பை தொடர் மற்றும் துலீப் கோப்பை கிரிக்கெட் தொடர்களில் விளையாடவுள்ளனர். இதில் சர்ஃப்ராஸ் கான் புஜ்ஜிபாபு கோப்பை தொடர் மற்றும் தூலீப் கோப்பை தொடருக்கான அணிகளில் இடம்பிடித்துள்ளார். 

இந்நிலையில் சமீபத்தில் சர்ஃப்ராஸ் கான் அளித்துள்ள பேட்டியில் தனது ஃபிட்னஸ் குறித்து, தனது பயிற்சி குறித்தும் கூறியுள்ளார். இதுகுறித்து பேசிய அவர், “எனக்கு கிரிக்கெட்டில் ஆஃப் சீசன் என்று எதுவும் இல்லை. நான் அதிகாலை 4.15 மணிக்கு எழுந்து, 4.30 மணிக்கு நீண்ட தூர ஓட்ட பயிற்சியுடன் எனது நாளைத் தொடங்குவேன். எனது உடற்தகுதியை மேம்படுத்த இது மிகவும் உதவியாக இருந்தது, ஏனெனில் மாத இறுதியில் என்னால் 30-31 நிமிடங்களில் 5 கிமீ ஓட முடிந்தது.

எனது ஓட்ட பயிற்சியை முடித்தவுடன், நான் ஜிம்மிற்கு செல்வேன். அதனால் நாளின் முதல் பாதி உடற்பயிற்சி மற்றும் பீல்டிங் பயிற்சிக்காக ஒதுக்ககியுள்ளேன். அதன்பின் மாலையில் எனது பேட்டிங் பயிற்சியை தொடங்குவேன். நான் வங்கதேச தொடரை கருத்தில் கொண்டு இதனை கூறவில்லை. ஆனால் தொடர்ந்து எனது செயல்முறையைப் பின்பற்றி தயாராக இருக்க வேண்டும். எனக்கு எந்த எதிர்பார்ப்பும் இல்லை. ஆனால் வாய்ப்பு கிடைத்தால் அதற்காக தயாராக இருப்பேன்” என்று தெரிவித்துள்ளார். 

இந்திய அணிக்காக 2024ஆம் ஆண்டு அறிமுகமான சர்ஃப்ராஸ் கான் இதுவரை 3 போட்டிகளில் விளையாடி 3 அரைசதங்களுடன் 200 ரன்களைச் சேர்த்துள்ளார். அதேசமயம் முதல் தர கிரிக்கெட்டில் 48 போட்டிகளில் விளையாடியுள்ள சர்ஃப்ராஸ் கான் 14 சதம், 14 அரைசதங்கள் என மொத்தம் 4,112 ரன்களைக் குவித்துள்ளார். இதில் அவரது சராசரியானது 68.53ஆக உள்ளது. அவரது அதிகபட்ச ஸ்கோராக 300 ரன்களை அடித்துள்ளார். 

Win Big, Make Your Cricket Tales Now