ஐபிஎல் திருவிழா 2021: முதல் வெற்றிக்காக போராடும் மும்பை; வெற்றிப்பாதயை தக்கவைக்கு முனையும் கேகேஆர்!

ஐபிஎல் தொடரின் 14ஆவது சீசன் கடந்த ஏப்ரல் 9ஆம் தேதி தொடங்கியது. இந்நிலையில், இந்தத் தொடரின் ஐந்தாவது லீக் ஆட்டம், சென்னை சேப்பாக்கம் மைதானத்தில் இன்றிரவு 7.30 மணிக்கு நடைபெறவுள்ளது.

இதில், ரோஹித் சர்மா தலைமையிலான மும்பை இந்தியன்ஸ் அணியும், ஈயான் மோர்கன் தலைமையிலான கொல்கத்தா நைட் ரைடர்ஸ் அணியும் மோதுகின்றன. முதல் போட்டியில் பெங்களூரு அணியிடம் தோல்வியைச் சந்தித்த மும்பை அணி, இம்முறை வெற்றியைப் பதிவுசெய்ய வேண்டும் என்ற முனைப்பில் உள்ளது.

அதேபோல, ஹைதராபாத் அணியைத் தோற்கடித்த கொல்கத்தா அணி, வெற்றிக் கணக்கைத் தக்கவைத்திட முயற்சி செய்யும். ஆனால், ஐந்து முறை சாம்பியனான மும்பையை எதிர்கொள்வதும் எளிது கிடையாது. இரு அணிகளும் வெற்றிக்குக் கடுமையாக மல்லுக்கட்டும் என்பதால் இந்த ஆட்டத்தில் பரபரப்புக்குப் பஞ்சம் இருக்காது.

இதுவரை இவ்விரு அணிகளும் இதுவரை 27 முறை நேருக்கு நேர் மோதியுள்ளன. அதில், மும்பை 21 முறையும், கொல்கத்தா ஆறு முறையும் வெற்றிபெற்றுள்ளன. 

மேலும் மும்பை அணியின் நட்சத்திர வீரர் குயின்டன் டி காக்கின் தனிமைப்படுத்துதல் காலம் முடிவடைந்துள்ளதால் இன்றையப் போட்டியில் அவர் விளையாடுவதற்கான வாய்ப்புகள் அதிகம். அதேசமயம் தோள்பட்டை காயம் காரணமாக அவதி பட்டுவரும் ஹர்திக் பாண்டியா இன்றைய போட்டியில் விளையாடுவாரா என்ற சந்தேகம் ரசிகர்கல் மத்தில் அதிகரித்துள்ளது. 

கொல்கத்தா அணி தரப்பில் சுனில் நரைன் இன்றைய போட்டியில் களமிறங்குவதற்கான வாய்ப்புகள் அதிகம் என்றே எதிர்பார்க்கப்படுகிறது. ஏனெனில் ரோஹித் சர்மாவுக்கு எதிராக சிறப்பான சராசரியை நரைன் வைத்துள்ளார் என்பது குறிப்பிடத்தக்கது.

உத்தேச அணி 

மும்பை இந்தியன்ஸ்: ரோஹித் சர்மா, கிறிஸ் லின்/டி காக், சூர்யகுமார் யாதவ், இஷான் கிஷான், ஹர்திக் பாண்டியா, பொல்லார்ட், குர்னால் பாண்டியா, ராகுல் சஹார், மார்கோ ஜன்சென், ட்ரெண்ட் போல்ட், ஜஸ்பிரித் பும்ரா.

கேகேஆர்: நிதிஷ் ராணா, சுப்மன் கில், ராகுல் திரிபாதி, ஈயான் மோர்கன், ஆண்ட்ரே ரஸ்ஸல், தினேஷ் கார்த்திக், ஷகிப் அல் ஹசன்/ சுனில் நரைன், பாட் கம்மின்ஸ், ஹர்பஜன் சிங், பிரஷித் கிருஷ்ணா, வருண் சக்ரவர்த்தி.

Win Big, Make Your Cricket Tales Now