ஐஎல்டி20: ஹெட்மையரின் சிக்சர் மூலம் கல்ஃப் ஜெயண்ட்ஸ் த்ரில் வெற்றி!

எம்ஐ எமிரேட்ஸுக்கு எதிரான ஐஎல்டி20 லீக் கல்ஃப் சூப்பர் ஜெயண்ட்ஸ் அணி 5 விக்கெட் வித்தியாசத்தில் த்ரில் வெற்றியைப் பதிவுசெய்தது.

ILT20: Hetmyer Hits Last-ball Six As MI Emirates Go Down Narrowly To Gulf Giants (Image Source: Google)

ஐக்கிய அரபு அமீரகத்தில் நடைபெற்றுவரும் முதல் சீசன் இன்டர்நேஷ்னல் லீக் டி20 தொடர் விறுவிறுப்பாக நடைபெற்றுவருகிறது. இதில் நேற்று நடைபெற்ற 24ஆவது லீக் ஆட்டத்தில் கல்ஃப் ஜெயண்ட்ஸ் - எம்ஐ எமீரேட்ஸ் அணிகள் பலப்பரீட்சை நடத்தின. இதில் டாஸ் வென்ற கல்ஃப் ஜெயண்ட்ஸ் அணி பந்துவீச்சை தேர்வு செய்தது.

இதையடுத்து களமிறங்கிய எமிரேட்ஸ் அணியில் ஆண்ட்ரே ஃபிளெட்சர், பசில் ஹமீத் ஆகியோர் சொற்ப ரன்களுக்கு ஆட்டமிழந்து பெவிலியனுக்கு திரும்பினர். பின்னர் ஜோடி சேர்ந்த முகமது வாசீம் - நிக்கோலஸ் பூரன் இணை அதிரடியாக விளையாடி அணியின் ஸ்கோரை உயர்த்தினர்.

பின் முகமது வாசீம் 29 ரன்களில் ஆட்டமிழக்க, மறுமுனையில் அரைசதம் அடிப்பார் என எதிர்பார்க்கப்பட்ட நிக்கோலஸ் பூரன் 42 ரன்களில் விக்கெட்டை இழந்தார். அதன்பின் வந்த கேப்டன் பொல்லார்ட், நஜிபுல்லா ஸத்ரான், டுவைன் பிராவோ ஆகியோரும் சொற்ப ரன்களுக்கு விக்கெட்டை இழந்தனர்.

இதனால் 19.5 ஓவர்களில் எம் ஐ எமிரேட்ஸ் அணி அனைத்து விக்கெட்டுகளையும் இழந்து 139 ரன்களுக்கு ஆல் அவுட்டானது. கல்ஃப் ஜெயண்ட்ஸ் அணி தரப்பில் கிறிஸ் ஜோர்டன் 3 விக்கெட்டுகளையும், டேவிட் வைஸ், டோமினிக் டார்க்ஸ், ரெஹன் அஹ்மத் தலா 2 விக்கெட்டுகளையும் கைப்பற்றினர். 

இதையடுத்து இலக்கை நோக்கி களமிறங்கிய கல்ஃப் ஜெயண்ட்ஸ் அணியில் டாம் பாண்டன் - ஜேம்ஸ் வின்ஸ் அதிரடி ஆட்டத்தை வெளிப்படுத்தி அடித்தளத்தை அமைத்துக்கொடுத்தனர். பின் ஜேம்ஸ் வின்ஸ் 26 ரன்களில் ஆட்டமிழக்க, அரைசதமடிப்பார் என எதிர்பார்க்கப்பட்ட டாம் பாண்டமன் 45 ரன்களுக்கு விக்கெட்டை இழந்தார்.

பின்னர் வந்த கிறிஸ் லின் 28 ரன்களிலும், எராஸ்மஸ் 20 ரன்களுக்கும் ஆட்டமிழக்க, கல்ஃப் ஜெயண்ட்ஸ் அணியின் வெற்றிக்கு கடைசி பந்தில் 3 ரன்கள் தேவைப்பட்டது. அதனை எதிர்கொண்ட ஷிம்ரான் ஹெட்மையர் சிக்சர் விளாசி அணிக்கு வெற்றியைத் தேடிக்கொடுத்தார். இதன்மூலம் கல்ஃப் ஜெயண்ட்ஸ் அணி கடைசி பந்தில் இலக்கை எட்டி 5 விக்கெட் வித்தியாசத்தில் த்ரில் வெற்றியைப் பதிவுசெய்தது.

Win Big, Make Your Cricket Tales Now