ஐபிஎல் 2023: மேக்ஸ்வெல், ஃபாஃப் அதிரடி; மும்பைக்கு 200 டார்கெட்!

மும்பை இந்தியன்ஸுக்கு எதிரான ஐபிஎல் லீக் ஆட்டத்தில் முதலில் பேட்டிங் செய்த ராயல் சேலஞ்சர்ஸ் பெங்களூரு அணி 200 ரன்களை இலக்காக நிர்ணயித்துள்ளது.

IPL 2023: A composed set of knocks from the RCB batters to put up a score of 199 runs for MI to chas (Image Source: Google)

ஐபிஎல் தொடரின் 16ஆவது சீசன் இறுதிக்கட்டத்தை நெருங்கியுள்ளது. இதில் இன்று நடைபெற்றுவரும் 54ஆவது லீக் ஆட்டத்தில் மும்பை இந்தியன்ஸ் - ராயல் சேலஞ்சர்ஸ் பெங்களூரு அணிகள் பலப்பரீட்சை நடத்திவருகின்றன. இப்போட்டியில் டாஸ் வென்ற மும்பை இந்தியன்ஸ் அணி முதலில் பந்துவீச தீர்மானித்தது. 

அதன்படி ஆர்சிபி அணியின் தொடக்க வீரர்களாக கேப்டன் ஃபாஃப் டூ பிளெசிஸ் - விராட் கோலி இணை களமிறங்கினர். இதில் விராட் கோல் ஒரு ரன்னிலும், அனுஜ் ராவத் 6 ரன்களிலும் என அடுத்தடுத்து பெஹ்ரன்டோர்ஃப் பந்துவீச்சில் ஆட்டமிழந்து பெவிலியன் திரும்பினர். 

இதையடுத்து இணைந்த ஃபாஃப் டூ பிளெசிஸ் - கிளென் மேக்ஸ்வெல் ஜோடி அதிரடியான ஆட்டத்தை வெளிப்படுத்தி மும்பை இந்தியன்ஸ் பந்துவீச்சாளர்களை வெளுத்துவாங்கினர். தொடர்ந்து அபாரமாக விளையாடி மேக்ஸ்வெல் 25 பந்துகளிலும், டூ பிளெசிஸ் 30 பந்துகளிலும் என அடுத்தடுத்து தங்களது அரைசதங்களையும் பதிவுசெய்து அசத்தினர். 

பின் 33 பந்துகளில் 8 பவுண்டரி, 4 சிக்சர்கள் என 68 ரன்களைக் குவித்திருந்த மேக்ஸ்வெல் ஆட்டமிழக்க, அவரைத்தொடர்ந்து 5 பவுண்டரி, 3 சிக்சர்கள் என 65 ரன்களை எடுத்திருந்த ஃபாஃப் டூ பிளெசிஸும் விக்கெட்டை இழந்தார். அடுத்து களமிறங்கிய மஹிபால் லோமரோரும் ஒரு ரன்னுடன் அட்டமிழந்து ஏமாற்றமளித்தார். 

அதன்பின் இணைந்த தினேஷ் கார்த்திக் - கேதர் ஜாதவ் இணையும் சிறப்பான ஆட்டத்தை வெளிப்படுத்தினர். இதில் தினேஷ் கார்த்திக் 18 பந்துகளில் 4 பவுண்டரி, ஒரு சிக்சர் என 30 ரன்களை எடுத்த நிலையில் ஆட்டத்தின் முக்கியமான கட்டத்தில் விக்கெட்டை இழந்தார். 

இறுதியில் நிர்ணயிக்கப்பட்ட 20 ஓவர்கள் முடிவில் 6 விக்கெட் இழப்பிற்கு 199 ரன்களைச் சேர்த்தது. மும்பை அணி தரப்பில் ஜேசன் பெஹ்ரன்டோர்ஃப் 3 விக்கெட்டுகளையும், கேமரூன் க்ரீன், கிறிஸ் ஜோர்டன், குமார் கார்த்திகேயா தலா ஒரு விக்கெட்டையும் கைப்பற்றினர்.