INDW vs WIW, 1st T20I: விண்டீஸை வீழ்த்தி இந்திய அணி அபார வெற்றி!

வெஸ்ட் இண்டீஸ் மகளிர் அணிக்கு எதிரான முதல் டி20 போட்டியில் இந்திய மகளிர் அணி 49 ரன்கள் வித்தியாசத்தில் வெற்றிபெற்று அசத்தியது.

INDW vs WIW, 1st T20I: விண்டீஸை வீழ்த்தி இந்திய அணி அபார வெற்றி! (Image Source: Google)

இந்தியாவில் சுற்றுப்பயணம் மேற்கொண்டுள்ள வெஸ்ட் இண்டீஸ் மகளிர் அணி மூன்று போட்டிகள் கொண்ட ஒருநாள் மற்றும் டி20 தொடர்களில் விளையாடவுள்ளது. இதில் இவ்விரு அணிகளுக்கும் இடையேயான மூன்று போட்டிகள் கொண்ட டி20 தொடரானது இன்று (டிசம்பர் 15) முதல் தொடங்கியது. அதன்படி நவி மும்பையில் நடைபெற்ற இந்தியா - வெஸ்ட் இண்டீஸ் மகளிர் அணிகளுக்கு இடையேயான முதல் டி20 போட்டியில் டாஸ் வென்ற வெஸ்ட் இண்டீஸ் அணி முதலில் பந்துவீசுவதாக அறிவித்தது. 

இதனையடுத்து களமிறங்கிய இந்திய மகளிர் அணிக்கு ஸ்மிருதி மந்தனா மற்றும் உமா சேத்ரி இணை தொடக்கம் கொடுத்தனர். இருவரும் இணைந்து ஆரம்பம் முதலே அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இதில் சிறப்பான ஆட்டத்தை வெளிப்படுத்திய இருவரும் இணைந்து முதல் விக்கெட்டிற்கு 50 ரன்கள் பார்ட்னர்ஷிப் அமைத்த நிலையில் உமா சேத்ரி 24 ரன்களில் தனது விக்கெட்டை இழந்து பெவிலியன் திரும்பினார்.அதன்பின் மந்தனாவுடன் இணைந்த ஜெமிமா ரோட்ரிக்ஸும் அதிரடியாக விளையாடிய நிலையில் அணியின் ஸ்கோரும் மளமளவென உயர்ந்தது.

இதில் அபாரமாக விளையாடிய ஸ்மிருதி மந்தனா தனது அரைசதத்தைப் பதிவுசெய்து அசத்தினார். பின்னர் 7 பவுண்டரி, 2 சிக்ஸர்கள் என 54 ரன்களை எடுத்த நிலையில் ஸ்மிருதி மந்தனா தனது விக்கெட்டை இழக்க, அடுத்து களமிறங்கிய ரிச்சா கோஷும் 20 ரன்களுடன் விக்கெட்டை இழந்து பெவிலியனுக்கு நடையைக் கட்டினார். அதேசமயம் மறுபக்கம் சிறப்பான ஆட்டத்தை வெளிப்படுத்திய ஜெமிமா ரோட்ரிக்ஸ் தனது அரைசதத்தைப் பதிவுசெய்து அசத்தினார். அத்துடன் நிற்காத அவர் இறுதிவரை களத்தில் இருந்து 9 பவுண்டரிகள், 2 சிக்ஸர்கள் என 73 ரன்களைச் சேர்த்து விக்கெட்டை இழந்தார்.  

இறுதியில் கேப்டன் ஹர்மன்ப்ரீத் கவுர் 13 ரன்களையும், சஜீவன் சஜனா ஒரு ரன்னையும் சேர்க்க இந்திய மகளிர் அணி 20 ஓவர்கள் முடிவில் 4 விக்கெட்டுகளை மட்டுமே இழந்து 195 ரன்களைக் குவித்தது. வெஸ்ட் இண்டீஸ் அணி தரப்பில் கரிஷ்மா ராம்ஹராக் 2 விக்கெட்டுகளையும், டியாண்டிரா டோட்டின் ஒரு விக்கெட்டையும் கைப்பற்றினர். இதனையடுத்து 196 ரன்கள் எடுத்தால் வெற்றி என்ற கடின இலக்கை நோக்கி விளையாடிய வெஸ்ட் இண்டீஸ் மகளிர் அணியில் கேப்டனும் தொடக்க வீராங்கனையுமான ஹீலி மேத்யூஸ் ஒரு ரன்னிலும், அடுத்து களமிறங்கிய ஷமைன் கேம்பெல் 13 ரன்னிலும் என விக்கெட்டை இழந்தார். 

பின்னர் ஜோடி சேர்ந்த கியானா ஜோசப் மற்றும் டியாண்ட்ரா டோட்டின் இணை பொறுப்புடன் விளையாடி விக்கெட் இழப்பை தடுத்ததுடன், அணியின் ஸ்கோரையும் மளமளவென உயர்த்தினர்.தொடர்ந்து அபார ஆட்டைத்தை வெளிப்படுத்திய இருவரும் இணைந்து 50 ரன்களுக்கு மேல் பார்ட்னர்ஷிப் அமைத்தும் அசத்தினர். அதன்பின் அதிரடியாக விளையாடி வந்த கியானா ஜோசப் அரைசதம் அடிப்பார் என எதிர்பார்க்கப்பட்ட நிலையில் 5 பவுண்டரி, 3 சிக்ஸர்கள் என 49 ரன்னில் விக்கெட்டை இழக்க, மறுபக்கம் அரைசதம் கடந்திருந்த டியாண்டிரா டோட்டினும் 4 பவுண்டரி, 3 சிக்ஸர்கள் என 52 ரன்னில் விக்கெட்டை இழந்தார். 

அதன்பின் களமிறங்கிய ஷபிக கஜ்னபி ஒருபக்கம் நிதானமாக விளையாடிய நிலையில், மறுபக்கம் களமிறங்கிய சினெல்லே ஹென்றி 7 ரன்னிலும், அஃபி ஃபிளெட்சர் ரன்கள் ஏதுமின்றியும், ஜைடா ஜேம்ஸ் 5 ரன்னிலும் என விக்கெட்டை இழந்தனர். இதனால் வெஸ்ட் இண்டீஸ் மக்ளிர் அணி 20 ஓவர்கள் முடிவில் 7 விக்கெட்டுகளை இழந்து 146 ரன்களை மட்டுமே சேர்த்தது. இந்திய அணி தரப்பில் டைட்டாஸ் சாது 3 விக்கெட்டுகளையும், தீப்தி சர்மா, ராதா யாதவ் தலா 2 விக்கெட்டுகளை வீழ்த்தினர். இதன்மூலம் இந்திய மகளிர் அணி 49 ரன்கள் வித்தியாசத்தில் வெஸ்ட் இண்டீஸை வீழ்த்தி வெற்றிபெற்றது. 

Win Big, Make Your Cricket Tales Now