NZ vs IND:ஹர்திக் பாண்டியா அற்புதமான ஒரு தலைவர் - விவிஎஸ் லக்ஷ்மண் புகழாரம்!

இந்திய கிரிக்கெட் அணியின் பொறுப்பு கேப்டன் பாண்டியாவுக்கு இந்திய அணியின் தலைமை பயிற்சியாளர் லக்ஷ்மண் புகழாரம் சூட்டியுள்ளார்.

IND vs NZ: VVS Laxman lavishes praise on Hardik Pandya, says he is fabulous leader (Image Source: Google)

நியூசிலாந்தில் சுற்றுப்பயணம் மேற்கொண்டுள்ள இந்திய கிரிக்கெட் அணி மூன்று போட்டிகள் கொண்ட டி20 மற்றும் ஒருநாள் தொடர்களில் விளையாடுகிறது.இதில் இவ்விரு அணிகளுக்கும் இடையேயான முதலாவது டி20 போட்டி இன்று வெலிங்டனில் நடைபெறுகிறது.

சமீபத்தில் ஆஸ்திரேலியாவில் நடந்து முடிந்த டி20 உலகக்கோப்பை தொடரில் விளையாடிய இந்திய அணியின் கேப்டன் ரோஹித் சர்மா, விராட் கோலி, கேஎல் ராகுல், தினேஷ் கார்த்திக், ரவிச்சந்திரன் அஸ்வின் உள்ளிட்ட மூத்த வீரர்களுக்கு இந்த தொடரில் ஓய்வளிக்கப்பட்டுள்ளதால், ஹர்திக் பாண்டியா தலைமையில் களமிறங்கும் இந்திய அணியில் இளம் வீரர்களுக்கு வாய்ப்பளிக்கப்பட்டுள்ளது.

இதனிடையே நியூசிலாந்து தொடருக்கு இந்திய அணியின் தலைமை பயிற்சியாளராக செயல்படும் முன்னாள் வீரர் விவிஎஸ் லக்ஷ்மண் நேற்று செய்தியாளர்களுக்கு அளித்த பேட்டியில், “ஹர்திக் பாண்டியா அற்புதமான ஒரு தலைவர். ஐபிஎல் கிரிக்கெட்டில் குஜராத் டைட்டன்ஸ் அணியை வழிநடத்திய முதலாவது ஆண்டிலேயே கோப்பையை வென்று சாதித்ததற்காக மட்டும் இதை கூறவில்லை. அயர்லாந்து தொடரில் இருந்து அவரிடம் நிறைய நேரம் செலவிட்டுள்ளேன். அவரது யுக்திகள் சிறப்பாக உள்ளன. 

அது மட்டுமின்றி களத்தில் பதற்றமின்றி அமைதியாக செயல்படுகிறார். சர்வதேச போட்டிகளில் விளையாடும் போது நெருக்கடியான சூழலில் இது போன்று பொறுமையுடன் செயல்படுவது மிகவும் முக்கியமானது. வீரர்களின் ஓய்வறையில் அவர் நடந்து கொள்ளும் விதமும் அருமை. ஹர்திக் பாண்டியா வீரர்களுக்கான கேப்டன். வீரர்கள் அவரை எளிதில் அணுகி பேசுவதுடன் தங்களது எண்ணங்களை வெளிப்படையாக சொல்கிறார்கள்.

சர்வதேச டி20 கிரிக்கெட்டில் அணியை முன்னெடுத்து செல்ல அந்த வடிவிலான போட்டிக்குரிய சிறப்பு வாய்ந்த வீரர்கள் தேவையாகும். டி20 கிரிக்கெட்டை பொறுத்தவரை பன்முகத் திறமை கொண்ட வீரர்கள் அவசியமாகும். அதாவது பேட்ஸ்மேன்கள் பந்து வீச வேண்டும். பவுலர்கள் பேட்டிங் செய்யக்கூடியவராக இருக்க வேண்டும். பவுலர்கள் ஓரளவு பேட்டிங் செய்யும் போது முன்வரிசை வீரர்கள் இன்னும் சுதந்திரமாக விளையாட முடியும்” என்று தெரிவித்தார். 

Win Big, Make Your Cricket Tales Now