ஐபிஎல் 2023: பட்லர் அரைசதம்; சிஎஸ்கேவிற்கு 176 டார்கெட்!

சென்னை சூப்பர் கிங்ஸிற்கு எதிரான ஐபிஎல் லீக் ஆட்டத்தில் முதலில் பேட்டிங் செய்த ராஜஸ்தான் ராயல்ஸ் அணி 176 ரன்களை இலக்காக நிர்ணயித்துள்ளது.

IPL 2023: Jos Buttler's fifty and Shimron Hetmyer's finishing cameo guided RR to a healthy total in (Image Source: Google)

ஐபிஎல் தொடரின் 16ஆவது சீசன் நாளுக்கு நாள் விறுவிறுப்பாக நடைபெற்று வருகிறது. இதில் இன்று நடைபெற்று வரும் 17ஆவது லீக் ஆட்டத்தில் சென்னை சூப்பர் கிங்ஸ் - ராஜஸ்தான் ராயல்ஸ் அணிகள் விளையாடி வருகின்றன. இப்போட்டியில் டாஸ் வென்ற சிஎஸ்கே அணி முதலில் பந்துவீச்சை தேர்வு செய்தது. 

அதன்படி களமிறங்கிய ராஜஸ்தான் ராயல்ஸ் அணிக்கு ஜோஸ் பட்லர் - யஷஸ்வி ஜெய்ஷ்வால் இணை தொடக்கம் கொடுத்தனர். இதில் அதிரடியாக இன்னிங்ஸைத் தொடங்கிய ஜெய்ஷ்வால் 10 ரன்களில் ஆட்டமிழந்து ஏமாற்றமளித்தார். பின்னர் ஜோடி சேர்ந்த பட்லர் - படிக்கல் இணை சிறப்பான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். 

இதில் சிறப்பான ஆட்டத்தை வெளிப்படுத்தி வந்த தேவ்தத் படிக்கல் அரைசதம் அடிப்பார் என எதிர்பார்க்கப்பட்ட நிலையில் 38 ரன்களில் ரவிந்திர ஜடேஜா பந்துவீச்சில் ஆட்டமிழந்தார். அவரைத் தொடர்ந்து வந்த கேப்டன் சஞ்சு சாம்சனும் அதே ஓவரில் ரன்கள் ஏதுமின்றி க்ளீன் போல்டாகினார். 

இதையடுத்து களமிறங்கிய ரவிச்சந்திரன் அஸ்வின் தனது பங்கிற்கு ஒரு பவுண்டரி, 2 சிக்சர்கள் என 30 ரன்களைச் சேர்த்து ஆட்டமிழக்க, மறுமுனையில் சிறப்பான ஆட்டத்தை வெளிப்படுத்தி வந்த ஜோஸ் பட்லர் நடப்பு சீசனில் தனது மூன்றாவது அரைசதத்தைப் பதிவுசெய்து அசத்தினார். பின் அவரும் 52 ரன்களைச் சேர்த்திருந்த நிலையில் மொயீன் அலி பந்துவீச்சில் க்ளீன் போல்டானார். 

அதனைத்தொடர்ந்து வந்த துருவ் ஜொரெல், ஜேசன் ஹோல்டர் ஆகியோரும் அடுத்தடுத்து சொற்ப ரன்களுக்கு ஆட்டமிழந்து ஏமாற்றமளித்தனர். இறுதியில் ஷிம்ரான் ஹெட்மையர் அதிரடியான ஆட்டத்தை வெளிப்படுத்தி 30 ரன்களைச் சேர்த்தார். இதன்மூலம் 20 ஓவர்கள் முடிவில் ராஜஸ்தான் ராயல்ஸ் அணி 8 விக்கெட் இழப்பிற்கு 175 ரன்களை சேர்த்தது. சிஎஸ்கே தரப்பில் ரவீந்திர ஜடேஜா, ஆகாஷ் சிங், துஷார் தேஷ்பாண்டே தலா 2 விக்கெட்டுகளைக் கைப்பற்றினர். 

Win Big, Make Your Cricket Tales Now